ਪਿਛਲੀ ਸਦੀ ਦੇ ਅੱਠਵਾਂ ਦਹਾਕੇ ਦੀ ਕਹਾਣੀ ਉੱਤੇ ਆਧਾਰਤ ਫਿਲਮ ‘ਬੈੱਲਬਾਟਮ’ ਦੀ ਸ਼ੂਟਿੰਗ ਇਸ ਸਾਲ ਸ਼ੁਰੂ ਹੋਣ ਦੀ ਸੰਭਾਵਨਾ ਹੈ। ਫਿਲਮ ਸੱਚੀਆਂ ਘਟਨਾਵਾਂ ਤੋਂ ਪ੍ਰੇਰਤ ਹੋਵੇਗੀ, ਜਿਸ ਵਿੱਚ ਉਨ੍ਹਾਂ ਨਾਇਕਾਂ ਦੀ ਕਹਾਣੀ ਦਿਖਾਈ ਜਾਵੇਗੀ, ਜਿਨ੍ਹਾਂ ਨੂੰ ਭੁਲਾ ਦਿੱਤਾ ਗਿਆ ਹੈ। ਅਕਸ਼ੈ ਕੁਮਾਰ ਦੇ ਨਾਲ ਫਿਲਮ ਵਿੱਚ ਕਿਹੜੀ ਅਭਿਨੇਤਰੀ ਹੋਵੇਗੀ, ਇਸ ਨੂੰ ਲੈ ਕੇ ਚਰਚਾ ਗਰਮ ਸੀ, ਪਰ ਵਾਣੀ ਕਪੂਰ ਦੇ ਨਾਂਅ 'ਤੇ ਮੋਹਰ ਲੱਗ ਗਈ ਹੈ। ‘ਬੇਫਿਕਰੇ’, ‘ਵਾਰ’ ਵਰਗੀਆਂ ਫਿਲਮਾਂ ਕਰ ਚੁੱਕੀ ਵਾਣੀ ਦੀ ਅਕਸ਼ੈ ਨਾਲ ਇਹ ਪਹਿਲੀ ਫਿਲਮ ਹੋਵੇਗੀ।
ਨਿਰਮਾਤਾ ਜੈਕੀ ਭਗਨਾਨੀ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਇਸ ਫਿਲਮ ਲਈ ਇੱਕ ਫ੍ਰੈੱਸ਼ ਜੋੜੀ ਚਾਹੀਦੀ ਸੀ। ਉਹ ਚਾਹੁੰਦੇ ਸਨ ਕਿ ਫਿਲਮ ਦੀ ਲੀਡ ਅਭਿਨੇਤਰੀ ਦਾ ਤਾਲਮੇਲ ਅਕਸ਼ੈ ਨਾਲ ਸਕਰੀਨ 'ਤੇ ਜਚੇ। ਇਸ ਕਿਰਦਾਰ ਤੋਂ ਵਾਣੀ ਕਾਫੀ ਉਤਸ਼ਾਹਤ ਹੈ। ਉਸ ਦਾ ਕਹਿਣਾ ਹੈ ਕਿ ਇਹ ਉਤਸ਼ਾਹ ਪਰਦੇ 'ਤੇ ਖੂਬਸੂਰਤੀ ਨਾਲ ਨਜ਼ਰ ਆਏਗਾ। ਡਾਇਰੈਕਟਰ ਰਣਜੀਤ ਐਮ ਤਿਵਾੜੀ ਦਾ ਕਹਿਣਾ ਹੈ ਕਿ ਵਾਣੀ ਦਾ ਕਿਰਦਾਰ ਕਾਫੀ ਪੇਚੀਦਾ ਹੈ। ਉਸ ਦਾ ਇੱਕ ਵੱਖ ਸੁਭਾਅ ਹੋਵੇਗਾ, ਜਿਸ ਦੇ ਲਈ ਉਹ ਸਹੀ ਪਸੰਦ ਹੈ। ‘ਬੈੱਲਬਾਟਮ’ ਅਗਲੇ ਸਾਲ ਦੋ ਅਪ੍ਰੈਲ ਨੂੰ ਰਿਲੀਜ਼ ਕਰਨ ਦੀ ਯੋਜਨਾ ਹੈ।