ਨਵੀਂ ਦਿੱਲੀ, 11 ਅਗਸਤ (ਪੋਸਟ ਬਿਊਰੋ)- ਯੋਗੀ ਰਾਮਦੇਵ ਦੀ ਕੰਪਨੀ ‘ਪਤੰਜਲੀ' ਅੱਗੋਂ ਇੰਡੀਅਨ ਪ੍ਰੀਮੀਅਰ ਲੀਗ (ਆਈ ਪੀ ਐਲ) 2020 ਵਿੱਚ ਚੀਨੀ ਕੰਪਨੀ ਵੀਵੋ ਦੀ ਥਾਂ ਲੈਣਾ ਚਾਹੁੰਦੀ ਅਤੇ ਆਈ ਪੀ ਐਲ 2020 ਦੇ ਟਾਈਟਲ ਸਪਾਂਸਰ ਅਧਿਕਾਰ ਖਰੀਦਣ ਦੀ ਦੌੜ ਵਿੱਚ ਸ਼ਾਮਲ ਹੋ ਗਈ ਹੈ। ਕੰਪਨੀ ਨੇ ਇਸ ਦੀ ਪੁਸ਼ਟੀ ਕੀਤੀ ਹੈ, ਜਿੱਥੇ ਉਸ ਨੂੰ ਐਮੇਜੋਨ, ਟਾਟਾ ਅਤੇ ਰਿਲਾਇੰਸ ਇੰਡਸਟ੍ਰੀਜ਼ ਲਿਮ ਵਰਗੀਆਂ ਕੰਪਨੀਆਂ ਨਾਲ ਬੋਲੀ ਲਾਉਣੀ ਪੇਵਗੀ।
ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (ਬੀ ਸੀ ਸੀ ਆਈ) ਨੇ ਆਈ ਪੀ ਐਲ 2020 ਦੇ ਟਾਈਟਲ ਸਪਾਂਸਰ ਅਧਿਕਾਰ ਲਈ 10 ਅਗਸਤ ਤੋਂ ਐਕਸਪ੍ਰੇਸ਼ਨ ਆਫ ਇੰਟਰੈਸਟ (ਈ ਓ ਆਈ) ਮੰਗੇ ਹਨ। ਇੱਛੁਕ ਪਾਰਟੀਆਂ ਬੋਲੀ ਲਾਉਣ ਲਈ 14 ਅਗਸਤ ਤੱਕ ਅਪਲਾਈ ਕਰ ਸਕਦੀਆਂ ਹਨ। ਚੀਨੀ ਮੋਬਾਈਲ ਫੋਨ ਕੰਪਨੀ ਵੀਵੋ ਨੇ ਆਈ ਪੀ ਐਲ 2020 ਲਈ ਉਸਦੀ ਟਾਈਟਲ ਸਪਾਂਸਰਸ਼ਿਪ ਛੱਡ ਦਿੱਤੀ ਹੈ। ਬੀ ਸੀ ਸੀ ਆਈ ਨੇ ਅੱਠ ਅਗਸਤ ਨੂੰ ਇਸ ਉਤੇ ਮੋਹਰ ਲਾ ਦਿੱਤੀ ਸੀ। ਇਸ ਲਈ ਬੀ ਸੀ ਸੀ ਆਈ ਆਈ ਪੀ ਐਲ 2020 ਦੇ ਟਾਈਟਲ ਸਪਾਂਸਰ ਲਈ ਨਵੇਂ ਸਪਾਂਸਰ ਦੀ ਭਾਲ ਵਿੱਚ ਹੈ ਅਤੇ ਜੀਓ, ਐਮੇਜ਼ੋਨ, ਟਾਟਾ ਗਰੁੱਪ, ਡ੍ਰੀਮ-11, ਅਡਾਨੀ ਗਰੁੱਪ ਤੇ ਐਜੂਕੇਸ਼ਨ ਸਮੇਤ ਕਈ ਨਾਂ ਆਈ ਪੀ ਐਲ ਸਪਾਂਸਰ ਅਧਿਕਾਰ ਹਾਸਲ ਕਰਨ ਦੇ ਸੰਭਾਵਿਤ ਉਮੀਦਵਾਰਾਂ ਦੇ ਤੌਰ 'ਤੇ ਸਾਹਮਣੇ ਆ ਰਹੇ ਹਨ।
ਵਰਨਣ ਯੋਗ ਹੈ ਕਿ ਵੀਵੋ ਟਾਈਟਲ ਸਪਾਂਸਰ ਲਈ ਹਰ ਸਾਲ ਬੀ ਸੀ ਸੀ ਆਈ ਨੂੰ 440 ਕਰੋੜ ਰੁਪਏ ਦੇਂਦੀ ਸੀ। ਕੋਰੋਨਾ ਵਾਇਰਸ ਦੇ ਕਾਰਨ ਇਸ ਸਮੇਂ ਬਾਜ਼ਾਰ ਦੀ ਹਾਲਤ ਬਹੁਤ ਚੰਗੀ ਨਹੀਂ, ਇਸ ਲਈ ਬੋਰਡ ਵੀ ਸਮਝਦਾ ਹੈ ਕਿ ਇੱਕ ਸਾਲ ਲਈ ਕੋਈ ਨਵੀਂ ਕੰਪਨੀ ਸ਼ਾਇਦ ਹੀ ਵੀਵੋ ਜਿੰਨਾ ਪੈਸਾ ਦੇ ਸਕੇ। ਸੂਤਰਾਂ ਮੁਤਾਬਕ ਬੋਰਡ ਨੂੰ 180-200 ਕਰੋੜ ਰੁਪਏ ਦੇ ਵਿਚਾਲੇ ਡੀਲ ਫਾਈਨਲ ਹੋਣ ਦੀ ਉਮੀਦ ਹੈ। ਬਾਜ਼ਾਰ ਦੇ ਜਾਣਕਾਰਾਂ ਦਾ ਮੰਨਣਾ ਹੈ ਕਿ ਚੀਨੀ ਕੰਪਨੀ ਦੇ ਬਦਲਾਂ ਦੇ ਤੌਰ 'ਤੇ ਇੱਕ ਰਾਸ਼ਟਰੀ ਬ੍ਰਾਂਡ ਦੇ ਤੌਰ 'ਤੇ ਪਤੰਜਲੀ ਦਾਅਵਾ ਬਹੁਤ ਮਜ਼ਬੂਤ ਹੈ। ਉਥੇ ਹੀ ਉਸਦਾ ਇਹ ਵੀ ਕਹਿਣਾ ਹੈ ਕਿ ਉਸ ਵਿੱਚ (ਪਤੰਜਲੀ) ਇੱਕ ਮਲਟੀਨੈਸ਼ਨਲ ਬ੍ਰਾਂਡ ਦੇ ਤੌਰ 'ਤੇ ਸਟਾਰ ਪਾਵਰ ਦੀ ਕਮੀ ਹੈ।