ਚੇਨਈ, 25 ਅਕਤੂਬਰ, (ਪੋਸਟ ਬਿਊਰੋ)- ਭਾਰਤੀ ਮਹਿਲਾ ਟੀਮ ਨੇ ਅੱਜ ਐਤਵਾਰ ਇੰਡੋਨੇਸ਼ੀਆ ਨੂੰ 6-2 ਨਾਲ ਹਰਾ ਕੇ ਏਸ਼ੀਆਈ ਨੇਸ਼ਨਜ਼ (ਰੀਜਨਲ) ਆਨਲਾਈਨ ਸ਼ਤਰੰਜ ਚੈਂਪੀਅਨਸ਼ਿਪ ਦਾ ਖ਼ਿਤਾਬ ਜਿੱਤਿਆ ਹੈ, ਪਰ ਮਰਦ ਟੀਮ ਨੂੰ ਫਾਈਨਲ ਵਿਚ ਆਸਟ੍ਰੇਲੀਆ ਹੱਥੋਂ ਹਾਰ ਦੇ ਕਾਰਨ ਸਿਲਵਰ ਮੈਡਲ ਨਾਲ ਸਬਰ ਕਰਨਾ ਪਿਆ ਹੈ।
ਵਰਨਣ ਯੋਗ ਹੈ ਕਿ ਭਾਰਤ ਨੇ ਅਗਸਤ ਵਿਚ ਫਿਡੇ ਆਨਲਾਈਨ ਓਲੰਪਿਆਡ ਜਿੱਤਿਆ ਸੀ ਤੇ ਆਪਣੇ ਚੋਟੀ ਦੇ ਖਿਡਾਰੀਆਂ ਕੋਨੇਰੂ ਹੰਪੀ ਅਤੇ ਡੀ ਹਰਿਕਾ ਦੀ ਗ਼ੈਰ-ਹਾਜ਼ਰੀ ਵਿਚ ਵੀ ਮਹਿਲਾ ਟੀਮ ਦੀ ਤਾਜ਼ਾ ਪ੍ਰਾਪਤੀ ਨਾਲ ਦੇਸ਼ ਵਿਚ ਇਸ ਖੇਡ ਨੂੰ ਉਤਸ਼ਾਹ ਮਿਲੇਗਾ। ਮਰਦ ਟੀਮ ਨੂੰ ਬਹੁਤ ਫ਼ਸਵੇਂ ਫਾਈਨਲ ਵਿਚ ਆਸਟ੍ਰੇਲੀਆ ਹੱਥੋਂ 3.5-4.5 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ ਹੈ। ਭਾਰਤੀ ਟੀਮ ਪਹਿਲਾ ਮੈਚ 1.5-2.5 ਨਾਲ ਹਾਰ ਗਈ ਸੀ, ਜਦਕਿ ਦੂਜਾ ਮੈਚ 2-2 ਨਾਲ ਬਰਾਬਰ ਰਿਹਾ ਅਤੇ ਇਸ ਤਰ੍ਹਾਂ ਆਸਟਰੇਲੀਆ ਜਿੱਤ ਗਿਆ।
ਮਹਿਲਾ ਵਰਗ ਦੇ ਫਾਈਨਲ ਵਿਚ ਮਹਿਲਾ ਗਰੈਂਡ ਮਾਸਟਰ ਪੀਵੀ ਨੰਦਿਤਾ ਨੇ ਚੇਲਸੀ ਮੋਨਿਕਾ ਇਗਨੇਸਿਆਸ ਸਹੇਤੀ ਨੂੰ ਹਰਾ ਕੇ ਭਾਰਤ ਨੂੰ ਪਹਿਲਾ ਅੰਕ ਦਿਵਾਇਆ। ਇਸ ਤੋਂ ਬਾਅਦ ਪੂਨਮ ਰਾਉਤ ਨੇ ਮੇਡੀਨਾ ਵਰਦਾ ਆਈਲੀਆ ਨੂੰ ਹਰਾਇਆ। ਆਰ ਵੈਸ਼ਾਲੀ ਤੇ ਕਪਤਾਨ ਮੈਰੀ ਐੱਨ ਗੋਮਜ਼ ਨੇ ਆਪੋ-ਆਪਣੀਆਂ ਬਾਜ਼ੀਆਂ ਡਰਾਅ ਖੇਡੀਆਂ।ਇਸ ਤਰ੍ਹਾਂ ਭਾਰਤ ਨੇ ਪਹਿਲਾ ਮੈਚ 3-1 ਨਾਲ ਜਿੱਤਿਆ। ਦੂਜੇ ਮੈਚ ਵਿਚ ਵੈਸ਼ਾਲੀ ਨੂੰ ਟਾਪ ਬੋਰਡ ਉੱਤੇ ਇਰੀਨ ਕਰਿਸ਼ਮਾ ਸੁਕੰਦਰ ਤੋਂ ਹਾਰ ਸਹਿਣੀ ਪਈ, ਪਰ ਭਗਤੀ ਕੁਲਕਰਨੀ, ਪਦਮਿਨੀ ਰਾਉਤ ਤੇ ਨੰਦਿਤਾ ਨੇ ਬਾਜ਼ੀਆਂ ਜਿੱਤੀਆਂ। ਭਾਰਤੀ ਮਹਿਲਾ ਟੀਮ ਮੁੱਢਲੇ ਗੇੜ ਵਿਚ ਚੋਟੀ ਉੱਤੇ ਰਹੀ ਸੀ। ਵੈਸ਼ਾਲੀ ਨੇ ਨੌਂਮੈਚਾਂ ਵਿਚ 6.5 ਅੰਕ ਲੈ ਕੇ ਸਿਖ਼ਰਲੇ ਬੋਰਡ ਦਾ ਗੋਲਡ ਮੈਡਲ ਜਿੱਤਿਆ ਸੀ।
ਮਰਦ ਵਰਗ ਦੇ ਫਾਈਨਲ ਦੇ ਪਹਿਲੇ ਮੈਚ ਵਿਚ ਬੀ ਅਧੀਬਾਨ ਅਤੇ ਐੱਸ ਪੀ ਸੇਤੁਰਮਨ ਦੀ ਏਂਟਨ ਸਮਿਰਨੋਵ ਅਤੇ ਮੈਕਸ ਇਲਿੰਗਵਰਥ ਹੱਥੋਂ ਹਾਰ ਹੋਈ ਭਾਰਤ ਨੂੰ ਮਹਿੰਗੀ ਪਈ। ਦੂਜੇ ਮੈਚ ਵਿਚ ਸੇਤੁਰਮਨ ਦੀ ਥਾਂ ਸੂਰਿਆ ਸ਼ੇਖਰ ਗਾਂਗੁਲੀ ਖੇਡੇ ਅਤੇ ਉਹ ਇਲਿੰਗਵਰਥ ਨੂੰ ਹਰਾਉਣ ਵਿਚ ਕਾਮਯਾਬ ਰਹੇ, ਪਰ ਕੁਆਬੋਕਾਰੋਵ ਨੇ ਵੀ ਸਰੀਨ ਨੂੰ ਹਰਾ ਕੇ ਹਿਸਾਬ ਬਰਾਬਰ ਕਰ ਦਿੱਤਾ। ਅਧੀਬਾਨ ਤੇ ਸ਼ਸ਼ੀਕਰਨ ਨੇ ਆਪੋ-ਆਪਣੀਆਂ ਬਾਜ਼ੀਆਂ ਡਰਾਅ ਖੇਡੀਆਂ।