ਨਵੀਂ ਦਿੱਲੀ, 17 ਸਤੰਬਰ (ਪੋਸਟ ਬਿਊਰੋ)- ਭਾਰਤੀ ਪਾਰਲੀਮੈਂਟ ਦੀ 865 ਕਰੋੜ ਰੁਪਏ ਦੀ ਲਾਗਤ ਨਾਲ ਬਣਨ ਵਾਲੀ ਨਵੀਂ ਇਮਾਰਤ ਬਣਾਉਣ ਦਾ ਠੇਕਾ ਟਾਟਾ ਕੰਪਨੀ ਨੂੰ ਦੇ ਦਿੱਤਾ ਗਿਆ ਹੈ। ਇੱਕ ਅਧਿਕਾਰੀ ਅਨੁਸਾਰ ਪਾਰਲੀਮੈਂਟ ਭਵਨ ਰਾਜ ਦੇ ਪਲਾਟ ਨੰਬਰ 118 `ਤੇ ਇਮਾਰਤ ਦਾ ਕੰਮ 21 ਮਹੀਨਿਆਂ ਵਿੱਚ ਪੂਰਾ ਹੋਣ ਦੀ ਉਮੀਦ ਹੈ।
ਇਸ ਇਮਾਰਤ ਦਾ ਮਾਸਟਰ ਪਲਾਨ ਪਿਛਲੇ ਸਾਲ ਤਿਆਰ ਕੀਤਾ ਗਿਆ ਸੀ। ਰਾਸ਼ਟਰਪਤੀ ਭਵਨ ਤੋਂ ਇੰਡੀਆ ਗੇਟ ਦੇ ਵਿਚਾਲੇ ਪਾਰਲੀਮੈਂਟ ਦੇ ਦੋਵਾਂ ਸਦਨਾਂ ਲਈ ਵਧੇਰੇ ਮੈਂਬਰਾਂ ਦੀ ਸਮਰਥਾ ਵਾਲੀਆਂ ਅਤੇ ਕੇਂਦਰੀ ਸਕੱਤਰੇਤ ਲਈ 10 ਨਵੀਂਆਂ ਇਮਾਰਤਾਂ ਬਣਾਈਆਂ ਜਾਣਗੀਆਂ। ਰਾਸ਼ਟਰਪਤੀ ਭਵਨ, ਮੌਜੂਦਾ ਪਾਰਲੀਮੈਂਟ ਭਵਨ, ਇੰਡੀਆ ਗੇਟ ਅਤੇ ਨੈਸ਼ਨਲ ਆਰਕਾਈਵਜ਼ ਦੀ ਇਮਾਰਤ ਇੱਕੋ ਜਿਹੀ ਰੱਖੀ ਜਾਵੇਗੀ। ਮਾਸਟਰ ਪਲਾਨ ਤਿਆਰ ਕਰਦੇ ਸਮੇਂ ਕੇਂਦਰੀ ਮੰਤਰੀ ਹਰਦੀਪ ਸਿੰਘ ਪੁਰੀ ਨੇ ਸਪੱਸ਼ਟ ਕਰ ਦਿੱਤਾ ਸੀ ਕਿ ਇਹ ਯੋਜਨਾ ਅੰਤਮ ਨਹੀਂ ਹੈ।