2013 ਵਿੱਚ ਫਿਲਮ ‘ਇਸ਼ਕ’ ਨਾਲ ਬਾਲੀਵੁੱਡ ਵਿੱਚ ਡੈਬਿਊ ਕਰ ਚੁੱਕੀ ਅਮਾਇਰਾ ਦਸਤੂਰ ਦੀਆਂ ਅਗਲੀਆਂ ਬਾਲੀਵੁੱਡ ਫਿਲਮਾਂ ‘ਰਾਜਮਾ ਚਾਵਲ’ ਅਤੇ ‘ਮੈਂਟਲ ਹੈ ਕਯਾ’ ਸ਼ਾਮਲ ਹਨ। ਬਾਲੀਵੁੱਡ ਵਿੱਚ ਕਦਮ ਰੱਖਣ ਪਿੱਛੋਂ ਉਸ ਨੇ ਦੱਖਣ ਦੀਆਂ ਕਈ ਭਾਸ਼ਾਵਾਂ ਦੀਆਂ ਫਿਲਮਾਂ ਵਿੱਚ ਵੀ ਕੰਮ ਕੀਤਾ ਹੈ। ਕਈ ਭਾਸ਼ਾਵਾਂ ਦੀਆਂ ਫਿਲਮਾਂ ਵਿੱਚ ਕੰਮ ਕਰਨ ਤੋਂ ਬਾਅਦ ਅਮਾਇਰਾ ਨੂੰ ਦੇਸ਼ ਦੀ ਭਾਸ਼ਾ ਦੀ ਵੰਨ-ਸੁਵੰਨਤਾ ਕਾਫੀ ਖਿੱਚ ਪਾਉਂਦੀ ਹੈ। ਉਹ ਕਹਿੰਦੀ ਹੈ ਕਿ ਮੈਂ ਹੈਦਰਾਬਾਦ 'ਚ ਇੱਕ ਫਿਲਮ ਦੀ ਸ਼ੂਟਿੰਗ ਕਰ ਰਹੀ ਸੀ। ਉਥੇ ਲੋਕ ਤੇਲਗੂ ਵਿੱਚ ਗੱਲਬਾਤ ਕਰਦੇ ਹਨ, ਮੈਨੂੰ ਕਿਸੇ ਨੇ ਦੱਸਿਆ ਕਿ ਤੇਲਗੂ ਭਾਸ਼ਾ ਵੀ ਪੰਜ ਵੱਖ-ਵੱਖ ਤਰੀਕੇ ਨਾਲ ਬੋਲੀ ਜਾਂਦੀ ਹੈ।
ਮੈਂ ਇਸ ਗੱਲ 'ਤੇ ਧਿਆਨ ਦਿੰਦੀ ਹਾਂ ਕਿ ਵੱਖ-ਵੱਖ ਫਿਰਕੇ ਕਿਸ ਤਰ੍ਹਾਂ ਭਾਸ਼ਾ ਨੂੰ ਪ੍ਰਭਾਵਤ ਕਰਦੇ ਹਨ। ਜਿਵੇਂ ਮੈਂ ਗੁਜਰਾਤੀ ਪਾਰਸੀ ਹਾਂ, ਪਰ ਸਾਡੀ ਗੁਜਰਾਤੀ ਜੈਨੀਆਂ ਦੀ ਗੁਜਰਾਤੀ ਤੋਂ ਬਿਲਕੁਲ ਵੱਖ ਹੈ। ਮੈਂ ਅਤੇ ਮੇਰੇ ਜੈਨ ਦੋਸਤ ਇੱਕ ਦੂਸਰੇ ਦੀ ਭਾਸ਼ਾ ਦੀਆਂ ਨਵੀਆਂ ਗੱਲਾਂ ਸਿਖਾਉਂਦੇ ਹਾਂ। ਮੈਨੂੰ ਇਹ ਦੇਖ ਕੇ ਵੀ ਚੰਗਾ ਲੱਗਦਾ ਹੈ ਕਿ ਸਾਨੂੰ ਭਾਰਤੀਆਂ ਨੂੰ ਕਿੰਨੀਆਂ ਭਾਸ਼ਾਵਾਂ ਆਉਂਦੀਆਂ ਹਨ। ਮੈਨੂੰ ਆਪਣੇ ਦੇਸ਼ ਦੀ ਇਹ ਖਾਸੀਅਤ ਚੰਗੀ ਲੱਗਦੀ ਹੈ।