ਵਾਸ਼ਿੰਗਟਨ, 23 ਅਕਤੂਬਰ (ਪੋਸਟ ਬਿਊਰੋ)- ਅਮਰੀਕੀ ਅਧਿਕਾਰੀਆਂ ਨੇ ਇਰਾਨ ਉੱਤੇ ਡੈਮੋਕ੍ਰੇਟਿਕ ਵੋਟਰਾਂ ਨੂੰ ਕਈ ਰਾਜਾਂ ਵਿੱਚ ਭੜਕਾਊ ਈ-ਮੇਲਾਂ ਭੇਜਣ ਦੇ ਦੋਸ਼ ਲਾਏ ਹਨ, ਜਿਨਾਂ ਦਾ ਮਕਸਦ ਵੋਟਰਾਂ ਨੂੰ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਹੱਕ ਵਿੱਚ ਵੋਟ ਪਾਉਣ ਲਈ ਡਰਾਉਣਾ ਜਾਪਦਾ ਹੈ। ਇਸ ਪ੍ਰਕਿਰਿਆ ਦੌਰਾਨ ਅਧਿਕਾਰੀਆਂ ਨੇ ਇਰਾਨ ਵੱਲ ਉਂਗਲ ਚੁੱਕਣ ਸਬੰਧੀ ਕੋਈ ਸਪੱਸ਼ਟ ਸਬੂਤ ਨਹੀਂ ਦਿੱਤੇ।
ਅਸਲ ਵਿੱਚ ਅਮਰੀਕੀ ਅਧਿਕਾਰੀਆਂ ਨੇ ਕਾਹਲੀ ਵਿੱਚ ਸੱਦੀ ਪ੍ਰੈਸ ਕਾਨਫਰੰਸ ਵਿੱਚ ਇਹ ਦੋਸ਼ ਲਾਏ ਅਤੇ ਇਸ ਮੌਕੇ ਅਮਰੀਕਾ ਸਰਕਾਰ ਦੇ ਚੀਫ ਖੁਫੀਆ ਅਧਿਕਾਰੀ ਜੌਹਨ ਰਾਟਕਲਿਫ ਨੇ ਕਿਹਾ, ‘ਇਹ ਕਾਰਵਾਈਆਂ ਨਿਰਾਸ਼ ਹੋਏ ਦੁਸ਼ਮਣਾਂ ਵੱਲੋਂ ਕੀਤੀਆਂ ਕੋਸ਼ਿਸ਼ਾਂ ਹਨ।` ਐਫ ਬੀ ਆਈ ਦੇ ਨਿਰਦੇਸ਼ਕ ਕ੍ਰਿਸ ਰ੍ਰੇਅ ਨਾਲ ਕੀਤੀ ਪ੍ਰੈਸ ਕਾਨਫਰੰਸ ਮੌਕੇ ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਅਮਰੀਕਾ ਦੀਆਂ 2020 ਦੀਆਂ ਚੋਣਾਂ ਵਿੱਚ ਦਖਲ ਦੇਣ ਵਾਲੇ ਕਿਸੇ ਵੀ ਵਿਦੇਸ਼ੀ ਦੇਸ਼ ਉਪਰ ਅਮਰੀਕਾ ਵੱਲੋਂ ਜੁਰਮਾਨੇ ਲਾਏ ਜਾਣਗੇ। ਉਨ੍ਹਾਂ ਕਿਹਾ ਕਿ ਚੋਣਾਂ ਦੀ ਨਿਰਪੱਖਤਾ ਅਜੇ ਕਾਇਮ ਹੈ।
ਦੋਵਾਂ ਅਧਿਕਾਰੀਆਂ ਨੇ ਕਿਹਾ ਕਿ ਰੂਸ ਅਤੇ ਇਰਾਨ ਨੇ ਵੋਟਰਾਂ ਦੀ ਰਜਿਸਟਰੇਸ਼ਨ ਸਬੰਧੀ ਜਾਣਕਾਰੀ ਪ੍ਰਾਪਤ ਕੀਤੀ ਅਤੇ ਇਰਾਨ ਨੇ ਇਸ ਜਾਣਕਾਰੀ ਨੂੰ ਭੜਕਾਊ ਈ-ਮੇਲਾਂ ਲਈ ਵਰਤਿਆ। ਰ੍ਰੇਅ ਅਤੇ ਰਾਟਕਲਿਫ ਨੇ ਇਰਾਨ ਨਾਲ ਸਬੰਧਤ ਈ-ਮੇਲਾਂ ਬਾਰੇ ਵੇਰਵੇ ਨਹੀਂ ਦਿੱਤੇ, ਪਰੰਤੂ ਇਸ ਮਾਮਲੇ ਤੋਂ ਜਾਣੂ ਅਧਿਕਾਰੀਆਂ ਨੇ ਕਿਹਾ ਕਿ ਅਮਰੀਕਾ ਦੇ ਘੱਟੋ-ਘੱਟ ਚਾਰ ਸੂਬਿਆਂ ਵਿੱਚ ਡੈਮੋਕ੍ਰੇਟਿਕ ਵੋਟਰਾਂ ਨੂੰ ਤਹਿਰਾਨ ਵੱਲੋਂ ਸੁਨੇਹੇ ਭੇਜੇ ਗਏ ਹਨ।