ਚੰਡੀਗੜ੍ਹ, 19 ਅਕਤੂਬਰ, (ਪੋਸਟ ਬਿਊਰੋ)-ਉੱਤਰ ਪ੍ਰਦੇਸ਼ ਅਤੇ ਹੋਰ ਰਾਜਾਂਤੋਂ, ਜਿੱਥੇ ਫਸਲ ਦੀ ਘੱਟੋ-ਘੱਟ ਖਰੀਦ ਦੀ ਕੀਮਤ (ਐੱਮ ਐੱਸ ਪੀ) ਨਹੀਂ ਮਿਲਦੀ, ਓਥੋਂ ਘੱਟ ਮੁੱਲ ਉੱਤੇ ਝੋਨਾ ਖ਼ਰੀਦ ਕੇ ਚੋਰੀ-ਚੋਰੀ ਪੰਜਾਬ ਵਿੱਚ ਲਿਆਉਣ ਦਾ ਗੈਰ-ਕਾਨੂੰਨੀ ਧੰਦਾ ਜਾਰੀ ਹੈ। ਅੱਜ ਸੋਮਵਾਰ ਨੂੰ ਪਟਿਆਲਾ, ਬਠਿੰਡਾ, ਅਬੋਹਰ ਅਤੇ ਮੋਗਾ ਵਿਚ ਝੋਨੇ ਨਾਲ ਲੱਦੇ 21 ਟਰੱਕ ਪੁਲਿਸ ਨੇ ਫੜੇ ਅਤੇ ਇਸ ਸੰਬੰਧ ਵਿੱਚ 13 ਕੇਸ ਦਰਜ ਕੀਤੇ ਹਨ।ਪੁਲਿਸ ਅਧਿਕਾਰੀਆਂ ਦੇ ਮੁਤਾਬਕ ਫੜੇ ਗਏ ਬਹੁਤੇ ਟਰੱਕ ਸ਼ੈਲਰ ਮਾਲਕਾਂ ਅਤੇ ਆੜ੍ਹਤੀਆਂ ਨੇ ਮੰਗਵਾਏ ਹਨ, ਪਰ ਅਬੋਹਰ ਵਿਚ ਰਾਜਸਥਾਨ ਦੇ ਹਨੂੰਮਾਨਗੜ੍ਹ ਦੇ ਦੋ ਕਿਸਾਨ ਖੁਦ ਵੀ ਪੰਜਾਬ ਦੀ ਮੰਡੀ ਵਿਚ ਝੋਨਾ ਵੇਚਣ ਆਏ ਸਨ।
ਮਿਲ ਸਕੀ ਜਾਣਕਾਰੀ ਮੁਤਾਬਕ ਇਸ ਤਸਕਰੀ ਵਿੱਚ ਹਜ਼ਾਰਾਂ ਕੁਇੰਟਲ ਝੋਨੇ ਦੇ ਫਰਜ਼ੀ ਬਿੱਲ ਬਣਾ ਕੇ ਇਸ ਨੂੰ ਪੰਜਾਬ ਵਿਚ ਖ਼ਰੀਦ ਕੀਤਾ ਝੋਨਾ ਦੱਸ ਕੇ ਸਰਕਾਰ ਤੋਂਇਸ ਦੇ ਘੱਟੋ-ਘੱਟ ਸਮਰਥਨ ਮੁੱਲ ਦੇ ਹਿਸਾਬ ਨਾਲ ਪੈਸਾ ਵਸੂਲ ਕੀਤਾ ਜਾਵੇਗਾ। ਇਸ ਗੰਦੇ ਧੰਦੇ ਤੋਂ ਆੜ੍ਹਤੀ ਤੇ ਸ਼ੈਲਰ ਮਾਲਕ ਮੋਟਾ ਮੁਨਾਫਾ ਕਮਾਉਣ ਲੱਗੇ ਹੋਏ ਹਨ, ਜਦ ਕਿ ਕਿਸਾਨਾਂ ਦੇ ਹਿੱਸੇ ਦੀ ਪੰਜਾਬ ਦੀ ਖਰੀਦ ਦੀ ਲਿਮਿਟ ਖਤਮ ਹੋਣ ਨਾਲ ਨੁਕਸਾਨ ਹੋਵੇਗਾ।
ਪਤਾ ਲੱਗਾ ਹੈ ਕਿ ਜਿ਼ਲਾ ਫਾਜ਼ਿਲਕਾ ਦੇ ਜਲਾਲਾਬਾਦ ਵਿਚ ਅੱਜ ਕਿਸਾਨਾਂ ਨੇ ਉੱਤਰ ਪ੍ਰਦੇਸ਼ ਤੋਂਆਈ ਬਾਸਮਤੀ ਦੇ 11 ਟਰੱਕ ਟੋਲ ਪਲਾਜ਼ਾ ਉੱਤੇ ਰੋਕੇ ਹਨ। ਸ਼ੈਲਰ ਮਾਲਿਕਾਂ ਦਾ ਕਹਿਣਾ ਹੈ ਕਿ ਪੰਜਾਬ ਵਿਚ ਪਰਮਲ ਦੀ ਸਰਕਾਰੀ ਖ਼ਰੀਦ ਹੈ, ਪਰ ਉਹ ਬਾਸਮਤੀ ਕਿਤੋਂ ਵੀ ਲੈ ਸਕਦੇ ਹਨ। ਅੰਮ੍ਰਿਤਸਰ ਵਿਚ ਵੀ ਕਿਸਾਨਾਂ ਨੇ ਦੂਸਰੇਰਾਜਾਂਤੋਂ ਲਿਆਂਦੇਝੋਨੇ ਦੇ 7 ਟਰੱਕ ਟੋਲ ਪਲਾਜ਼ਿਆਂ ਉੱਤੇ ਰੋਕੇ ਗਏ, ਪਰ ਇਸ ਬਾਰੇ ਹਾਲੇ ਤੱਕ ਕੋਈ ਕੇਸ ਦਰਜ ਨਹੀਂ ਕੀਤਾ ਗਿਆ।
ਇਸ ਦੌਰਾਨ ਪਟਿਆਲਾ ਦੇ ਥਾਣਾ ਜੁਲਕਾ ਦੀ ਪੁਲਿਸ ਨੇ ਪਿੰਡ ਸ਼ੰਕਰਪੁਰ ਦੇ ਅਮਰੀਕ ਸਿੰਘ ਨੂੰ ਝੋਨੇ ਨਾਲ ਲੱਦੇ ਹੋਏ ਟਰੱਕ ਸਮੇਤ ਫੜਿਆ ਹੈ। ਉਸ ਨੇ ਪੰਜਾਬ ਫੂਡ ਐਂਡ ਪੋਲਟਰੀ ਪ੍ਰੋਡਕਟਸ ਕਪੂਰਥਲਾ ਨਾਂ ਦੀ ਫਰਮ ਦੇ ਬਿੱਲ ਅਤੇ ਹੋਰ ਕਾਗਜ਼ ਦਿਖਾਏ, ਪਰ ਜਾਂਚ ਕਰਨ ਤੋਂ ਪਤਾ ਲੱਗਾ ਕਿ ਕਪੂਰਥਲਾ ਵਿਚ ਇਸ ਨਾਂ ਦੀ ਕੋਈ ਫਰਮ ਨਹੀਂ ਹੈ। ਇਸ ਤੋਂ ਪਹਿਲਾਂ ਫ਼ਤਹਿਗੜ੍ਹ ਸਾਹਿਬ ਵਿਚ ਦੋ ਦਿਨ ਪਹਿਲਾਂ ਫੜੇ ਪੰਜ ਟਰੱਕਾਂ ਦੀ ਜਾਂਚ ਵਿੱਚ ਪਤਾ ਲੱਗਾ ਸੀ ਕਿ 138 ਟਨ ਝੋਨਾ ਖੰਨਾ ਦੀਆਂ ਦੋ ਅਤੇ ਅੰਮ੍ਰਿਤਸਰ ਦੇ ਮਾਨਾਂਵਾਲਾ ਦੀਆਂ ਦੋ ਫਰਮਾਂ ਨੇ ਮੰਗਵਾਇਆ ਸੀ। ਇਸ ਝੋਨੇ ਨਾਲ ਲੱਦੇ ਟਰੱਕ ਨਾਲ ਪਟਿਆਲਾ ਪੁਲਿਸ ਨੇ ਸਹਾਰਨਪੁਰ ਦੇ ਪਿੰਡ ਲੋਹਰਗਵਾ ਜੈਤੀਪੁਰ ਦੇ ਸਤਾਨਾ ਸਿੰਘ ਅਤੇ ਪਿੰਡ ਕੁਮਾਡਾਡਾ ਦੇ ਡਰਾਈਵਰ ਗੁਰਸੇਵਕ ਸਿੰਘ ਨੂੰ ਗ੍ਰਿਫ਼ਤਾਰ ਕੀਤਾ ਸੀ। ਪੁਲਿਸ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਹ ਲੋਕ ਉੱਤਰ ਪ੍ਰਦੇਸ਼ ਤੋਂਝੋਨਾ ਸਸਤਾ ਖ਼ਰੀਦ ਕੇ ਆੜ੍ਹਤੀਆਂ ਦੀ ਮਿਲੀਭੁਗਤ ਨਾਲ ਪਟਿਆਲਾ ਦੀ ਦਿੱਤੂਪੁਰ ਮੰਡੀ ਵਿਚ ਵੇਚਣ ਨੂੰ ਲਿਆਏ ਸਨ। ਇਹੋ ਜਿਹੇ ਕੰਮ ਵਿੱਚ ਆੜ੍ਹਤੀ ਅੱਗੋਂ ਕਿਸਾਨ ਦੇ ਨਾਂ ਉੱਤੇ ਫਰਜ਼ੀ ਜੇ-ਫਾਰਮ ਕੱਟ ਦਿੰਦੇ ਹਨ।
ਪਟਿਆਲਾ ਜਿ਼ਲੇ ਦੀ ਥਾਣਾ ਪਸਿਆਣਾ ਦੀ ਪੁਲਿਸ ਨੇ ਚਾਰ ਅਣਪਛਾਤੇ ਲੋਕਾਂ ਅਤੇ ਥਾਣਾ ਸ਼ੰਭੂ ਪੁਲਿਸ ਨੇ ਚਾਰ ਕੇਸਾਂ ਵਿਚ ਪੰਜ ਲੋਕਾਂ ਖਿਲਾਪ ਪਰਚਾ ਦਰਜ ਕੀਤਾ ਹੈ। ਇਨ੍ਹਾਂ ਵਿਚਗੁਰਦੀਪ ਸਿੰਘ ਪਿੰਡ ਦਾਤੇਵਾਲਾ,ਮੋਗਾ, ਕੁਲਜੀਤ ਸਿੰਘਪਿੰਡ ਮਨਾਵਾਂ, ਗੁਰਪ੍ਰੀਤ ਸਿੰਘ ਪਿੰਡ ਬਡਾਲਾ,ਫਿਰੋਜ਼ਪੁਰ, ਮਹਿੰਦਰ ਸਿੰਘ ਪਿੰਡ ਅਮਾਨਤਵਾਲਾ ਤੇ ਤਰਨਤਾਰਨ ਦੇ ਹਰੀਕੇ ਪੱਤਣ ਦਾ ਡਰਾਈਵਰ ਪਰਮਜੀਤ ਸਿੰਘ ਸ਼ਾਮਲ ਹਨ। ਪੁਲਿਸ ਵੱਲੋਂ ਇਨ੍ਹਾਂ ਉੱਤੇ ਧੋਖਾਧੜੀ ਅਤੇ ਅਪਰਾਧਿਕ ਸਾਜ਼ਿਸ਼ ਦਾ ਕੇਸ ਦਰਜ ਕੀਤਾ ਜਾ ਰਿਹਾ ਹੈ।