ਟੋਕੀਓ, 13 ਅਗਸਤ (ਪੋਸਟ ਬਿਊਰੋ)- ਜਾਪਾਨ ਸਰਕਾਰ ਤੇ ਹੀਰੋਸ਼ੀਮਾ ਸ਼ਹਿਰ ਨੇ 1945 ਵਿੱਚ ਅਮਰੀਕਾ ਵੱਲੋਂ ਕੀਤੇ ਐਟਮੀ ਬੰਬ ਧਮਾਕੇ ਮਗਰੋਂ ਨੇੜਲੇ ਖੇਤਰ ਵਿੱਚ ਹੋਈ ਰੇਡੀਓ ਐਕਟਿਵ ‘ਕਾਲੀ ਵਰਖਾ’ ਕਾਰਨ ਪ੍ਰਭਾਵਤ ਹੋਏ ਦਰਜਨਾਂ ਲੋਕਾਂ ਨੂੰ ਸਰਟੀਫਾਈ ਕਰਨ ਦੇ ਅਦਾਲਤੀ ਹੁਕਮ ਨੂੰ ਉਲਟਾਉਣ ਦੀ ਅਪੀਲ ਕੀਤੀ ਹੈ।
ਇਹ ਅਪੀਲ ਹੀਰੋਸ਼ੀਮਾ ਦੀ ਜ਼ਿਲਾ ਅਦਾਲਤ ਵੱਲੋਂ ਤੀਹ ਜੁਲਾਈ ਨੂੰ ਪਹਿਲੀ ਵਾਰ ਕਾਲੀ ਵਰਖਾ ਦੇ ਅਜਿਹੇ ਪੀੜਤਾਂ ਨੂੰ ਮਾਨਤਾ ਦੇਣ ਦੇ ਹੁਕਮ ਮਗਰੋਂ ਕੀਤੀ ਗਈ ਹੈ, ਜੋ ਸਰਕਾਰ ਵੱਲੋਂ ਮੈਡੀਕਲ ਲਾਭ ਦੇਣ ਲਈ ਯੋਗ ਪੀੜਤਾਂ ਬਾਰੇ ਫੈਸਲਾ ਲੈਣ ਦੀ ਖੇਤਰੀ ਹੱਦ ਤੋਂ ਬਾਹਰ ਪੈਂਦੇ ਹਨ। ਸਿਹਤ ਮੰਤਰੀ ਕਾਟਸੁਨੋਬੂ ਕਾਟੋ ਨੇ ਕਿਹਾ ਕਿ ਸਰਕਾਰ ਨੇ ਅਪੀਲ ਇਸ ਕਰ ਕੇ ਕੀਤੀ ਹੈ ਕਿ ਜ਼ਿਲਾ ਅਦਾਲਤ ਦਾ ਫੈਸਲਾ ਲੋੜੀਂਦੇ ਵਿਗਿਆਨਕ ਸਬੂਤਾਂ 'ਤੇ ਆਧਾਰਤ ਨਹੀਂ। ਕਾਟੋ ਨੇ ਇਹ ਵੀ ਕਿਹਾ ਕਿ ਸ਼ਹਿਰ ਵਾਸੀਆਂ ਤੇ ਅਧਿਕਾਰੀਆਂ ਦੀ ਬੇਨਤੀ 'ਤੇ ਉਨ੍ਹਾਂ ਦੇ ਵਿਭਾਗ ਵੱਲੋਂ ਹੀਰੋਸ਼ੀਮਾ ਵਿੱਚ ਕਾਲੀ ਵਰਖਾ ਜ਼ੋਨ ਦਾ ਦਾਇਰਾ ਵਧਾਉਣ 'ਤੇ ਵਿਚਾਰ ਬਾਰੇ ਆਪਣੇ ਤੌਰ 'ਤੇ ਵਿਗਿਆਨਕ ਢੰਗ ਨਾਲ ਜਾਂਚ ਹੋਵੇਗੀ। ਜ਼ਿਲਾ ਅਦਾਲਤ ਨੇ ਕਿਹਾ ਸੀ ਕਿ ਕਾਲੀ ਵਰਖਾ ਜ਼ੋਨ ਤੋਂ ਬਾਹਰ ਦੇ ਖੇਤਰ ਦੇ 84 ਲੋਕਾਂ ਨੂੰ ਰੇਡੀਏਸ਼ਨ ਕਾਰਨ ਹੋਣ ਵਾਲੀਆਂ ਬਿਮਾਰੀਆਂ ਹੋਈਆਂ ਹਨ, ਜਿਸ ਕਰ ਕੇ ਉਨ੍ਹਾਂ ਨੂੰ ਐਟਮੀ ਬੰਬ ਧਮਾਕੇ ਦੇ ਪੀੜਤਾਂ ਵਜੋਂ ਸਰਟੀਫਾਈ ਕੀਤਾ ਜਾਵੇ।