ਵਾਸਿੰ਼ਗਟਨ, 2 ਦਸੰਬਰ (ਪੋਸਟ ਬਿਊਰੋ) : ਇੱਕ ਵਾਰੀ ਫਿਰ ਅਸਲੀ ਨਾਫਟਾ ਡੀਲ ਅਮਰੀਕਾ ਦੇ ਰਾਸ਼ਟਰਪਤੀ ਡੌਨਲਡ ਟਰੰਪ ਦੀ ਹਿੱਟ ਲਿਸਟ ਉੱਤੇ ਆ ਗਈ ਹੈ। ਟਰੰਪ ਦਾ ਕਹਿਣਾ ਹੈ ਕਿ ਇਸ 24 ਸਾਲ ਪੁਰਾਣੀ ਨਾਫਟਾ ਡੀਲ ਨੂੰ ਖਤਮ ਕਰਵਾਉਣ ਲਈ ਉਹ ਕਾਂਗਰਸ ਉੱਤੇ ਦਬਾਅ ਪਾਉਣਗੇ।
ਸ਼ੁੱਕਰਵਾਰ ਨੂੰ ਅਰਜਨਟੀਨਾ ਵਿੱਚ ਜੀ-20 ਸਿਖਰ ਵਾਰਤਾ ਦੌਰਾਨ ਇੱਕ ਵੱਖਰੇ ਸਮਾਰੋਹ ਵਿੱਚ ਟਰੰਪ, ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਤੇ ਮੈਕਸਿਕੋ ਦੇ ਸਾਬਕਾ ਰਾਸ਼ਟਰਪਤੀ ਐਨਰਿਕ ਪਿਏਨਾ ਨਿਏਟੋ ਨੇ ਨਵੇਂ ਯੂਐਸ-ਕੈਨੇਡਾ-ਮੈਕਸਿਕੋ (ਯੂਐਸਐਮਸੀਏ) ਸਮਝੌਤੇ ਉੱਤੇ ਦਸਤਖ਼ਤ ਕੀਤੇ। ਹਾਲਾਂਕਿ ਓਟਵਾ ਸਥਿਤ ਫੈਡਰਲ ਸਰਕਾਰ ਨੇ ਇਸ ਡੀਲ ਦਾ ਨਾਂ ਸੀਯੂਐਸਐਮਏ ਕਰ ਦਿੱਤਾ।
ਇਸ ਮਗਰੋਂ ਸ਼ਨਿੱਚਰਵਾਰ ਨੂੰ ਵਾਸਿ਼ੰਗਟਨ ਪਰਤਦੇ ਸਮੇਂ ਟਰੰਪ ਨੇ ਏਅਰ ਫੋਰਸ ਵੰਨ ਵਿੱਚ ਇਹ ਐਲਾਨ ਕੀਤਾ ਕਿ ਉਹ ਜਲਦ ਹੀ ਨਾਫਟਾ ਨੂੰ ਰਸਮੀ ਤੌਰ ਉੱਤੇ ਖਤਮ ਕਰਵਾਉਣਗੇ ਤੇ ਇਸ ਲਈ ਕਾਂਗਰਸ ਉੱਤੇ ਦਬਾਅ ਵੀ ਪਾਉਣਗੇ। ਉਨ੍ਹਾਂ ਇਹ ਵੀ ਆਖਿਆ ਕਿ ਉਹ ਜਲਦ ਹੀ ਨਾਫਟਾ ਡੀਲ ਨੂੰ ਖਤਮ ਕਰਵਾ ਕੇ ਹੀ ਸਾਹ ਲੈਣਗੇ। ਉਨ੍ਹਾਂ ਆਖਿਆ ਕਿ ਨਾਫਟਾ ਅਮਰੀਕਾ ਲਈ ਬਹੁਤੀ ਕਾਰਗਰ ਡੀਲ ਨਹੀਂ ਰਹੀ। ਇਸ ਕਾਰਨ ਸਾਡੇ ਦੇਸ਼ ਵਿੱਚ ਬੇਰੋਜ਼ਗਾਰੀ ਤੇ ਕੰਪਨੀਆਂ ਨੂੰ ਕਈ ਤਰ੍ਹਾਂ ਦਾ ਘਾਟਾ ਪਿਆ।
ਉਨ੍ਹਾਂ ਆਖਿਆ ਕਿ ਕਾਂਗਰਸ ਨੂੰ ਜਾਂ ਤਾਂ ਯੂਐਸਐਮਸੀਏ ਨੂੰ ਚੁਣਨਾ ਹੋਵੇਗਾ ਤੇ ਜਾਂ ਫਿਰ ਨਾਫਟਾ ਤੋਂ ਪਹਿਲਾਂ ਵਾਲੇ ਦੌਰ ਨਾਲ ਹੀ ਰਹਿਣਾ ਹੋਵੇਗਾ। ਦੂਜੇ ਪਾਸੇ ਇਸ ਸਮੇਂ ਹਾਊਸ ਆਫ ਰਿਪ੍ਰਜ਼ੈਂਟੇਟਿਵਜ਼ ਵਿੱਚ ਬਹੁਗਿਣਤੀ ਦਾ ਆਨੰਦ ਮਾਣ ਰਹੇ ਡੈਮੋਕ੍ਰੈਟਸ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਨਵੀਂ ਡੀਲ ਬਹੁਤੀ ਪਸੰਦ ਨਹੀਂ ਆਈ ਤੇ ਉਹ ਇਸ ਦਾ ਸਮਰਥਨ ਵੀ ਨਹੀਂ ਕਰਨਗੇ। ਕੁੱਝ ਕੁ ਰਿਪਬਲਿਕਨਾਂ ਦਾ ਵੀ ਇਹੋ ਆਖਣਾ ਹੈ ਕਿ ਉਹ ਇਸ ਨਵੀਂ ਡੀਲ ਨੂੰ ਮੌਜੂਦਾ ਰੂਪ ਵਿੱਚ ਸਵੀਕਾਰ ਨਹੀਂ ਕਰਨਗੇ।