ਬੀਜਿੰਗ, 11 ਅਗਸਤ (ਪੋਸਟ ਬਿਊਰੋ)- ਲੋਕਤੰਤਰ ਦੀ ਹਮਾਇਤ ਕਰਨ ਵਾਲੇ 11 ਅਮਰੀਕੀ ਨੇਤਾਵਾਂ ਤੇ ਸੰਗਠਨਾਂ ਦੇ ਮੁਖੀਆਂ ਦੇ ਖਿਲਾਫ ਚੀਨ ਸਰਕਾਰ ਨੇ ਪਾਬੰਦੀ ਲਾਉਣ ਦਾ ਐਲਾਨ ਕੀਤਾ ਹੈ। ਇਨ੍ਹਾਂ ਵਿੱਚ ਸੈਨੇਟਰ ਮਾਰਕੋ ਰੂਬੀਓ ਅਤੇ ਟੇਡ ਕਰੂਜ ਵੀ ਸ਼ਾਮਲ ਹਨ। ਉਂਜ ਪਾਬੰਦੀ ਦੇ ਬਾਰੇ ਇਹ ਨਹੀਂ ਦੱਸਿਆ ਗਿਆ ਹੈ ਕਿ ਕਿੱਦਾਂ ਦੀ ਹੋਵੇਗੀ।
ਚੀਨ ਦੇ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਝਾਓ ਲਿਜੀਆਨ ਨੇ ਕੱਲ੍ਹ ਕਿਹਾ ਕਿ ਇਨ੍ਹਾਂ 11 ਨੇਤਾਵਾਂ ਅਤੇ ਸੰਗਠਨਾਂ ਦੇ ਮੁਖੀਆਂ ਨੇ ਹਾਂਗਕਾਂਗ ਨਾਲ ਜੁੜੇ ਮੁੱਦਿਆਂ ਉੱਤੇ ਗਲਤ ਗਤੀਵਿਧੀਆਂ ਕੀਤੀਆਂ ਹਨ। ਵਰਣਨ ਯੋਗ ਹਨ ਹੈ ਕਿ ਚੀਨ ਨੇ ਪਿਛਲੇ ਮਹੀਨੇ ਅੱਧੀ ਖੁਦਮੁਖਤਾਰੀ ਵਾਲੇ ਚੀਨੀ ਸ਼ਹਿਰ ਹਾਂਗਕਾਂਗ ਵਿੱਚ ਆਪਣਾ ਕੌਮੀ ਸੁਰੱਖਿਆ ਕਾਨੂੰਨ ਥੋਪਣ ਪਿੱਛੋਂ ਵਿਰੋਧ ਦੀ ਆਵਾਜ਼ ਦਬਾਉਣ ਦੇ ਲਈ ਕਾਰਵਾਈ ਕੀਤੀ ਸੀ। ਚੀਨ ਦੇ ਵਿਦੇਸ਼ ਮੰਤਰਾਲੇ ਨੇ ਜਿੰਨੇ ਅਮਰੀਕੀ ਨੇਤਾਵਾਂ ਤੇ ਸੰਗਠਨਾਂ ਦੇ ਮੁਖੀਆਂ 'ਤੇ ਪਾਬੰਦੀ ਲਾਈ ਹੈ, ਉਨ੍ਹਾਂ ਦੀ ਗਿਣਤੀ ਹਾਂਗਕਾਂਗ ਅਤੇ ਚੀਨ ਦੇ ਉਨ੍ਹਾਂ ਅਧਿਕਾਰੀਆਂ ਦੇ ਬਰਾਬਰ ਹੈ, ਜਿਨ੍ਹਾਂ ਉੱਤੇ ਅਮਰੀਕਾ ਨੇ ਪਿਛਲੇ ਹਫਤੇ ਪਾਬੰਦੀ ਲਾਈ ਸੀ। ਚੀਨ ਦੇ ਵਿਦੇਸ਼ ਮੰਤਰਾਲੇ ਨੇ ਪਾਬੰਦੀ ਸ਼ੁਦਾ ਅਮਰੀਕੀ ਨੇਤਾਵਾਂ ਦੇ ਨਾਂਅ ਸੈਨੇਟਰ ਜੋਸ਼ ਹਾਵਲੇ ਅਤੇ ਟਾਮ ਕਾਟਨ ਅਤੇ ਹਾਊਸ ਆਫ ਰਿਪ੍ਰੈਜੈਂਟੇਟਿਵ ਦੇ ਮੈਂਬਰ ਕ੍ਰਿਸ ਸਮਿਥ ਦੱਸੇ ਹਨ। ਇਸ ਦੇ ਇਲਾਵਾ ਨੈਸ਼ਨਲ ਇੰਡੋਵਮੈਂਟ ਫਾਰ ਡੈਮੋਕ੍ਰੇਸੀ ਅਤੇ ਫਰੀਡਮ ਹਾਊਸ ਸਮੇਤ ਕਈ ਸੰਗਠਨਾਂ ਦੇ ਮੁਖੀਆਂ ਦੇ ਨਾਂਅ ਵੀ ਪਾਬੰਦੀ ਲੱਗੀ ਸੂਚੀ ਵਿੱਚ ਸ਼ਾਮਲ ਕੀਤੇ ਗਏ ਹਨ।