* 3 ਘੰਟੇ ਉਡੀਕ ਦੇ ਬਾਅਦ ਰੈਸਟੋਰੈਂਟ ਨੇ ਬਾਹਰ ਕੱਢਿਆ
ਨਿਊਯਾਰਕ, 27 ਅਕਤੂਬਰ (ਪੋਸਟ ਬਿਊਰੋ)- ਅਮਰੀਕਾ `ਚ ਅਜੇ ਕੁਝ ਹੀ ਦਿਨ ਪਹਿਲਾਂ ਜਾਰਜ ਫਲਾਇਡ ਦੇ ਮੌਤ ਦੇ ਬਾਅਦ ‘ਬਲੈਕ ਲਾਈਵਸ ਮੈਟਰ` ਅੰਦੋਲਨ ਤੇ ਨਸਲਵਾਦ ਦੇ ਮਾਮਲੇ ਨੇ ਕਾਫੀ ਜ਼ੋਰ ਫੜਿਆ ਸੀ। ਇਹ ਮੁੱਦਾ ਅਜੇ ਸ਼ਾਂਤ ਨਹੀਂਹੋਇਆ ਕਿ ਪ੍ਰਮੁੱਖ ਕਾਰੋਬਾਰੀ ਕੁਮਾਰਮੰਗਲਮ ਬਿਰਲਾ (ਅਦਿੱਤਿਆ ਬਿਰਲਾ ਗਰੁੱਪ ਦੇ ਚੇਅਰਮੈਨ) ਦੀ ਬੇਟੀ ਅਤੇ ਗਾਇਕਾ ਅਨੰਨਿਆ ਬਿਰਲਾ ਤੇ ਬਿਰਲਾ ਪਰਵਾਰ ਨਾਲ ਨਸਲੀ ਵਿਤਕਰੇ ਦਾ ਕਸੇ ਸਾਹਮਣੇ ਆਇਆ ਹੈ।
ਅਨੰਨਿਆ ਬਿਰਲਾ ਨੇ ਟਵੀਟ ਕਰਕੇ ਦੱਸਿਆ ਕਿ ਵਾਸ਼ਿੰਗਟਨ ਦੇ ਸਕੋਪਾ ਇਟਾਲੀਅਨ ਰੈਸਟੋਰੈਂਟ ਨੇ ਉਸ ਨੂੰ ਤੇ ਉਸਦੇ ਪਰਵਾਰ ਨੂੰ ਬਾਹਰ ਕੱਢ ਦਿੱਤਾ। ਇਸ ਨਸਲੀ ਵਿਤਕਰੇ ਨਾਲ ਬਹੁਤ ਦੁੱਖ ਹੋਇਆ। ਅਗਲੇ ਟਵੀਟ ਵਿੱਚ ਉਸ ਨੇ ਕਿਹਾ ਕਿ ਵੇਟਰ ਨੇ ਉਸ ਦੀ ਮਾਤਾ ਨਾਲ ਮਾੜਾ ਵਿਹਾਰ ਕੀਤਾ। ਅਨੰਨਿਆ ਨੇ ਕਿਹਾ ਕਿ ਅਸੀਂ ਰੈਸਟੋਰੈਂਟ ਵਿੱਚ ਖਾਣੇ ਦੇ ਲਈ ਤਿੰਨ ਘੰਟੇ ਉਡੀਕ ਕੀਤੀ। ਉਸ ਨੇ ਕਿਹਾ ਕਿ ‘ਸ਼ੈਫ ਐਟੋਨੀਓ, ਤੁਹਾਡੇ ਵੇਟਰ ਜੋਸ਼ੁਆ ਸਿਲਵਰਮੈਨ ਦਾ ਵਿਹਾਰ ਮੇਰੀ ਮਾਂ ਲਈ ਬੇਹੱਦ ਅਸੱਭਿਆ ਤੇ ਨਸਲਵਾਦੀ ਸੀ, ਜੋ ਠੀਕ ਨਹੀਂ ਸੀ।’ ਅਨੰਨਿਆ ਦੀ ਮਾਂ ਨੀਰਜਾ ਨੇ ਇੱਕ ਟਵੀਟ ਵਿੱਚ ਕਿਹਾ ਕਿ ਇਹ ਬਹੁਤ ਹੈਰਾਨੀ ਵਾਲੀ ਘਟਨਾ ਹੈ। ਇਸ ਤਰ੍ਹਾਂ ਕਿਸੇ ਗ੍ਰਾਹਕ ਨਾਲ ਵਿਹਾਰ ਕਰਨ ਦਾ ਕਿਸੇ ਨੂੰ ਕੋਈ ਹੱਕਨਹੀਂ। ਅਨੰਨਿਆ ਦੇ ਭਰਾ ਆਰਿਆਮਾਨ ਨੇ ਟਵੀਟ ਕੀਤਾ ਕਿ ਮੈਂ ਇਸ ਤਰ੍ਹਾਂ ਦਾ ਕਦੇ ਵੀ ਅਨੁਭਵ ਨਹੀਂ ਕੀਤਾ ਸੀ, ਨਸਲਵਾਦ ਮੌਜੂਦ ਹੈ ਤੇ ਇਹ ਹਕੀਕੀ ਹੈ।
ਦੂਸਰੇ ਪਾਸੇ ਰੈਸਟੋਰੈਂਟ ਨੇ ਇਸ ਦੋਸ਼ ਤੋਂ ਇਨਕਾਰ ਕੀਤਾ ਹੈ। ਹੋਟਲ ਦੇ ਇੱਕ ਭਾਈਵਾਲ ਪਾਬਲੋ ਮੋਈਕਸ ਨੇ ਇਨ੍ਹਾਂ ਦੋਸ਼ਾਂ ਨੂੰ ਰੱਦ ਕਰਦੇ ਹੋਏ ਕਿਹਾ ਕਿ ਉਨ੍ਹਾਂ ਨੂੰ ਹੋਟਲ ਤੋਂ ਕੱਢ ਦਿੱਤਾ ਗਿਆ ਸੀ ਅਤੇ ਕਿਹਾ ਕਿ ਉਹ ਆਪਣਾ ਭੋਜਨ ਕਰਨ ਤੱਕ ਰੁਕੇ ਸਨ। ਉਨ੍ਹਾਂ ਕਿਹਾ ਕਿ ਸ਼ਰਾਬ ਦੇਣ ਲਈ ਰਾਜ ਦੇ ਕਾਨੂੰਨ ਹੇਠ ਜ਼ਰੂਰੀ ਆਈ ਡੀ ਮੰਗਣ ਉੱਤੇ ਅਜਿਹੀ ਸਥਿਤੀ ਪੈਦਾ ਹੋ ਗਈ, ਜੋ ਪਾਰਟੀ ਵਿੱਚ ਦੋ ਲੋਕਾਂ ਕੋਲ ਸੀ ਤੇ ਬਾਕੀਆਂ ਕੋਲ ਕੇਵਲ ਉਸ ਦੀ ਕਾਪੀ ਸੀ। ਮੋਈਕਸ ਨੇ ਕਿਹਾ ਕਿ ਇਹ ਇੱਕ ਮੰਦਭਾਗੀ ਸਥਿਤੀ ਸੀ ਤੇ ਉਹ ਚਾਹੁੰਦੇ ਹਨ ਕਿ ਉਹ ਫਿਰ ਰੈਸਟੋਰੈਂਟ `ਚ ਆਉਣ।