ਵਾਅਨ, 9 ਜੁਲਾਈ (ਪੋਸਟ ਬਿਊਰੋ) : ਵਾਅਨ ਵਿੱਚ ਇੱਕ ਪਾਰਕਿੰਗ ਲੌਟ ਦੇ ਬੈਰੀਅਰ ਨਾਲ ਟਕਰਾ ਕੇ ਕਾਰ ਦੇ ਹੇਠਾਂ ਡਿੱਗ ਜਾਣ ਕਾਰਨ ਡਰਾਈਵਰ ਤੇ ਇੱਕ ਰਾਹਗੀਰ ਦੀ ਮੌਤ ਹੋ ਗਈ।

ਇਹ ਹਾਦਸਾ ਕੀਲ ਸਟਰੀਟ ਤੇ ਰੁਦਰਫੋਰਡ ਰੋਡ ਉੱਤੇ ਵਾਪਰਿਆ। ਯੌਰਕ ਪੁਲਿਸ ਨੇ ਦੱਸਿਆ ਕਿ ਦੋ ਬੱਚਿਆਂ ਦੀ ਮਾਂ ਨੂੰ ਮੌਕੇ ਉੱਤੇ ਹੀ ਮ੍ਰਿਤਕ ਕਰਾਰ ਦੇ ਦਿੱਤਾ ਗਿਆ ਜਦਕਿ ਡਰਾਈਵਰ ਨੂੰ ਬਿਨਾਂ ਸਾਹ ਸਤ ਦੇ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਬਾਅਦ ਵਿੱਚ ਉਸ ਦੀ ਮੌਤ ਹੋ ਗਈ। ਗੱਡੀ ਵਿੱਚ ਸਵਾਰ ਦੂਜੇ ਵਿਅਕਤੀ ਨੂੰ ਵੀ ਹਸਤਪਤਾਲ ਲਿਜਾਇਆ ਗਿਆ, ਉਸ ਨੂੰ ਕੋਈ ਜਿ਼ਆਦਾ ਸਟ ਨਹੀਂ ਸੀ ਲੱਗੀ।

ਇਹ ਵੀ ਪਤਾ ਲੱਗਿਆ ਹੈ ਕਿ ਮਾਰੀ ਗਈ ਮਹਿਲਾ ਅਕਸਰ ਹੀ ਲੰਚ ਕਰਨ ਲਈ ਪਾਰਕਿੰਗ ਲੌਟ ਵਿੱਚ ਜਾਂਦੀ ਸੀ ਜਿੱਥੇ ਉਸ ਨਾਲ ਗੱਡੀ ਟਕਰਾਈ। ਇਹ ਜਾਣਕਾਰੀ ਉਸ ਦੇ ਇੰਪਲੌਇਰ ਨੇ ਦਿੱਤੀ। ਮਹਿਲਾ ਨਾਲ ਟਕਰਾਉਣ ਤੋਂ ਬਾਅਦ ਗੱਡੀ ਬੈਰੀਅਰ ਨਾਲ ਟਕਰਾਈ ਤੇ 20 ਫੁਟ ਹੇਠਾਂ ਸੜਕ ਉੱਤੇ ਜਾ ਡਿੱਗੀ ਤੇ ਫਿਰ ਸੜਕ ਦੇ ਦੂਜੇ ਕਿਨਾਰੇ ਉੱਤੇ ਲਗੇ ਖੰਭੇ ਵਿੱਚ ਜਾ ਵੱਜੀ। ਗੱਡੀ ਦਾ ਡਰਾਈਵਰ ਤੇ ਨਾਲ ਮੌਜੂਦ ਵਿਅਕਤੀ ਬਜ਼ੁਰਗ ਦੱਸੇ ਜਾਂਦੇ ਹਨ।