ਸਾਲ 2012 ਵਿੱਚ ਫਿਲਮ ‘ਸਟੂਡੈਂਟ ਆਫ ਦਿ ਯੀਅਰ’ ਨਾਲ ਡੈਬਿਊ ਕਰਨ ਵਾਲੇ ਵਰੁਣ ਧਵਨ ਨੇ ਸਾਲ 2010 ਵਿੱਚ ਸ਼ਾਹਰੁਖ ਖਾਨ ਦੇ ਲੀਡ ਰੋਲ ਵਾਲੀ ਫਿਲਮ ‘ਮਾਈ ਨੇਮ ਇਜ਼ ਖਾਨ’ ਵਿੱਚ ਅਸਿਸਟੈਂਟ ਡਾਇਰੈਕਟਰ ਦੇ ਤੌਰ 'ਤੇ ਕੰਮ ਕੀਤਾ ਸੀ। ਪਹਿਲੀ ਫਿਲਮ ਨਾਲ ਹੀ ਵਰੁਣ ਨੇ ਸਿੱਧ ਕਰ ਦਿੱਤਾ ਕਿ ਉਹ ਇਸ ਖੇਤਰ ਵਿੱਚ ਲੰਬੀ ਪਾਰੀ ਖੇਡਣ ਆਆ ਹੈ। ਕਈ ਫਿਲਮਾਂ 'ਚ ਕੰਮ ਕਰ ਚੁੱਕੇ ਵਰੁਣ ਨੇ ਆਪਣੀ ਐਕਟਿੰਗ ਦੇ ਦਮ ਉੱਤੇ ਦਰਸ਼ਕਾਂ ਦੇ ਦਿਲਾਂ 'ਚ ਆਪਣੇ ਲਈ ਵੱਖਰੀ ਥਾਂ ਬਣਾਈ ਹੈ। ਆਪਣੇ ਕਿਰਦਾਰਾਂ ਨੂੰ ਸਹੀ ਢੰਗ ਨਾਲ ਨਿਭਾਉਣ ਲਈ ਉਹ ਹਰ ਤਕਲੀਫ ਚੁੱਕਣ ਨੂੰ ਤਿਆਰ ਰਹਿੰਦਾ ਹੈ। ਉਸ ਨੇ ਕਦਮ-ਕਦਮ 'ਤੇ ਖੁਦ ਨੂੰ ਸਿੱਧ ਕੀਤਾ ਹੈ। ਪਹਿਲਾਂ ਉਹ ਐਕਟਰ ਨਹੀਂ ਸਗੋਂ ਰੈਸਲਰ ਬਣਨਾ ਚਾਹੰੁਦਾ ਸੀ, ਪਰ ਬਦਲਦੇ ਸਮੇਂ ਨਾਲ ਉਸ ਨੇ ਆਪਣੀ ਪਸੰਦ ਨੂੰ ਬਦਲਿਆਅਅਤੇ ਐਕਟਿੰਗ ਦੀ ਦੁਨੀਆ ਵਿੱਚ ਆ ਗਿਆ। ਉਸ ਦੀਆਂ ਅਗਲੀਆਂ ਫਿਲਮਾਂ ਵਿੱਚ ‘ਕੁਲੀ ਨੰਬਰ 1’ ਵੀ ਸ਼ਾਮਲ ਹੈ, ਜਿਸ ਵਿੱਚ ਉਹ ਸਾਰਾ ਅਲੀ ਖਾਨ ਨਾਲ ਨਜ਼ਰ ਆਵੇਗਾ। ਪੇਸ਼ ਹਨ ਉਸ ਨਾਲ ਗੱਲਬਾਤ ਦੇ ਕੁਝ ਅੰਸ਼ :
* ਆਪਣੀ ਅਗਲੀ ਫਿਲਮ ‘ਕੁਲੀ ਨੰਬਰ 1’ ਵਿੱਚ ਤੁਸੀਂ ਸਾਰਾ ਅਲੀ ਖਾਨ ਨਾਲ ਨਜ਼ਰ ਆਉਣ ਵਾਲੇ ਹੋ। ਕਿਹੋ ਜਿਹਾ ਲੱਗਾ ਉਸ ਨਾਲ ਐਕਟਿੰਗ ਕਰ ਕੇ?
- ਸਾਰਾ ਇੱਕ ਬਿਹਤਰੀਨ ਸਹਿ-ਕਲਾਕਾਰ ਹੈ। ਉਹ ਪੂਰੀ ਤਰ੍ਹਾਂ ਪੇਸ਼ੇਵਰ ਅਭਿਨੇਤਰੀ ਹੈ ਅਤੇ ਉਹ ਅਸਲ ਵਿੱਚ ਸਖਤ ਮਿਹਨਤ ਕਰਦੀ ਹੈ। ਮੈਨੂੰ ਉਹ ਲੋਕ ਕਾਫੀ ਪਸੰਦ ਹਨ, ਜੋ ਸਖਤ ਮਿਹਨਤ ਕਰਦੇ ਹਨ ਅਤੇ ਉਹ ਉਨ੍ਹਾਂ ਮਿਹਨਤੀ ਲੋਕਾਂ 'ਚੋਂ ਇੱਕ ਹੈ, ਜਿਨ੍ਹਾਂ ਨੂੰ ਮੈਂ ਅੱਜ ਤੱਕ ਮਿਲਿਆ ਹਾਂ। ਅਸੀਂ ਜਦੋਂ ਵੀ ਇਕੱਠੇ ਹੁੰਦੇ ਹਾਂ, ਪਾਗਲ ਹੋ ਜਾਂਦੇ ਹਾਂ।
* ਅੱਜ ਤੱਕ ਆਪਣੇ ਛੋਟੇ ਜਿਹੇ ਕਰੀਅਰ 'ਚ ਹੀ ਤੁਸੀਂ ਕਾਮੇਡੀ, ਐਕਸ਼ਨ, ਸੀਰੀਅਸ ਹਰ ਤਰ੍ਹਾਂ ਦੇ ਰੋਲ ਕਰ ਚੁੱਕੇ ਹੋ। ਸਭ ਤੋਂ ਜ਼ਿਆਦਾ ਆਨੰਦ ਤੁਹਾਨੂੰ ਕਿਸ ਤਰ੍ਹਾਂ ਦੇ ਰੋਲ ਨਿਭਾਉਣ ਵਿੱਚ ਆਇਆ?
- ਮੈਂ ਐਕਟਰ ਹਾਂ ਅਤੇ ਇਸ ਪੱਖ ਤੋਂ ਮੈਂ ਗੋਵਿੰਦਾ ਵਾਂਗ ਵਰਸੇਟਾਈਲ ਐਕਟਰ ਬਣਨਾ ਚਾਹੁੰਦਾ ਹਾਂ। ਮੈਂ ਹਰ ਤਰ੍ਹਾਂ ਦੇ ਕਿਰਦਾਰ ਨਿਭਾਉਣਾ ਚਾਹੁੰਦਾ ਹਾਂ। ਅਜੇ ਮੇਰੀ ਸ਼ੁਰੂਆਤ ਅਜ ਬਹੁਤ ਸਾਰੇ ਚੰਗੇ ਕਿਰਦਾਰ ਨਿਭਾਉਣੇ ਬਾਕੀ ਹਨ।
* ਤੁਸੀਂ ਫਿਲਮੀ ਬੈਕਗਰਾਊਂਡ ਤੋਂ ਹੋ। ਇਹ ਤੁਹਾਡੇ ਲਈ ਚੰਗੀ ਗੱਲ ਹੈ ਜਾਂ ਬੁਰੀ?
-ਇਹ ਕਹਿਣਾ ਮੁਸ਼ਕਲ ਹੈ ਕਿਉਂਕਿ ਫਿਲਮੀ ਪਿਛੋਕੜ ਹੋਣ ਨਾਲ ਚੀਜ਼ਾਂ ਆਸਾਨ ਹੋ ਜਾਂਦੀਆਂ ਹਨ, ਉਥੇ ਦੂਜੇ ਪਾਸੇ ਜੇ ਤੁਹਾਡਾ ਕੰਮ ਚੰਗਾ ਨਾ ਹੋਵੇ ਤਾਂ ਤੁਹਾਡੇ ਫਲਾਪ ਹੋਣ 'ਚ ਵੀ ਜ਼ਿਆਦਾ ਸਮਾਂ ਨਹੀਂ ਲੱਗਦਾ।
* ਫਿਲਮਾਂ ਦੀ ਅਸਫਲਤਾ ਤੁਹਾਡੇ 'ਤੇ ਕਿੰਨਾ ਅਸਰ ਪਾਉਂਦੀ ਹੈ?
-ਫਿਲਮਾਂ ਦੀ ਅਸਫਲਤਾ ਮੈਨੂੰ ਦੁੱਖ ਪੁਚਾਉਂਦੀ ਹੈ ਕਿਉਂਕਿ ਅਸੀਂ ਫਿਲਮ 'ਤੇ ਬਹੁਤ ਮਿਹਨਤ ਕਰਦੇ ਹਾਂ। ਅਜਿਹੇ ਵਿੱਚ ਜਦੋਂ ਫਿਲਮ ਫਲਾਪ ਹੋ ਜਾਂਦੀ ਹੈ ਤਾਂ ਬਹੁਤ ਦੁੱਖ ਹੁੰਦਾ ਹੈ, ਪਰ ਕਹਿੰਦੇ ਹਨ ਕਿ ‘ਸ਼ੋਅ ਮਸਟ ਗੋ ਆਨ’। ਮੈਂ ਆਪਣੀਆਂ ਦੂਜੀਆਂ ਫਿਲਮਾਂ 'ਤੇ ਧਿਆਨ ਦੇਣਾ ਸ਼ੁਰੂ ਕਰ ਦਿੰਦਾ ਹਾਂ।
* ਫਿਲਮ ਨਗਰੀ ਵਿੱਚ ਕੰਪੀਟੀਸ਼ਨ ਬਾਰੇ ਤੁਹਾਡੀ ਕੀ ਰਾਇ ਹੈ?
- ਫਿਲਮ ਨਗਰੀ ਵਿੱਚ ਇੰਨਾ ਕੰਮ ਹੈ ਕਿ ਹਰ ਕੋਈ ਬਿਜ਼ੀ ਹੈ। ਸ਼ਰਤ ਇੰਨੀ ਹੈ ਕਿ ਕੰਮ ਦਮਦਾਰ ਹੋਣਾ ਚਾਹੀਦਾ ਹੈ। ਮੇਰਾ ਕੰਪੀਟੀਸ਼ਨ ਕਿਸੇ ਨਾਲ ਨਹੀਂ ਸਗੋਂ ਆਪਣੇ ਆਪ ਨਾਲ ਹੈ। ਮੈਨੂੰ ਲਗਾਤਾਰ ਬਿਹਤਰ ਅਤੇ ਬਿਹਤਰ ਕੰਮ ਕਰਨਾ ਹੈ।
* ਆਲੋਚਨਾ ਨੂੰ ਕਿਵੇਂ ਲੈਂਦੇ ਹੋ?
-ਆਲੋਚਨਾ ਦੋ ਤਰ੍ਹਾਂ ਦੀ ਹੁੰਦੀ ਹੈ, ਇੱਕ ਉਹ ਜਿਸ ਵਿੱਚ ਜਾਣਬੁੱਝ ਕੇ ਤੁਹਾਨੂੰ ਹੇਠਾਂ ਦਿਖਾਉਣ ਦੀ ਕੋਸ਼ਿਸ਼ ਕੀਤੀ ਜਾਂਦੀ ਹੈ ਜਿਸ ਨੂੰ ਮੈਂ ਚੰਗੀ ਤਰ੍ਹਾਂ ਸਮਝਦਾ ਹਾਂ। ਦੂਜੀ ਹੁੰਦੀ ਹੈ ਜੋ ਸੱਚਮੁੱਚ ਤੁਹਾਨੂੰ ਸੁਧਾਰਨਾ ਚਾਹੁੰਦੇ ਹਨ। ਅਜਿਹੀ ਆਲੋਚਨਾ ਨੂੰ ਮੈਂ ਬਹੁਤ ਖੁੱਲ੍ਹ ਕੇ ਸਵੀਕਾਰ ਕਰਦਾ ਹਾਂ, ਜਿਵੇਂ ਮੇਰੇ ਦੋਸਤ, ਮੇਰੇ ਘਰਵਾਲੇ ਮੇਰੀ ਆਲੋਚਨਾ ਕਰਦੇ ਹਨ ਤਾਂ ਮੈਂ ਬੁਰਾ ਨਹੀਂ ਮੰਨਦਾ ਅਤੇ ਆਪਣੇ 'ਚ ਸੁਧਾਰ ਕਰਨ ਦੀ ਕੋਸ਼ਿਸ਼ ਕਰਦਾ ਹਾਂ ਤਾਂ ਕਿ ਇਨ੍ਹਾਂ ਦੀ ਨਜ਼ਰ 'ਚ ਖਰਾ ਉਤਰ ਸਕਾਂ।