ਨਵੀਂ ਦਿੱਲੀ, 22 ਅਕਤੂਬਰ (ਪੋਸਟ ਬਿਊਰੋ)- ਭੀਮਾ ਕੋਰੇਗਾਉਂ ਹਿੰਸਾ ਮਾਮਲੇ ਵਿੱਚ ਗੈਰ ਕਾਨੂੰਨੀ ਸਰਗਰਮੀਆਂ ਰੋਕੂ ਐਕਟ (ਯੂ ਏ ਪੀ ਏ) ਹੇਠ ਗ੍ਰਿਫਤਾਰ ਕੀਤੇ ਈਸਾਈ ਪਾਦਰੀ ਤੇ ਸਮਾਜਿਕ ਕਾਰਕੰੁਨ ਸਟੈਨ ਸਵਾਮੀ ਨਾਲ ਇਕਜੁੱਟਤਾ ਪੇਸ਼ ਕਰਦਿਆਂ ਵਿਰੋਧੀ ਧਿਰ ਦੇ ਆਗੂਆਂ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਉਨ੍ਹਾਂ ਦੇ ਹੱਕਾਂ `ਤੇ ਦਿਨ ਦਿਹਾੜੇ ਮਾਰੇ ਜਾ ਰਹੇ ਡਾਕੇ ਦੇ ਖਿਲਾਫ ਚੁੱਪ ਤੋੜਨ ਅਤੇ ਆਵਾਜ਼ ਬੁਲੰਦ ਕਰਨ। ਸਮਾਜੀ ਕਾਰਕੁੰਨਾਂ ਤੇ ਸਿਆਸੀ ਆਗੂਆਂ ਨੇ ਗ੍ਰਿਫਤਾਰੀ ਦੀ ਨਿਖੇਧੀ ਕਰਦਿਆਂ ਕਿਹਾ ਪਾਰਕਿਨਸਨ ਸਮੇਤ ਸਿਹਤ ਦੇ ਕਈ ਹੋਰਨਾਂ ਵਿਗਾੜਾਂ ਦਾ ਸ਼ਿਕਾਰ ਸਵਾਮੀ ਜੇਲ੍ਹਨਹੀਂ, ਬਲਕਿ ਸਤਿਕਾਰ ਤੇ ਹਮਾਇਤ ਦਾ ਹੱਕਦਾਰ ਹੈ।
ਪੀਪਲਜ਼ ਫਾਰ ਸਿਵਲ ਲਿਬਰਟੀਜ਼ (ਪੀ ਯੂ ਸੀ ਐਲ) ਵੱਲੋਂ ਰੱਖੀ ਗਈ ਵਰਚੁਅਲ ਪ੍ਰੈੱਸ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਝਾਰਖੰਡ ਦੇ ਮੁੱਖ ਮੰਤਰੀ ਹੇਮੰਤ ਸੋਰੇਨ ਨੇ ਕਿਹਾ ਕਿ ਸਰਕਾਰ ਹਾਸ਼ੀਏ `ਤੇ ਧੱਕੇ ਭਾਈਚਾਰਿਆਂ ਦੀ ਆਵਾਜ਼ ਨੂੰ ਦਬਾਉਣ ਦੀਆਂ ਕੋਸ਼ਿਸ਼ਾਂ ਕਰ ਰਹੀ ਹੈ। ਸੋਰੇਨ ਨੇ ਵੀਡੀਓ ਸੁਨੇਹੇ ਵਿੱਚ ਕਿਹਾ ਕਿ ਮੌਜੂਦਾ ਸਰਕਾਰ ਦੀ ਰਹਿਨੁਮਾਈ ਵਿੱਚ ਏਕਤਾ, ਅਖੰਡਤਾ ਤੇ ਜਮਹੂਰੀ ਤਾਣਾ ਬਾਣਾ ਖਤਰੇ ਵਿੱਚ ਹੈ।ਸੀ ਪੀ ਆਈ ਐਮ ਦੇ ਜਨਰਲ ਸਕੱਤਰ ਸੀਤਾਰਾਮ ਯੇਚੁਰੀ ਅਤੇ ਡੀ ਐਮ ਕੇ ਦੀ ਆਗੂ ਕਨੀਮੋਈ ਨੇ ਸਿਵਲ ਸੁਸਾਇਟੀ ਗਰੁੱਪਾਂ ਅਤੇ ਆਮ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਕੇਂਦਰ ਸਰਕਾਰ ਵੱਲੋਂ ਲੋਕਾਂ ਦੇ ਹੱਕ ਖੋਹਣ ਲਈ ਕੀਤੇ ਜਾ ਰਹੇ ਹਮਲਿਆਂ ਦੇ ਖਿਲਾਫ ਆਪਣੀ ਖਾਮੋਸ਼ੀ ਨੂੰ ਤੋੜਨ ਅਤੇ ਆਵਾਜ਼ ਬੁਲੰਦ ਕਰਨ। ਸੀਨੀਅਰ ਕਾਂਗਰਸੀ ਆਗੂ ਸ਼ਸ਼ੀ ਥਰੂਰ ਨੇ ਕਿਹਾ ਕਿ ਸਵਾਮੀ ਜੇਲ੍ਹ ਦਾ ਨਹੀਂ, ਬਲਕਿ ਸਤਿਕਾਰ ਤੇ ਹਮਾਇਤ ਦਾ ਹੱਕਦਾਰ ਹੈ।