ਗੋਰਾਇਆ, 24 ਅਕਤੂਬਰ (ਪੋਸਟ ਬਿਊਰੋ)- ਇੱਕ ਵਿਅਕਤੀ ਵੱਲੋਂ 30 ਲੱਖ ਰੁਪਏ ਦੀ ਧੋਖਾਧੜੀ ਕਰ ਪੈਟਰੋਲ ਪੰਪ ਆਪਣੇ ਕਰਾਉਣ ਦੇ ਮਾਮਲੇ ਵਿੱਚ ਪੁਲਸ ਨੇ ਦੋਸ਼ੀ ਉੱਤੇ ਕੇਸ ਦਰਜ ਕੀਤਾ ਹੈ।
ਪਿੰਡ ਅੱਟਾ ਦੇ ਤਰਲੋਚਨ ਸਿੰਘ ਨੇ ਪੁਲਸ ਨੂੰ ਸ਼ਿਕਾਇਤ ਦਿੱਤੀ ਹੈ ਕਿ ਉਸ ਦੀ ਪਤਨੀ ਚਰਨਜੀਤ ਕੌਰ ਨੇ ਸਾਲ 2016 ਵਿੱਚ ਪਾਰਟਨਸ਼ਿਪ ਵਿੱਚ ਜਸਪ੍ਰੀਤ ਸਿੰਘ ਨੇ ਹੱਥ ਰੁੜਕਾ ਰੋਡ ਬੁੰਡਾਲਾ ਵਿੱਚ ਫਤਿਹ ਐੱਚ ਪੀ ਫਿਲਿੰਗ ਸਟੇਸ਼ਨ ਸ਼ੁਰੂ ਕੀਤਾ ਸੀ, ਪਰ ਕਿਸੇ ਗੱਲ ਤੋਂ ਦੋਵਾਂ ਦਾ ਵਿਵਾਦ ਹੋ ਗਿਆ। ਜਸਪ੍ਰੀਤ ਸਿੰਘ ਨੇ ਰਾਜੀਨਾਮੇ ਵਿੱਚ 40 ਲੱਖ ਰੁਪਏ ਚਰਨਜੀਤ ਕੌਰ ਨੂੰ ਦੇਣਾ ਮੰਨਿਆ, ਪਰ ਪੇਮੇਂਟ ਨਹੀਂ ਦਿੱਤੀ। ਇਸੇ ਦੌਰਾਨ ਜਸਪ੍ਰੀਤ ਸਿੰਘ ਨੇ ਆਤਮ ਨਗਰ ਲੁਧਿਆਣਾ ਦੇ ਵਸਨੀਕ ਰੋਬਿਨ ਭੱਲਾ ਤੋਂ ਪੇਟਰੋਲ ਪੰਪ ਉਸ ਦੇ ਨਾਮ ਕਰਾਉਣ ਦੀ ਗੱਲ ਕੀਤੀ। 30 ਅਕਤੂਬਰ 2019 ਨੂੰ ਰੋਬਿਨ ਭੱਲਾ ਨੇ ਚਰਨਜੀਤ ਕੌਰ ਨੂੰ 15-15 ਲੱਖ ਰੁਪਏ ਦੇ ਦੋ ਚੈੱਕ ਦੇ ਦਿੱਤੇ, ਪਰ ਇਹ ਚੈਕ ਬੈਂਕ ਤੋਂ ਕੈਸ਼ ਨਹੀਂ ਹੋਏ। ਇਸ ਉੱਤੇ ਚਰਨਜੀਤ ਕੌਰ ਨੇ ਪੇਟਰੋਲ ਪੰਪ ਟ੍ਰਾਂਸਫਰ ਨਾ ਕਰਨ ਦੀ ਦਰਖਾਸਤ ਕੰਪਨੀ ਨੂੰ ਦੇ ਦਿੱਤੀ ਤੇ ਪੰਪ ਰੋਬਿਨ ਦੇ ਨਾਮ ਟ੍ਰਾਂਸਫਰ ਨਹੀਂ ਹੋਇਆ। ਫਿਰ ਦੋਵਾਂ ਪਾਰਟੀਆਂ ਦਾ ਦੁਬਾਰਾ ਸਮਝੌਤਾ ਹੋਇਆ ਅਤੇ ਚੈੱਕ ਇਸ ਵਾਰ ਫਿਰ ਕੈਸ਼ ਨਹੀਂ ਹੋਇਆ, ਪਰ ਪੈਟਰੋਲ ਪੰਪ ਰੋਬਿਨ ਭੱਲਾ ਦੇ ਨਾਮ ਉੱਤੇ ਟ੍ਰਾਂਸਫਰ ਹੋ ਗਿਆ ਜਿਸ ਨੂੰ ਉਹ ਚਲਾ ਰਿਹਾ ਹੈ। ਰੋਬਿਨ ਨੇ 30 ਲੱਖ ਰੁਪਏ ਦੇਣ ਦਾ ਝਾਂਸਾ ਦੇ ਕੇ ਪੈਟਰੋਲ ਪੰਪ ਆਪਣੇ ਨਾਮ ਕਰਵਾ ਲਿਆ। ਪੁਲਸ ਨੇ 10 ਅਕਤੂਬਰ ਨੂੰ ਧੋਖਾਧੜੀ ਦਾ ਕੇਸ ਦਰਜ ਕੀਤਾ ਹੈ, ਪਰ ਦੋਸ਼ੀ ਪੁਲਸ ਦੀ ਗ਼੍ਰਿਫਤ ਤੋਂ ਬਾਹਰ ਹੈ। ਤਰਲੋਚਨ ਸਿੰਘ ਨੇ ਦੱਸਿਆ ਕਿ ਜਸਪ੍ਰੀਤ ਸਿੰਘ ਵਾਸੀ ਅੱਠਾ ਦੇ ਖ਼ਿਲਾਫ਼ ਪੁਲਸ ਨੇ ਜੂਨ 2019 ਵਿੱਚ ਧੋਖਾਧੜੀ ਦਾ ਕੇਸ ਦਰਜ ਕੀਤਾ ਸੀ। ਉਸਦੀ ਅਗੇਤੀ ਜਮਾਨਤ ਦੀ ਅਰਜ਼ੀ ਹੇਠਲੀ ਅਦਾਲਤ ਵਿੱਚ ਰੱਦ ਹੋਣ ਦੇ ਬਾਅਦ ਹਾਈ ਕੋਰਟ ਦੇ ਵਿਚਾਰ ਅਧੀਨ ਹੈ।