ਬੀਜਿੰਗ, 15 ਨਵੰਬਰ (ਪੋਸਟ ਬਿਊਰੋ)- ਚੀਨ ਦੇ ਸਿ਼ਨਜਿਆਂਗ ਖੇਤਰ `ਚ ਉਈਗਰ ਮੁਸਲਮਾਨਾਂ ਦੇ ਮਨੁੱਖੀ ਅਧਿਕਾਰ ਉਲੰਘਣਾ ਦੇ ਮਾਮਲੇ `ਤੇ ਅਮਰੀਕਾ ਅਤੇ 15 ਹੋਰ ਪੱਛਮੀ ਦੇਸ਼ ਬੀਜਿੰਗ ਨੂੰ ਘੇਰਨ ਨੂੰ ਤਿਆਰ ਹੋ ਰਹੇ ਹਨ।
ਮਿਲੀ ਜਾਣਕਾਰੀ ਅਨੁਸਾਰ ਕੈਨੇਡਾ ਦੀ ਅਗਵਾਈ ਵਿੱਚ 15 ਪੱਛਮੀ ਦੇਸ਼ਾਂ ਦੇ ਰਾਜਦੂਤਾਂ ਨੇ ਸਿ਼ਨਜਿਆਂਗ ਵਿੱਚ ਕਮਿਊਨਿਸਟ ਪਾਰਟੀ ਦੇ ਮੁਖੀ ਚੇਨ ਕਵਾਂਗੁਓ ਦੇ ਨਾਂ ਪੱਤਰ ਲਿਖ ਕੇ ਬੈਠਕ ਦੀ ਅਪੀਲ ਕੀਤੀ ਹੈ। ਬੈਠਕ ਦਾ ਮਕਸਦ ਉਈਗਰ ਮੁਸਲਮਾਨਾਂ ਦੇ ਮਨੁੱਖੀ ਅਧਿਕਾਰ ਉਲੰਘਣਾ `ਤੇ ਸਪੱਸ਼ਟੀਕਰਨ ਦੀ ਮੰਗ ਕਰਨਾ ਹੈ। ਇਹ ਸਪੱਸ਼ਟ ਨਹੀਂ ਹੈ ਕਿ ਇਹ ਪੱਤਰ ਭੇਜ ਦਿੱਤਾ ਹੈ ਜਾਂ ਨਹੀਂ। ਇਸ ਮੁੱਦੇ ਤੇ ਅਮਰੀਕਾ `ਚ ਹਾਕਮ ਅਤੇ ਵਿਰੋਧੀ ਪਾਰਟੀਆਂ ਦੇ ਦਰਜਨ ਤੋਂ ਵੱਧ ਸੈਨੇਟਰਾਂ ਅਤੇ 10 ਪਾਰਲੀਮੈਂਟ ਮੈਂਬਰਾਂ ਦੇ ਸ਼ਕਤੀਸ਼ਾਲੀ ਗਰੁੱਪ ਨੇ ਚੀਨ ਦੇ ਖ਼ਿਲਾਫ਼ ਬਿੱਲ ਪੇਸ਼ ਕੀਤੇ ਹਨ। ਇਨ੍ਹਾਂ `ਚ ਚੀਨ ਖ਼ਿਲਾਫ਼ ਕੁਝ ਪਾਬੰਦੀ ਲਗਾਉਣ ਦੀ ਤਜਵੀਜ਼ ਕੀਤੀ ਗਈ ਹੈ।
ਅਗਸਤ ਵਿੱਚ ਯੂ ਐਨ ਦੀ ਮਨੁੱਖੀ ਅਧਿਕਾਰ ਕਮੇਟੀ ਨੇ ਕਿਹਾ ਸੀ ਕਿ ਉਸ ਨੂੰ ਕਈ ਭਰੋਸੇ ਯੋਗ ਰਿਪੋਰਟਾਂ ਮਿਲੀਆਂ ਹਨ ਜਿਨ੍ਹਾਂ ਮੁਤਾਬਕ ਚੀਨ `ਚ 10 ਲੱਖ ਤੋਂ ਜ਼ਿਆਦਾ ਉਈਗਰ ਮੁਸਲਮਾਨਾਂ ਨੂੰ ਬਹੁਤ ਗੁਪਤ ਤਰੀਕੇ ਨਾਲ ਵੱਡੇ ਨਜ਼ਰਬੰਦ ਕੈਂਪਾਂ `ਚ ਰੱਖਿਆ ਗਿਆ ਹੈ। ਇਸ ਪਿੱਛੋਂ ਚੀਨ ਮਨੁੱਖੀ ਅਧਿਕਾਰ ਵਰਕਰਾਂ, ਸਿੱਖਿਆ ਮਾਹਿਰਾਂ ਅਤੇ ਵਿਦੇਸ਼ੀ ਸਰਕਾਰਾਂ ਦੇ ਨਿਸ਼ਾਨੇ `ਤੇ ਹੈ। ਰਾਜਦੂਤਾਂ ਵੱਲੋਂ ਲਿਖੇ ਪੱਤਰ ਦੇ ਖਰੜੇ ਮੁਤਾਬਕ ਇਸ ਨੂੰ ਸਿੱਧੇ ਚੇਨ ਕਵਾਂਗੁਓ ਨੂੰ ਸੰਬੋਧਨ ਕੀਤਾ ਗਿਆ ਹੈ। ਚੇਨ ਖੇਤਰ ਦੇ ਉਈਗਰ ਗਵਰਨਰ ਸ਼ੌਹਰਤ ਜ਼ਾਕਿਰ ਤੋਂ ਅਹੁਦੇ ਵਿੱਚ ਵੱਡੇ ਹਨ। ਪੱਤਰ `ਚ ਰਾਜਦੂਤਾਂ ਨੇ ਸਿ਼ਨਜਿਆਂਗ ਖੇਤਰ ਬਾਰੇ ਯੂ ਐਨ ਰਿਪੋਰਟ `ਤੇ ਚਿੰਤਾ ਪ੍ਰਗਟ ਕੀਤੀ ਹੈ। ਪੱਤਰ ਮੁਤਾਬਕ ਸਥਿਤੀ ਨੂੰ ਬਿਹਤਰ ਤਰੀਕੇ ਨਾਲ ਸਮਝਣ ਅਤੇ ਆਪਣੀਆਂ ਚਿੰਤਾਵਾਂ `ਤੇ ਚਰਚਾ ਲਈ ਅਸੀਂ ਤੁਹਾਡੇ ਲਈ ਤੁਹਾਡੀ ਸਹੂਲਤ ਮੁਤਾਬਕ ਬੈਠਕ ਕਰਨ ਦੀ ਅਪੀਲ ਕਰਦੇ ਹਾਂ। ਇਸ ਦੀ ਕਾਪੀ ਚੀਨ ਦੇ ਵਿਦੇਸ਼ ਮੰਤਰਾਲੇ, ਲੋਕ ਸੁਰੱਖਿਆ ਮੰਤਰਾਲੇ ਅਤੇ ਕਮਿਊਨਿਸਟ ਪਾਰਟੀ ਦੇ ਕੌਮਾਂਤਰੀ ਵਿਭਾਗ ਨੂੰ ਲਿਖੀ ਗਈ ਹੈ। ਪੱਤਰ `ਤੇ ਕੈਨੇਡਾ ਦੇ ਇਲਾਵਾ ਬ੍ਰਿਟੇਨ, ਫਰਾਂਸ, ਸਵਿਟਜ਼ਰਲੈਂਡ, ਯੂਰਪੀ ਯੂਨੀਅਨ, ਜਰਮਨੀ, ਨੀਦਰਲੈਂਡ, ਆਸਟਰੇਲੀਆ, ਆਇਰਲੈਂਡ, ਸਵੀਡਨ, ਬੈਲਜੀਅਮ, ਨਾਰਵੇ, ਐਸਟੋਨੀਆ, ਫਿਨਲੈਂਡ ਅਤੇ ਡੈਨਮਾਰਕ ਦੇ ਰਾਜਦੂਤਾਂ ਦੇ ਨਾਂ ਹਨ।
ਇਸ ਦੌਰਾਨ ਅਮਰੀਕਾ ਵਿੱਚ ਹਾਕਮ ਰਿਪਬਲਿਕਨ ਪਾਰਟੀ ਅਤੇ ਵਿਰੋਧੀ ਡੈਮੋਕਰੇਟਿਕ ਪਾਰਟੀ ਦੇ ਦਰਜਨ ਤੋਂ ਵੱਧ ਸੈਨੇਟਰਾਂ ਦੇ ਇਕ ਸ਼ਕਤੀਸ਼ਾਲੀ ਗਰੁੱਪ ਨੇ ਸੈਨੇਟ `ਚ ਅਤੇ 10 ਪਾਰਲੀਮੈਂਟ ਮੈਂਬਰਾਂ ਦੇ ਗਰੁੱਪ ਨੇ ਹਾਊਸ ਆਫ਼ ਰਿਪਰਜ਼ੈਂਟੇਟਿਵ `ਚ ਚੀਨ ਦੇ ਖ਼ਿਲਾਫ਼ ਬਿੱਲ ਪੇਸ਼ ਕੀਤੇ ਹਨ। ਇਨ੍ਹਾਂ ਵਿੱਚ ਚੀਨ ਉਤੇ ਅਮਰੀਕੀ ਖੇਤਰ `ਚ ਅਮਰੀਕੀ ਨਾਗਰਿਕਾਂ ਅਤੇ ਕਾਨੂੰਨੀ ਤੌਰ `ਤੇ ਸਥਾਨਕ ਨਾਗਰਿਕਾਂ ਨੂੰ ਧਮਕਾਉਣ ਦਾ ਦੋਸ਼ ਲੱਗਾ ਗਿਆ ਹੈ। ਸੈਨੇਟਰ ਬੌਬ ਮੈਨੇਂਨਡੇਜ਼ ਨੇ ਕਿਹਾ ਕਿ ਉਈਗਰ ਮੁਸਲਮਾਨਾਂ ਦੇ ਨਾਲ ਚੀਨ ਦਾ ਸਲੂਕ ਨਫ਼ਰਤ ਵਾਲਾ ਹੈ। ਉਨ੍ਹਾਂ ਕਿਹਾ ਕਿ ਰਾਸ਼ਟਰਪਤੀ ਟਰੰਪ ਨੂੰ ਚੀਨ ਦੇ ਪ੍ਰਤੀ ਰੁਖ਼ ਸਾਫ਼ ਅਤੇ ਇਕੋ ਜਿਹਾ ਰੱਖਣਾ ਚਾਹੀਦਾ ਹੈ ਅਤੇ ਇਸ ਗੱਲ ਦੀ ਅਣਦੇਖੀ ਨਹੀਂ ਕਰਨੀ ਚਾਹੀਦੀ ਕਿ ਨਿਰੰਕੁਸ਼ ਸ਼ਾਸਨ ਹੇਠ ਲੱਖਾਂ ਮੁਸਲਮਾਨਾਂ ਨੂੰ ਅਨਿਆਂ ਪੂਰਣ ਬੰਦੀ ਬਣਾਇਆ ਗਿਆ ਅਤੇ ਉਨ੍ਹਾਂ ਨੂੰ ਜ਼ਬਰਦਸਤੀ ਮਜ਼ਦੂਰ ਕੈਂਪਾਂ `ਚ ਰੱਖਿਆ ਗਿਆ ਹੈ। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਅਤੇ ਚੀਨੀ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਦੀ ਇਸੇ ਮਹੀਨੇ ਦੇ ਅਖੀਰ `ਚ ਅਰਜਨਟੀਨਾ `ਚ ਜੀ-20 ਸੰਮੇਲਨ ਤੋਂ ਹੱਟ ਕੇ ਮੁਲਾਕਾਤ ਹੋਣੀ ਹੈ।