* ਰੱਖਿਆ ਬਜਟ `ਚ ਕਟੌਤੀ ਮੌਕੇ ਪਾਰਲੀਮੈਂਟਰੀ ਕਮਿਸ਼ਨ ਦੀ ਚੇਤਾਵਨੀ
ਵਾਸ਼ਿੰਗਟਨ, 15 ਨਵੰਬਰ, (ਪੋਸਟ ਬਿਊਰੋ)- ਅਮਰੀਕਾ ਦੇ ਇਕ ਪਾਰਲੀਮੈਂਟਰੀ ਕਮਿਸ਼ਨ ਨੇ ਚੌਕਸ ਕੀਤਾ ਹੈ ਕਿ ਉਨ੍ਹਾਂ ਦਾ ਦੇਸ਼ ਕੌਮੀ ਸੁਰੱਖਿਆ ਤੇ ਫ਼ੌਜੀ ਮੋਰਚੇ ਉੱਤੇ ਸੰਕਟ ਦਾ ਸਾਹਮਣਾ ਕਰ ਰਿਹਾ ਹੈ। ਇਸ ਸਥਿਤੀ ਵਿੱਚ ਜੰਗ ਹੋਈ ਤਾਂ ਰੂਸ ਜਾਂ ਚੀਨ ਦੇ ਹੱਥੋਂ ਅਮਰੀਕਾ ਨੂੰ ਹਾਰਨਾ ਵੀ ਪੈ ਸਕਦਾ ਹੈ।
ਅਸਲ ਵਿੱਚ ਅਮਰੀਕੀ ਕਾਂਗਰਸ (ਪਾਰਲੀਮੈਂਟ) ਨੇ ਕੌਮੀ ਰੱਖਿਆ ਰਣਨੀਤੀ ਕਮਿਸ਼ਨ ਨੂੰ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਕੌਮੀ ਰੱਖਿਆ ਰਣਨੀਤੀ (ਐੱਨ ਡੀ ਐੱਸ) ਦੀ ਘੋਖ ਲਈੰ ਕਿਹਾ ਸੀ। ਕਮਿਸ਼ਨ ਨੇ ਦੇਖਿਆ ਕਿ ਅਮਰੀਕੀ ਫ਼ੌਜ ਨਾ ਸਿਰਫ਼ ਰੱਖਿਆ ਬਜਟ ਵਿੱਚ ਕਟੌਤੀ ਨੂੰ ਭੁਗਤ ਰਹੀ ਹੈ, ਸਗੋਂ ਚੀਨ ਤੇ ਰੂਸ ਵਰਗੇ ਦੇਸ਼ਾਂ ਦੇ ਮੁਕਾਬਲੇ ਫ਼ੌਜੀ ਬੜ੍ਹਤ ਵਿੱਚ ਕਮੀ ਹੈ। ਇਹ ਦੋਵੇਂ ਦੇਸ਼ ਅਮਰੀਕੀ ਹਸਤੀ ਨੂੰ ਬੇਅਸਰ ਕਰ ਰਹੇ ਹਨ। ਇਕ ਦਰਜਨ ਸਾਬਕਾ ਡੈਮੋਕਰੇਟਿਕ ਅਤੇ ਰਿਪਬਲਿਕਨ ਮੈਂਬਰਾਂ ਵੱਲੋਂ ਚਲਾਏ ਜਾਂਦੇ ਇਸ ਕਮਿਸ਼ਨ ਨੇ ਬੁੱਧਵਾਰ ਆਪਣੀ ਰਿਪੋਰਟ ਵਿੱਚ ਕਿਹਾ ਕਿ ਅਮਰੀਕਾ ਦੀ ਫ਼ੌਜੀ ਤਾਕਤ ਦੀ ਕਮੀ ਖ਼ਤਰਨਾਕ ਪੱਧਰ `ਤੇ ਜਾ ਚੁੱਕੀ ਹੈ। ਰਿਪੋਰਟ ਮੁਤਾਬਕ ਇਸ ਸਦੀ ਵਿੱਚ ਅਮਰੀਕਾ ਨੇ ਅੱਤਵਾਦ ਵਿਰੋਧੀ ਮੁਹਿੰਮਾਂ `ਤੇ ਧਿਆਨ ਵੱਧ ਕੇਂਦਰਤ ਕੀਤਾ ਤੇ ਇਸ ਦਾ ਸਿੱਟਾ ਜੰਗੀ ਤਿਆਰੀ ਦੇ ਦੂਜੇ ਪੱਖਾਂ, ਯਾਨੀ ਮਿਜ਼ਾਈਲ ਡਿਫੈਂਸ ਸਿਸਟਮ, ਸਾਈਬਰ, ਸਪੇਸ ਅਤੇ ਪਣਡੁੱਬੀ ਰੋਕੂ ਸਿਸਟਮ ਵਿੱਚ ਗਿਰਾਵਟ ਦੇ ਰੂਪ `ਚ ਸਾਹਮਣੇ ਆ ਰਿਹਾ ਹੈ। ਤਾਕਤਵਰ ਦੁਸ਼ਮਣਾਂ (ਚੀਨ ਤੇ ਰੂਸ) ਦੇ ਖ਼ਿਲਾਫ਼ ਫ਼ੌਜੀ ਮੁਹਿੰਮਾਂ ਦੀ ਤਿਆਰੀ ਲਈ ਕਈ ਚੀਜ਼ਾਂ ਦੀ ਲੋੜ ਹੈ। ਕਮਿਸ਼ਨ ਨੇ ਉਂਜ ਇਹ ਵੀ ਕਿਹਾ ਹੈ ਕਿ ਰੱਖਿਆ ਮੰਤਰਾਲਾ ਪੈਂਟਾਗਨ ਸਹੀ ਦਿਸ਼ਾ ਵਿੱਚ ਜਾ ਰਿਹਾ ਹੈ। ਕਮਿਸ਼ਨ ਦੇ ਮੁਤਾਬਕ ਏਸ਼ੀਆ ਤੇ ਯੂਰਪ ਵਿੱਚ ਅਮਰੀਕੀ ਪ੍ਰਭਾਵ ਤੇਜ਼ੀ ਨਾਲ ਘਟ ਰਿਹਾ ਤੇ ਫ਼ੌਜੀ ਬੈਲੈਂਸ ਬਦਲਣ ਨਾਲ ਸੰਘਰਸ਼ ਦਾ ਖ਼ਤਰਾ ਵਧ ਗਿਆ ਹੈ। ਅਮਰੀਕੀ ਫ਼ੌਜ ਨੂੰ ਅਗਲੇ ਸੰਘਰਸ਼ ਵਿੱਚ ਅਣਕਿਆਸੇ ਰੂਪ ਵਿੱਚ ਜਾਨ-ਮਾਲ ਦਾ ਭਾਰੀ ਨੁਕਸਾਨ ਭੁਗਤਣਾ ਕਰਨਾ ਜਾਂ ਏਦਾਂ ਦੀ ਜੰਗ ਵਿੱਚ ਜੂਝਣਾ ਤੇ ਸ਼ਾਇਦ ਚੀਨ ਜਾਂ ਰੂਸ ਨਾਲ ਜੰਗ ਵਿੱਚ ਹਾਰ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।