ਜੋਧਪੁਰ, 18 ਸਤੰਬਰ (ਪੋਸਟ ਬਿਊਰੋ)- ਰਾਜਸਥਾਨ ਦੇ ਉਦੈਪੁਰ ਵਿੱਚ ਲਛਮੀ ਵਿਲਾਸ ਪੈਲੇਸ ਹੋਟਲ ਨੂੰ 2002 ਵਿੱਚ ਕੌਡੀਆਂ ਦੇ ਭਾਅ ਵੇਚ ਕੇ ਕੇਂਦਰ ਸਰਕਾਰ ਨੂੰ 224 ਕਰੋੜ ਰੁਪਏ ਦਾ ਨੁਕਸਾਨ ਪੁਚਾਉਣ ਦੇ ਮਾਮਲੇ ਵਿੱਚ ਸੀ ਬੀ ਆਈ ਦੀ ਵਿਸ਼ੇਸ਼ ਅਦਾਲਤ ਨੇ ਅਟਲ ਬਿਹਾਰੀ ਵਾਜਪਾਈ ਸਰਕਾਰ ਵਿੱਚ ਵਿਨਿਵੇਸ਼ ਮੰਤਰੀ ਰਹੇ ਅਰੁਣ ਸ਼ੋਰੀ ਅਤੇ ਸੈਕਟਰੀ ਪ੍ਰਦੀਪ ਬੈਜਲ ਸਮੇਤ ਪੰਜ ਜਣਿਆਂ ਖਿਲਾਫ ਧੋਖਾਧੜੀ ਅਤੇ ਭ੍ਰਿਸ਼ਟਾਚਾਰ ਦਾ ਕੇਸ ਦਰਜ ਕਰਨ ਦਾ ਹੁਕਮ ਹੋਇਆ ਅਤੇ ਅਦਾਲਤ ਨੇ ਡਿਪਟੀ ਕਮਿਸ਼ਨਰ ਨੂੰ ਹੋਟਲ ਕਬਜ਼ੇ ਵਿੱਚ ਲੈਣ ਦਾ ਹੁਕਮ ਦਿੱਤਾ ਹੈ। ਇਹ ਹੋਟਲ ਭਾਰਤੀ ਸੈਰ ਸਪਾਟਾ ਵਿਕਾਸ ਨਿਗਮ ਦਾ ਸੀ, ਜਿਸ ਦੇ ਵਿਨਿਵੇਸ਼ ਦੇ ਸਬੰਧ ਵਿੱਚ ਅਪਰਾਧਕ ਸਾਜ਼ਿਸ਼ ਰਚ ਕੇ ਦੋਸ਼ੀਆਂ ਨੇ ਇਸ ਨੂੰ ਸਿਰਫ 7.52 ਕਰੋੜ ਰੁਪਏ ਵਿੱਚ ਵੇਚਣ ਦਾ ਫੈਸਲਾ ਕਰ ਦਿੱਤਾ ਸੀ।
ਇਸ ਸੰਬੰਧ ਵਿੱਚ ਕੋਰਟ ਦਾ ਕਹਿਣਾ ਹੈ ਕਿ ਪ੍ਰਦੀਪ ਬੈਜਲ ਨੇ ਆਪਣੇ ਅਹੁਦੇ ਦੀ ਦੁਰਵਰਤੋਂ ਕਰ ਕੇ ਲਾਜਾਰਡ ਇੰਡੀਆ ਪ੍ਰਾਈਵੇਟ ਲਿਮਟਿਡ, ਨਵੀਂ ਦਿੱਲੀ ਦੇ ਓਦੋਂ ਦੇ ਮੈਨੇਜਿੰਗ ਡਾਇਰੈਕਟਰ ਆਸ਼ੀਸ਼ ਗੁਹਾ, ਮੈਸਰਜ਼ ਕਾਂਤੀ ਲਾਲ ਕਰਮਸੇ ਕੰਪਨੀ, ਮੁੰਬਈ ਤੇ ਹੋਟਲ ਕਾਰੋਬਾਰੀ ਲਲਿਤ ਸੂਰੀ ਦੇ ਭਾਰਤ ਹੋਟਲ ਲਿਮਟਿਡ ਨਵੀਂ ਦਿੱਲੀ ਦੇ ਪ੍ਰਵਾਨਤ ਵਫਦ ਅਤੇ ਕੇਂਦਰ ਸਰਕਾਰ ਦੇ ਅਣਪਛਾਤੇ ਅਧਿਕਾਰੀਆਂ ਅਤੇ ਨਿੱਜੀ ਵਿਅਕਤੀਆਂ ਦੇ ਨਾਲ ਮਿਲ ਕੇ ਮੈਸਰਜ਼ ਲਛਮੀ ਵਿਲਾਸ ਪੈਲੇਸ ਹੋਟਲ ਉਦੈਪੁਰ ਦੇ ਵਿਨਿਵੇਸ਼ ਦੇ ਸਬੰਧ ਵਿੱਚ ਅਪਰਾਧਕ ਸਾਜ਼ਿਸ਼ ਰਚੀ ਤੇ ਹੋਟਲ ਨੂੰ ਸਿਰਫ ਸੱਤ ਕਰੋੜ 52 ਲੱਖ ਰੁਪਏ ਵਿੱਚ ਵੇਚਣ ਦਾ ਫੈਸਲਾ ਕਰ ਦਿੱਤਾ ਸੀ। ਜਿਸ ਰੇਟ ਨਾਲ ਹੋਟਲ ਦੀ ਜ਼ਮੀਨ ਦੀ ਕੀਮਤ ਦਾ ਮੁੱਲਾਂਕਣ ਕੀਤਾ ਗਿਆ ਸੀ, ਉਹ ਸਰਕਾਰੀ ਤੌਰ `ਤੇ ਜ਼ਮੀਨ ਦੀ ਕੀਮਤ ਤੋਂ ਬਹੁਤ ਘੱਟ ਸੀ।
ਸੀ ਬੀ ਆਈ ਨੇ ਇਸ ਸਬੰਧ ਵਿੱਚ ਕੇਸ ਤਾਂ ਦਰਜ ਕੀਤਾ, ਜਾਂਚ ਵਿੱਚ ਕੋਈ ਸਬੂਤ ਨਾ ਮਿਲਣ ਦੇ ਆਧਾਰ `ਤੇ ਕੋਰਟ ਵਿੱਚ ਕਲੋਜ਼ਰ ਰਿਪੋਰਟ ਪੇਸ਼ ਕਰ ਦਿੱਤੀ ਸੀ। ਅਦਾਲਤ ਨੇ ਸੀ ਬੀ ਆਈ ਰਿਪੋਰਟ ਨੂੰ ਮੰਨਣ ਤੋਂ ਇਨਕਾਰ ਕਰ ਦਿੱਤਾ ਅਤੇ ਇਸ ਰਿਪੋਰਟ ਵਿੱਚ ਦੋਸ਼ੀਆਂ ਵੱਲੋਂ ਜਾਇਦਾਦ ਦੇ ਮੁੱਲੰਕਣ ਨੂੰ ਘੱਟ ਗਿਣਨ ਦੀ ਗੱਲ ਉੱਤੇ ਨੋਟਿਸ ਲਿਆ। ਇਸ ਦੇ ਬਾਅਦ 13 ਅਗਸਤ 2019 ਨੂੰ ਹੁਕਮ ਪਾਸ ਕਰ ਕੇ ਜਾਂਚ ਲਈ ਇਹ ਕੇਸ ਫਿਰ ਸੀ ਬੀ ਆਈ ਨੂੰ ਸੌਂਪ ਦਿੱਤਾ। ਕੱਲ ਕੋਰਟ ਨੇ ਕਿਹਾ ਹੈ ਕਿ ਸੀ ਬੀ ਆਈ ਦੀ ਦੋਬਾਰਾ ਜਾਂਚ ਵਿੱਚ ਹੋਟਲ ਦੀ ਕੀਮਤ 252 ਕਰੋੜ ਰੁਪਏ ਦੱਸੀ ਗਈ ਹੈ, ਜਿਸ ਨੂੰ 7.52 ਕਰੋੜ ਰੁਪਏ ਵਿੱਚ ਵੇਚਿਆ ਸੀ। ਇਸ ਬਾਰੇ ਅਦਾਲਤ ਨੇ ਸ਼ੋਰੀ, ਬੈਜਲ, ਗੁਹਾ, ਮੈਸਰਜ਼ ਕਾਂਤੀ ਲਾਲ ਕਰਮਸੇ ਐਂਡ ਕੰਪਨੀ ਦੇ ਕਾਂਤੀ ਲਾਲ ਕਰਮਸੇ ਤੇ ਭਾਰਤ ਹੋਟਲ ਦੀ ਨਿਰਦੇਸ਼ਕ ਜਯੋਤਸਨਾ ਸੂਰੀ ਨੂੰ ਦੋਸ਼ੀ ਮੰਨਿਆ ਹੈ। ਲਲਿਤ ਸੂਰੀ ਦੀ ਮੌਤ ਦੇ ਬਾਅਦ ਉਨ੍ਹਾਂ ਦੀ ਪਤਨੀ ਜਯੋਤਨਾ ਸੂਰੀ ਨੇ ਹੋਟਲ ਦਾ ਕੰਮ ਸੰਭਾਲ ਲਿਆ ਸੀ। ਕੋਰਟ ਨੇ ਇਨ੍ਹਾਂ ਦੇ ਖਿਲਾਫ ਫੌਜਦਾਰੀ ਮਾਮਲਾ ਦਰਜ ਕਰ ਕੇ ਸਾਰਿਆਂ ਨੂੰ ਗ੍ਰਿਫਤਾਰੀ ਵਾਰੰਟ ਜਾਰੀ ਕਰਨ ਦੇ ਹੁਕਮ ਦਿੱਤੇ ਹਨ।