ਨਿਊਯਾਰਕ, 1 ਜੁਲਾਈ (ਪੋਸਟ ਬਿਊਰੋ)- ਕੋਰੋਨਾ ਇਨਫੈਕਸ਼ਨ ਦੀ ਸੱਚਾਈ ਲੁਕਾਉਣ ਅਤੇ ਗੁਆਂਢੀ ਦੇਸ਼ਾਂ ਦੀ ਜ਼ਮੀਨ 'ਤੇ ਅੱਖਾਂ ਰੱਖਣ ਕਾਰਨ ਦੁਨੀਆ ਵਿੱਚ ਬਦਨਾਮ ਚੀਨ 'ਚ ਸੋਨੇ ਦੀ ਸਭ ਤੋਂ ਵੱਡੀ ਧੋਖਾਦੇਹੀ ਸਾਹਮਣੇ ਆਈ ਹੈ।
ਮੰਨਿਆ ਜਾ ਰਿਹਾ ਹੈ ਕਿ ਇਹ ਪਿਛਲੇ ਸਾਲਾਂ 'ਚ ਸੋਨੇ ਦਾ ਸਭ ਤੋਂ ਵੱਡਾ ਘਪਲਾ ਹੋ ਸਕਦਾ ਹੈ। ਇਹ ਘਪਲਾ ਉਸ ਸ਼ਹਿਰ ਤੋਂ ਉਭਰਿਆ ਹੈ ਜੋ ਘਪਲਿਆਂ ਦਾ ਗੜ੍ਹ ਬਣ ਚੁੱਕਾ ਹੈ। ਇਹ ਓਹੀ ਵੁਹਾਨ ਸ਼ਹਿਰ ਹੈ ਜਿੱਥੋਂ ਨਿਕਲ ਕੇ ਕੋਰੋਨਾ ਪੂਰੀ ਦੁਨੀਆ 'ਚ ਕਹਿਰ ਮਚਾ ਰਿਹਾ ਹੈ। ਰਿਪੋਰਟ ਮੁਤਾਬਕ ਚੀਨ ਦੇ ਕੁਲ ਸੋਨੇ ਦੇ ਭੰਡਾਰ ਵਿੱਚ ਚਾਰ ਫੀਸਦੀ ਤੋਂ ਵੱਧ ਨਕਲੀ ਹੋ ਸਕਦਾ ਹੈ। ਚੀਨ 'ਚ ਸਭ ਤੋਂ ਵੱਡੇ ਜਿਊਲਰਸ 'ਚ ਸ਼ਾਮਲ ਅਤੇ ਨੈਸਡੇਕ 'ਚ ਸੂਚੀਬੱਧ ਕਿੰਗੋਲਡ ਜਿਊਲਰੀ 'ਤੇ 14 ਵਿੱਤੀ ਸੰਸਥਾਵਾਂ ਤੋਂ ਲੋਨ ਕੱਢਣ ਲਈ ਗਹਿਣੇ ਕਰਨ 'ਤੇ ਸੋਨੇ ਦੀ ਨਕਲੀ ਬਾਰ ਰੱਖਣ ਦਾ ਦੋਸ਼ ਲੱਗਾ ਹੈ। ਕੰਪਨੀ ਨੇ 83 ਟਨ ਸੋਨਾ ਗਹਿਣੇ ਰੱਖ ਕੇ 20.6 ਅਰਬ ਯੁਆਨ ਦਾ ਲੋਨ ਲਿਆ, ਪਰ ਇਸ 'ਚੋਂ ਬਹੁਤਾ ਸੋਨਾ ਸਿਰਫ਼ ਗਿਲਡੇਡ ਕਾਪਰ ਨਿਕਲਿਆ। ਇਹ ਚੀਨ ਦੇ ਕੁਲ ਸਾਲਾਨਾ ਉਤਪਾਦਨ ਦਾ 22 ਫੀਸਦੀ ਅਤੇ ਪਿਛਲੇ ਸਾਲ ਦੇਸ਼ ਕੋਲ ਮੌਜੂਦ ਸੋਨੇ ਦੇ ਭੰਡਾਰ ਦਾ 4.2 ਫੀਸਦੀ ਹੈ।
ਅਮਰੀਕਾ ਦੀਆਂ ਦੋ ਲਾਅ ਫਰਮਾਂ ਨੇ ਨਿਵੇਸ਼ਕਾਂ ਵੱਲੋਂ ਪਹਿਲਾਂ ਹੀ ਇਸ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਕਿੰਗੋਲਡ ਚੀਨ ਦੇ ਹੁਥੇਈ ਸੂਬੇ ਦੀ ਸਭ ਤੋਂ ਵੱਡੀ ਗੋਲਡ ਪ੍ਰੋਸੈਸਰ ਹੈ। ਇਸ ਦੇ ਚੇਅਰਮੈਨ ਜੀਅ ਝਿਹੋਂਗ ਚੀਨ ਦੀ ਸ਼ਕਤੀਸ਼ਾਲੀ ਪੀਪੁਲਸ ਲਿਬਰੇਸ਼ਨ ਆਰਮੀ ਦੇ ਸਾਬਕਾ ਅਧਿਕਾਰੀ ਹਨ। ਸੋਨੇ ਦੇ ਨਕਲੀ ਹੋਣ ਦਾ ਖੁਲਾਸਾ ਫਰਵਰੀ ਵਿੱਚ ਹੋਇਆ ਜਦੋਂ ਇੱਕ ਟਰੱਸਟ ਨੇ ਡਿਫਾਲਟ ਕਰਜੇ ਦੀ ਭਰਪਾਈ ਲਈ ਗਹਿਣੇ ਰੱਖੇ ਸੋਨੇ ਨੂੰ ਵੇਚਣ ਦੀ ਕੋਸ਼ਿਸ਼ ਕੀਤੀ। ਉਦੋਂ ਪਤਾ ਲੱਗਾ ਕਿ ਜਿਸ ਨੂੰ ਸੋਨਾ ਸਮਝਿਆ ਜਾ ਰਿਹਾ ਸੀ, ਉਹ ਗਿਲਡੇਡ ਕਾਪਰ ਹੈ। ਇਸ ਖ਼ਬਰ ਨਾਲ ਕਿੰਗੋਲਡ ਦੇ ਕ੍ਰੈਡਿਟਰਾਂ 'ਚ ਹਲਚਲ ਮਚ ਗਈ ਅਤੇ ਬਾਕੀ ਵਿੱਤੀ ਸੰਸਥਾਨਾਂ ਨੇ ਆਪਣੇ ਕੋਲ ਗਹਿਣੇ ਰੱਖੇ ਸੋਨੇ ਦੀ ਸ਼ੁੱਧਤਾ ਦੀ ਜਾਂਚ ਕਰਵਾਈ ਤਾਂ ਉਹ ਵੀ ਕਾਪਰ ਨਿਕਲਿਆ। ਏਜੰਸੀਆਂ ਇਸ ਦੀ ਜਾਂਚ ਕਰ ਰਹੀਆਂ ਹਨ। ਜੀਅ ਝਿਹੋਂਗ ਕਿਸੇ ਵੀ ਧੋਖਾਦੇਹੀ ਨੂੰ ਰੱਦ ਕਰਦੇ ਹਨ। ਇਸ ਤੋਂ ਪਹਿਲਾਂ 2016 'ਚ ਵੀ ਹੁਨਾਨ ਸੂਬੇ 'ਚ ਏਦਾਂ ਦੇ ਇੱਕ ਘਪਲੇ ਦਾ ਪਰਦਾਫਾਸ਼ ਹੋਇਆ ਸੀ।