ਪੁਣੇ, 4 ਅਗਸਤ (ਪੋਸਟ ਬਿਊਰੋ)- ਹਿੰਦੂਤਵ ਨੇਤਾ ਸੰਭਾਜੀ ਭਿੜੇ ਨੇ ਕੱਲ੍ਹ ਕਿਹਾ ਕਿ ਅਯੁੱਧਿਆ ਵਿੱਚ ਮੰਦਰ ਵਿੱਚ ਭਗਵਾਨ ਰਾਮ ਦੀ ਮੂਰਤੀ ਦੀਆਂ ਮੁੱਛਾਂ ਹੋਣੀਆਂ ਚਾਹੀਦੀਆਂ ਹਨ।
ਪੁਣੇ ਦੇ ਨਜ਼ਦੀਕ ਸਾਂਗਲੀ ਵਿੱਚ ਸੰਭਾਜੀ ਭਿੜੇ ਨੇ ਪੱਤਰਕਾਰਾਂ ਨੂੰ ਕਿਹਾ ਕਿ ਮੈਂ ਗੋਵਿੰਦ ਗਿਰੀ ਮਹਾਰਾਜ (ਮੰਦਰ ਟਰੱਸਟ ਦੇ ਇੱਕ ਮੈਂਬਰ) ਨੂੰ ਕਿਹਾ ਹੈ ਕਿ ਤੁਸੀਂ ਰਾਮ ਅਤੇ ਲਛਮਣ ਦੀ ਜਿਸ ਮੂਰਤੀ ਦੀ ਸਥਾਪਨਾ ਕਰਨ ਜਾ ਰਹੇ ਹੋ, ਉਨ੍ਹਾਂ ਦੀਆਂ ਮੁੱਛਾਂ ਹੋਣੀਆਂ ਚਾਹੀਦੀਆਂ ਹਨ। ਭਿੜੇ ਨੇ ਕਿਹਾ ਕਿ ਜੇ ਤੁਸੀਂ ਇਹ ਭੁੱਲ (ਭਗਵਾਨ ਰਾਮ ਦੀ ਮੂਰਤੀ ਵਿੱਚ ਮੁੱਛਾਂ ਨਾ ਹੋਣਾ) ਨਹੀਂ ਸੁਧਾਰਦੇ ਤਾਂ ਭਗਵਾਨ ਰਾਮ ਦੇ ਮੇਰੇ ਵਰਗੇ ਭਗਤਾਂ ਲਈ ਮੰਦਰ ਦਾ ਕੋਈ ਅਰਥ ਨਹੀਂ। ਉਨ੍ਹਾਂ ਨੇ ਮੰਦਰ ਸਥਾਨ 'ਤੇ ਭੂਮੀ ਪੂਜਨ ਤੋਂ ਪਹਿਲਾਂ ਕਿਹਾ ਕਿ ਛਤਰਪਤੀ ਸ਼ਿਵਾਜੀ ਮਹਾਰਾਜ ਦੀ ਤਸਵੀਰ ਦੀ ਪੂਜਾ ਕੀਤੀ ਜਾਣੀ ਚਾਹੀਦੀ ਹੈ। ਇਸ ਦੌਰਾਨ ਐੱਨ ਸੀ ਪੀ ਪਾਰਟੀ ਦੇ ਮੁਖੀ ਸ਼ਰਦ ਪਵਾਰ ਨੇ ਪਿੱਛੇ ਜਿਹੇ ਕਿਹਾ ਸੀ ਕਿ ਕੁਝ ਲੋਕਾਂ ਨੂੰ ਇਹ ਲੱਗਦਾ ਹੈ ਕਿ ਮੰਦਰ ਬਣ ਜਾਣ ਨਾਲ ਕੋਵਿਡ-19 ਮਹਾਮਾਰੀ ਖਤਮ ਹੋ ਜਾਏਗੀ। ਪਵਾਰ ਦੇ ਇਸ ਬਿਆਨ ਉਤੇ ਭਿੜੇ ਨੇ ਕਿਹਾ ਕਿ ਉਹ ਇੱਕ ਸਨਮਾਨਿਤ ਵਿਅਕਤੀ ਹਨ ਅਤੇ ਉਨ੍ਹਾਂ ਨੂੰ ਅਜਿਹਾ ਬਿਆਨ ਨਹੀਂ ਦੇਣਾ ਚਾਹੀਦਾ ਸੀ।