ਜਿਰਾਫ ਪਾਰਕ ਵਿੱਚ ਅਣਪਛਾਤੇ ਬੰਦੂਕਧਾਰੀ ਵੱਲੋਂ
6 ਫਰੈਂਚ ਵਰਕਰਜ਼ ਤੇ 2 ਗਾਈਡਜ਼ ਦਾ ਕਤਲ

ਨਾਇਮੇ, ਨਾਈਜੇਅਰ, 9 ਅਗਸਤ (ਪੋਸਟ ਬਿਊਰੋ) : ਨਾਈਜੇਅਰ ਦੀ ਰਾਜਧਾਨੀ ਦੇ ਪੂਰਬ ਵਿੱਚ ਵਾਈਲਡਲਾਈਫ ਪਾਰਕ ਦਾ ਦੌਰਾ ਕਰਨ ਗਏ ਛੇ ਫਰੈਂਚ ਏਡ ਵਰਕਰਜ਼ ਤੇ ਦੋ ਨਾਈਜੀਰੀਅਨ ਗਾਈਡਜ਼ ਨੂੰ ਇੱਕ ਅਣਪਛਾਤੇ ਬੰਦੂਕਧਾਰੀ ਨੇ ਮੌਤ ਦੇ ਘਾਟ ਉਤਾਰ ਦਿੱਤਾ| ਇਹ ਜਾਣਕਾਰੀ ਦੋਵਾਂ ਦੇਸ਼ਾਂ ਦੇ ਅਧਿਕਾਰੀਆਂ ਨੇ ਦਿੱਤੀ|
ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੂਅਲ ਮੈਕਰੌਨ ਨੇ ਮ੍ਰਿਤਕਾਂ ਦੇ ਪਰਿਵਾਰਾਂ ਨਾਲ ਦੁਖ ਦਾ ਪ੍ਰਗਟਾਵਾ ਕੀਤਾ| ਮੈਕਰੌਨ ਨੇ ਨਾਈਜੇਅਰ ਦੇ ਰਾਸ਼ਟਰਪਤੀ ਮਾਹਾਮਦੋਊ ਇਸੌਫੂਅ ਨਾਲ ਫੋਨ ਉੱਤੇ ਗੱਲ ਕੀਤੀ ਤੇ ਦੋਵਾਂ ਆਗੂਆਂ ਨੇ ਇਸ ਗੱਲ ਉਤੇ ਸਹਿਮਤੀ ਪ੍ਰਗਟਾਈ ਕਿ ਇਸ ਘਾਤਕ ਹਮਲੇ ਦੀ ਜਾਂਚ ਲਈ ਹਰ ਸਾਧਨ ਦੀ ਵਰਤੋਂ ਕੀਤੀ ਜਾਵੇਗੀ| ਮੈਕਰੌਨ ਤੇ ਇਸੌਫੂਅ ਨੇ ਅਫਰੀਕਾ ਦੇ ਸਾਹੇਲ ਰੀਜਨ ਵਿੱਚ ਅੱਤਵਾਦੀ ਜਥੇਬੰਦੀਆਂ ਖਿਲਾਫ ਆਪਣੀ ਜੰਗ ਜਾਰੀ ਰੱਖਣ ਦਾ ਤਹੱਈਆ ਵੀ ਪ੍ਰਗਟਾਇਆ|
ਇਹ ਹਮਲਾ ਕੂਅਰੇ ਵਿਖੇ ਹੋਇਆ, ਜਿੱਥੇ ਨਾਈਜੇਅਰ ਵਿੱਚ ਜਿਰਾਫ ਦੀਆਂ ਰੱਖਾਂ ਹਨ| ਇਹ ਜਾਣਕਾਰੀ ਨਾਈਜੇਅਰ ਦੇ ਗ੍ਰਹਿ ਮੰਤਰੀ ਦੇ ਸਲਾਹਕਾਰ ਓਮਾਰੋ ਮੂਸਾ ਨੇ ਦਿੱਤੀ| ਇਹ ਇਲਾਕਾ ਨੈਸ਼ਨਲ ਪਾਰਕ ਦਾ ਹਿੱਸਾ ਹੈ ਜਿੱਥੇ ਸੰਘਣੀ ਬਨਸਪਤੀ ਹੈ ਤੇ ਲੰਮੇ ਲੰਮੇ ਰੁੱਖ ਹਨ| ਇਹ ਥਾਂ ਰਾਜਧਾਨੀ ਤੋਂ 70 ਕਿਲੋਮੀਟਰ ਦੱਖਣਪੂਰਬ ਵੱਲ ਸਥਿਤ ਹੈ|
ਇਹ ਪਾਰਕ ਤਿਲਾਬੇੜੀ ਰੀਜਨ ਵਿੱਚ ਹੈ, ਜਿੱਥੇ ਇਸਲਾਮਿਕ ਸਟੇਟ ਨਾਲ ਸਬੰਧਤ ਜੇਹਾਦੀਆਂ ਨੇ 2017 ਵਿੱਚ ਚਾਰ ਅਮਰੀਕੀ ਸੈਨਿਕਾਂ ਤੇ ਪੰਜ ਨਾਈਜੀਰੀਆਈਆਂ ਨੂੰ ਮਾਰ ਮੁਕਾਇਆ ਸੀ|