ਵਾਸਿ਼ੰਗਟਨ, 5 ਜੁਲਾਈ (ਪੋਸਟ ਬਿਊਰੋ) : ਕਾਨੇਯੇ ਵੈਸਟ ਨੇ ਟਵਿੱਟਰ ਉੱਤੇ ਐਲਾਨ ਕੀਤਾ ਹੈ ਕਿ ਉਹ ਵੀ 2020 ਵਿੱਚ ਅਮਰੀਕਾ ਦੇ ਰਾਸ਼ਟਰਪਤੀ ਦੀ ਚੋਣ ਦੀ ਦੌੜ ਵਿੱਚ ਹਿੱਸਾ ਲੈਣ ਦਾ ਇਰਾਦਾ ਰੱਖਦਾ ਹੈ।
ਸ਼ਨਿੱਚਰਵਾਰ ਰਾਤ ਨੂੰ ਇਸ ਰੈਪਰ ਨੇ ਟਵੀਟ ਕਰਕੇ ਆਖਿਆ “ਸਾਨੂੰ ਪਰਮਾਤਮਾ ਵਿੱਚ ਯਕੀਨ ਰੱਖ ਕੇ ਅਮਰੀਕਾ ਦੇ ਵਾਅਦੇ ਦਾ ਅਹਿਸਾਸ ਹੋਣਾ ਚਾਹੀਦਾ ਹੈ, ਸਾਨੂੰ ਆਪਣਾ ਨਜ਼ਰੀਆ ਇੱਕਸਾਰ ਰੱਖਣਾ ਚਾਹੀਦਾ ਹੈ ਤੇ ਆਪਣੇ ਭਵਿੱਖ ਦਾ ਨਿਰਮਾਣ ਕਰਨਾ ਚਾਹੀਦਾ ਹੈ। ਮੈਂ ਅਮਰੀਕਾ ਦੇ ਰਾਸ਼ਟਰਪਤੀ ਵਜੋਂ ਚੋਣ ਲੜ ਰਿਹਾ ਹਾਂ।”
ਇਸ ਮੌਕੇ ਸਪੇਸ ਐਕਸ ਦੇ ਸੀਈਓ ਐਲਨ ਮਸਕ ਨੇ ਟਵੀਟ ਕਰਕੇ ਆਖਿਆ ਕਿ ਉਨ੍ਹਾਂ ਦਾ ਪੂਰਾ ਸਮਰਥਨ ਕਾਨੇਯੇ ਵੈਸਟ ਨੂੰ ਹੈ। ਜੇ ਕਾਨੇਯੇ ਵੈਸਟ ਸੱਚਮੁੱਚ ਹੀ ਰਾਸ਼ਟਰਪਤੀ ਦੇ ਅਹੁਦੇ ਲਈ ਹੋਣ ਵਾਲੀ ਚੋਣ ਵਿੱਚ ਖੜ੍ਹੇ ਹੋਣਾ ਚਾਹੁੰਦੇ ਹਨ ਤਾਂ ਉਨ੍ਹਾਂ ਦਾ ਮੁਕਾਬਲਾ ਮੌਜੂਦਾ ਰਾਸ਼ਟਰਪਤੀ ਡੌਨਲਡ ਟਰੰਪ, ਸਾਬਕਾ ਵਾਈਸ ਪ੍ਰੈਜ਼ੀਡੈਂਟ ਜੋਅ ਬਾਇਡਨ, ਲਿਬਰਟੇਰੀਅਨ ਪਾਰਟੀ ਦੇ ਜੋ ਯੌਰਗੈਨਸੈ ਤੇ ਗ੍ਰੀਨ ਪਾਰਟੀ ਦੇ ਹੌਵੀ ਹਾਅਕਿਨਜ਼ ਨਾਲ ਹੋਵੇਗਾ।
ਅਮਰੀਕਾ ਵਿੱਚ ਰਾਸ਼ਟਰਪਤੀ ਦੇ ਅਹੁਦੇ ਲਈ ਚੋਣਾਂ 3 ਨਵੰਬਰ ਨੂੰ ਹੋਣਗੀਆਂ।