ਜਲੰਧਰ, 3 ਜੁਲਾਈ (ਪੋਸਟ ਬਿਊਰੋ)- ਇਸ ਮਹਾਨਗਰ ਦੇ ਥਾਣਾ ਬਾਰਾਦਰੀ ਦੀ ਪੁਲਸ ਨੇ ਕਾਹਲਵਾਂ ਪਿੰਡ ਵਿੱਚ 50 ਕਨਾਲ 9 ਮਰਲੇ ਜ਼ੀਮਨ ਵੇਚਣ ਦਾ ਝਾਂਸਾ ਦੇ ਕੇ ਇੱਕ ਕਰੋੜ ਦੀ ਠਗੀ ਕਰਨ ਵਾਲੇ ਦੋਸ਼ੀਆਂ ਦੇ ਖ਼ਿਲਾਫ਼ ਧੋਖਾਧੜੀ ਦਾ ਕੇਸ ਦਰਜ ਕੀਤਾ ਹੈ ਅਤੇ ਇਸ ਬਾਰੇ ਅਗਲੀ ਕਾਰਵਾਈ ਕੀਤੀ ਜਾ ਰਹੀ ਹੈ।
ਇਸ ਸੰਬੰਧ ਵਿੱਚ ਕਵਲਜੀਤ ਸਿੰਘ ਨੇ ਪੁਲਸ ਨੂੰ ਸ਼ਿਕਾਇਤ ਦਿੱਤੀ ਸੀ ਕਿ ਦੋਸ਼ੀਆਂ ਨੇ ਉਨ੍ਹਾਂ ਨਾਲ ਸੰਪਰਕ ਕਰ ਕੇ ਦੱਸਿਆ ਸੀ ਕਿ ਉਨ੍ਹਾਂ ਕੋਲ ਕਰਤਾਰਪੁਰ ਦੇ ਕਾਹਲਵਾਂ ਪਿੰਡ ਵਿੱਚ 50 ਕਨਾਲ 9 ਮਰਲੇ ਜ਼ਮੀਨ ਹੈ ਅਤੇ ਉਹ ਵੇਚਣਾ ਚਾਹੁੰਦੇ ਹਨ, ਜਿਸ ਦੇ ਬਾਅਦ ਉਨ੍ਹਾਂ ਨੇ ਜ਼ਮੀਨ ਦਿਖਾਈ ਸੀ। ਪਸੰਦ ਆਉਣ 'ਤੇ ਸੌਦਾ ਸੱਤ ਕਰੋੜ 70 ਲੱਖ 75 ਹਜ਼ਾਰ ਰੁਪਏ ਦਾ ਹੋਇਆ, ਜਿਸ ਦੇ ਬਦਲੇ ਦੋਸ਼ੀਆਂ ਨੂੰ ਇੱਕ ਕਰੋੜ ਰੁਪਏ ਬਿਆਨਾ ਦਿੱਤੇ ਸਨ। ਇਸ ਪਿੱਛੋਂ 15 ਮਈ 2014 ਨੂੰ ਰਜਿਸਟਰੀ ਕਰਾਨ ਦੀ ਸਹਿਮਤੀ ਹੋਈ ਤਾਂ 15 ਮਈ 2014 ਨੂੰ ਉਹ ਰਜਿਸਟ੍ਰਾਰ ਆਫਿਸ ਵਿੱਚ ਪਹੁੰਚੇ ਪਰ ਦੋਸ਼ੀਆਂ ਵਿੱਚੋਂ ਕੋਈ ਨਹੀਂ ਪਹੁੰਚਿਆ। ਵਾਰ-ਵਾਰ ਸੰਪਰਕ ਕਰਨ 'ਤੇ ਵੀ ਉਹ ਨਹੀਂ ਆਏ। ਬਾਅਦ ਵਿੱਚ ਉਨ੍ਹਾਂ ਤੋਂ ਬਿਆਨੇ ਵਿੱਚ ਦਿੱਤੇ ਇੱਕ ਕਰੋੜ ਰੁਪਏ ਵਾਪਸ ਮੰਗੇ ਤਾਂ ਦੋਸ਼ੀਆਂ ਨੇ ਨਹੀਂ ਵਾਪਸ ਕੀਤੇ। ਕੁਝ ਸਮੇਂ ਬਾਅਦ ਪਤਾ ਲਗਾ ਕਿ ਦੋਸ਼ੀਆਂ ਨੇ ਪਹਿਲਾਂ ਉਸ ਜ਼ਮੀਨ ਦਾ ਸੌਂਦਾ ਕਿਸੀ ਹੋਰ ਵਿਅਕਤੀ ਨਾਲ ਕੀਤਾ ਸੀ ਅਤੇ ਉਸ ਬਾਰੇ ਅਦਾਲਤ ਵਿੱਚ ਕੇਸ ਚੱਲਦਾ ਸੀ। ਦੋਸ਼ੀਆਂ ਨੇ ਜਾਣਕਾਰੀ ਨਹੀਂ ਦਿੱਤੀ ਅਤੇ ਉਨ੍ਹਾਂ ਕੋਲੋਂ ਧੋਖੇ ਨਾਲ ਇੱਕ ਕਰੋੜ ਠਗ ਲਏ। ਪੁਲਸ ਨੇ ਦੋਸ਼ੀਆਂ ਪ੍ਰਣਵ ਅੰਸਲ, ਅਮਿਤ ਰੈਨ, ਦਰਸ਼ਨ ਲਾਲ ਦੇ ਖ਼ਿਲਾਫ਼ ਧਾਰਾ 420 ਅਤੇ 120 ਬੀ ਦੇ ਤਹਿਤ ਕੇਸ ਦਰਜ ਕੀਤਾ ਹੈ।