ਨਵੀਂ ਦਿੱਲੀ, 27 ਅਕਤੂਬਰ (ਪੋਸਟ ਬਿਊਰੋ)- ਸਿੰਗਾਪੁਰ ਦੀ ਇੱਕ ਅਦਾਲਤ ਨੇ ਐਮਾਜ਼ੋਨ ਦੀ ਅਪੀਲ ਦੀ ਸੁਣਵਾਈ ਕਰਦੇ ਹੋਏ ਰਿਲਾਇੰਸ ਤੇ ਫਿਊਚਰ ਗਰੁੱਪ ਵਿਚਾਲੇ ਹੋਏ ਸੌਦੇ `ਤੇ ਅੰਤਰਿਮ ਰੋਕ ਲਾਉਣ ਦਾ ਹੁਕਮ ਕੀਤਾ ਹੈ।
ਰਿਲਾਇੰਸ ਨੇ ਫਿਊਚਰ ਗਰੁੱਪ ਦੇ ਰਿਟੇਲ ਤੇ ਹੋਲਸੇਲ ਕਾਰੋਬਾਰ ਨੂੰ ਖਰੀਦਣ ਲਈ 24,713 ਕਰੋੜ ਰੁਪਏ `ਚ ਸੌਦਾ ਕੀਤਾ ਹੋਇਆ ਹੈ। ਅਦਾਲਤ ਦੇ ਫ਼ੈਸਲੇ ਤੋਂ ਬਾਅਦ ਰਿਲਾਇੰਸ ਗਰੁੱਪ ਵੱਲੋਂ ਜਾਰੀ ਕੀਤੇ ਮੀਡੀਆ ਨੋਟ `ਚ ਕਿਹਾ ਗਿਆ ਹੈ ਕਿ ਰਿਲਾਇੰਸ ਰਿਟੇਲ ਵੈਂਚਰਜ਼ ਲਿਮਿਟਿਡ ਨੂੰ ਸਿੰਗਾਪੁਰ ਦੀ ਅਦਾਲਤ ਦੇ ਫ਼ੈਸਲੇ ਦੇ ਬਾਰੇ ਪਤਾ ਲੱਗਾ ਹੈ। ਰਿਲਾਇੰਸ ਰਿਟੇਲ ਨੇ ਫਿਊਚਰ ਰਿਟੇਲ ਦੇ ਕਾਰੋਬਾਰ ਤੇ ਜਾਇਦਾਦ ਨੂੰ ਆਪਣੇ ਕੰਟਰੋਲ ਹੇਠ ਲਿਆ ਹੈ। ਇਹ ਲੈਣ ਦੇਣ ਉਸੇ ਲਈ ਕੀਤਾ ਗਿਆ ਹੈ। ਇਸ ਸੌਦੇ `ਤੇ ਅੱਗੇ ਵੱਧਣ ਤੋਂ ਪਹਿਲਾਂ ਕਾਨੂੰਨੀ ਸਲਾਹ ਲਈ ਗਈ ਹੈ ਤੇ ਭਾਰਤੀ ਕਾਨੂੰਨ ਨੂੰ ਧਿਆਨ `ਚ ਰੱਖਦੇ ਹੋਏ ਇਸ ਸੌਦੇ ਨੂੰ ਪੂਰਾ ਕੀਤਾ ਗਿਆ ਹੈ। ਇਸ ਦੇ ਨਾਲ ਅਸੀਂ ਆਪਣੇ ਅਧਿਕਾਰਾਂ ਨੂੰ ਧਿਆਨ `ਚ ਰੱਖਦੇ ਹੋਏ ਬਿਨਾਂ ਦੇਰੀ ਫਿਊਚਰ ਗਰੁੱਪ ਨਾਲ ਲੈਣ ਦੇਣ ਪੂਰਾ ਕਰਨਾ ਚਾਹੁੰਦੇ ਹਾਂ।
ਅਸਲ `ਚ ਐਮਾਜ਼ੋਨ ਪਿਛਲੇ ਸਾਲ ਫਿਊਚਰ ਗਰੁੱਪ ਦੀ ਇੱਕ ਅਨਲਿਮਟਿਡ ਕੰਪਨੀ ਦੀ 49 ਫੀਸਦੀ ਹਿੱਸੇਦਾਰੀ ਖਰੀਦਣ `ਤੇ ਸਹਿਮਤ ਹੋਈ ਸੀ। ਇਸ ਦੇ ਨਾਲ ਸ਼ਰਤ ਸੀ ਕਿ ਐਮਾਜ਼ੋਨ ਨੂੰ 3 ਤੋਂ 10 ਸਾਲ ਦੀ ਮਿਆਦ ਦੇ ਬਾਅਦ ਫਿਊਚਰ ਰਿਟੇਲ ਲਿਮਿਟਿਡ ਦੀ ਹਿੱਸੇਦਾਰੀ ਖਰੀਦਣ ਦਾ ਹੱਕ ਹੋਵੇਗਾ। ਇਸ ਦੌਰਾਨ ਕਰਜ਼ ਵਿੱਚ ਡੁੱਬੇ ਕਿਸ਼ੋਰ ਬਿਆਨੀ ਦੇ ਗਰੁੱਪ ਨੇ ਆਪਣੇ ਰਿਟੇਲ ਸਟੋਰ, ਥੋਕ ਤੇ ਲਾਜਿਸਟਿਕਸ ਕਾਰੋਬਾਰ ਨੂੰ ਪਿੱਛੇ ਜਿਹੇ ਹੀ `ਚ ਰਿਲਾਇੰਸ ਨੂੰ ਵੇਚਣ ਦਾ ਕਰਾਰ ਕਰ ਲਿਆ। ਇਸ ਦੇ ਵਿਰੁੱਧ ਐਮਾਜ਼ੋਨ ਨੇ ਅਦਾਲਤ ਦਾ ਦਰਵਾਜ਼ਾ ਖ਼ੜਕਾਇਆ ਹੈ।