ਸਾਨ ਫਰਾਂਸਿਸਕੋ, 9 ਅਗਸਤ (ਪੋਸਟ ਬਿਊਰੋ)- ਤਿੰਨ ਮੈਕਸੀਕਨ ਮੂਲ ਦੇ ਬੱਚਿਆਂ ਨੂੰ ਬਚਾਉਂਦੇ ਹੋਏ ਇੱਕ ਪੰਜਾਬੀ ਨੌਜਵਾਨ ਦੀ ਦਰਿਆ 'ਚ ਡੁੱਬਣ ਕਾਰਨ ਮੌਤ ਹੋ ਗਈ ਹੈ।
ਮਿਲੀ ਸੂਚਨਾ ਅਨੁਸਾਰ ਰੀਡਲੇ ਬੀਚ 'ਤੇ ਕੱਲ੍ਹ ਸ਼ਾਮ ਕਿੰਗਸ ਦਰਿਆ 'ਚ ਤਿੰਨ ਬੱਚੇ ਵਹਿ ਗਏ ਤਾਂ ਉਸ ਵਕਤ ਇੱਕ ਬਹਾਦਰ ਸਿੱਖ ਯਾਤਰੀ ਨੇ ਬੱਚਿਆਂ ਨੂੰ ਤੇਜ਼ੀ ਨਾਲ ਬਚਾਉਣ ਦੀ ਕੋਸ਼ਿਸ਼ ਕਰਦਿਆਂ ਦਰਿਆ 'ਚ ਛਾਲ ਮਾਰ ਦਿੱਤੀ। ਉਸ ਨੇ ਦੋ ਬੱਚਿਆਂ ਨੂੰ ਬਚਾ ਲਿਆ ਪਰ ਤੀਸਰੇ ਨੂੰ ਬਚਾਉਂਦੇ ਹੋਏ ਉਹ ਆਪ ਡੁੱਬ ਗਿਆ। ਮ੍ਰਿਤਕ ਪੰਜਾਬੀ ਨੌਜਵਾਨ ਦੀ ਪਛਾਣ ਫਰਿਜਨੋ ਦੇ ਮਨਜੀਤ ਸਿੰਘ (29) ਵਜੋਂ ਹੋਈ ਹੈ। ਮਨਜੀਤ ਸਿੰਘ ਦੋ ਸਾਲ ਪਹਿਲਾਂ ਹੀ ਭਾਰਤ ਤੋਂ ਅਮਰੀਕਾ ਆਇਆ ਸੀ ਅਤੇ ਉਸ ਨੇ ਅਜੇ ਕੱਲ੍ਹ ਹੀ ਟਰੱਕ ਡਰਾਈਵਿੰਗ ਸਕੂਲ ਸ਼ੁਰੂ ਕੀਤਾ ਸੀ।ਟਰੇਨਿੰਗ ਕਲਾਸ ਲੈਣ ਤੋਂ ਬਾਅਦ ਉਹ ਤਰੋਤਾਜ਼ਾ ਹੋਣ ਲਈ ਆਪਣੇ ਇੱਕ ਰਿਸ਼ਤੇਦਾਰ ਨਾਲ ਜੈਟ ਸਕੀਜ਼ 'ਤੇ ਸਵਾਰ ਹੋਣ ਲਈ ਕਿੰਗਸ ਦਰਿਆ ਵੱਲ ਚਲਾ ਗਿਆ ਪਰ ਇੱਥੇ ਪਹੁੰਚਣ 'ਤੇ ਉਸ ਨੇ ਜਦੋਂ ਹੰਗਾਮਾ ਹੁੰਦਾ ਦੇਖਿਆ ਕਿ ਲੋਕ ਬੱਚਿਆਂ ਨੂੰ ਡੁੱਬਦੇ ਹੋਏ ਦੇਖ ਰਹੇ ਹਨ ਤਾਂ ਉਸ ਨੇ ਦਰਿਆ 'ਚ ਛਾਲ ਮਾਰ ਦਿੱਤੀ। ਰੀਡਲੇ ਪੁਲਸ ਕਮਾਂਡਰ ਮਾਰਕ ਐਡੀਗਰ ਨੇ ਕਿਹਾ ਕਿ ਉਸ ਬਹਾਦਰ ਨੌਜਵਾਨ ਨੇ ਬੱਚਿਆਂ ਨੂੰ ਬਚਾਉਣ ਦੀ ਕੋਸ਼ਿਸ਼ ਕਰਦਿਆਂ ਆਪਣੀ ਜਾਨ ਦੀ ਪ੍ਰਵਾਹ ਨਹੀਂ ਕੀਤੀ, ਜਿਸ ਕਾਰਨ ਉਹ ਇਸ ਦੁਨੀਆ ਤੋਂ ਚਲਾ ਗਿਆ। ਮਨਜੀਤ ਸਿੰਘ ਨੂੰ ਲੱਭਣ ਅਤੇ ਉਸ ਨੂੰ ਪਾਣੀ 'ਚੋਂ ਬਾਹਰ ਕੱਢਣ 'ਚ ਬਚਾਅ ਕਰਮੀਆਂ ਨੂੰ 40 ਮਿੰਟ ਲੱਗੇ। ਉਸਦੀ ਲਾਸ਼ ਸਮੁੰਦਰੀ ਕੰਢੇ ਤੋਂ ਕੁਝ ਦੂਰ ਬੁਰਸ ਦੇ ਲਾਗੇ ਮਿਲੀ।