‘ਸ਼ੇਫ’,‘ਦ ਬਾਡੀ’, ‘ਘੋਸਟ ਸਟੋਰੀਜ਼’ ਵਰਗੀਆਂ ਫਿਲਮਾਂ ਕਰ ਚੁੱਕੀ ਅਭਿਨੇਤਰੀ ਸ਼ੋਭਿਤਾ ਧੂਲੀਪਾਲਾ ਅੱਗੇ ਤੋਂ ਇਤਿਹਾਸਕ ਪੌਰਾਣਿਕ ਤੇ ਸਾਹਿਤ ਨਾਲ ਜੁੜੇ ਕਿਰਦਾਰ ਨਿਭਾਉਣਾ ਚਾਹੁੰਦੀ ਹੈ। ਸ਼ੋਭਿਤਾ ਕਹਿੰਦੀ ਹੈ ਕਿ ਮੈਨੂੰ ਇਤਿਹਾਸ ਅਤੇ ਪੁਰਾਣਿਕ ਗ੍ਰੰਥਾਂ ਵਿੱਚ ਹਮੇਸ਼ਾ ਦਿਲਚਸਪੀ ਰਹੀ ਹੈ। ਏਸੇ ਲਈ ਕਲਾਸੀਕਲ ਨ੍ਰਿਤ ਕੁਚੀਪੁੜੀ ਅਤੇ ਭਰਤਨਾਟਅਮ ਸਿਖਿਆ ਹੈ। ਅੱਗੋਂ ਮੈਂ ਸੀਤਾ ਅਤੇ ਦਰੋਪਦੀ ਦਾ ਕਿਰਦਾਰ ਨਿਭਾਉਣਾ ਚਾਹੁੰਦੀ ਹਾਂ। ਆਪਣੇ ਫਿਲਮੀ ਸਫਰ ਨੂੰ ਲੈ ਕੇ ਉਹ ਦੱਸਦੀ ਹੈ, ‘‘ਚਾਰ ਸਾਲ ਪਹਿਲਾਂ ਤੱਕ ਮੈਂ ਫਿਲਮਾਂ ਤੋਂ ਬਿਲਕੁਲ ਅਣਜਾਣ ਸੀ। ਹਿੰਦੀ ਨਹੀਂ ਬੋਲ ਸਕਦੀ ਸੀ। ਮੇਰੇ ਮਾਤਾ-ਪਿਤਾ ਵੀ ਫਿਲਮਾਂ ਨਹੀਂ ਦੇਖਦੇ ਸਨ, ਪਰ ਅੱਜਕੱਲ੍ਹ ਮੈਨੂੰ ਫਿਲਮਾਂ ਨਾਲ ਪਿਆਰ ਹੈ।”
ਅੱਜ ਤੱਕ ਆਪਣੇ ਲਈ ਵੱਖਰੇ ਕਿਰਦਾਰ ਚੁਣਦੀ ਆਈ ਸ਼ੋਭਿਤਾ ਕਹਿੰਦੀ ਹੈ ਕਿ ਬਾਕਸ ਆਫਿਸ ਦਾ ਦਬਾਅ ਮੈਂ ਨਹੀਂ ਲੈਂਦੀ। ਪੈਸੇ ਚੰਗੇ ਹੁੰਦੇ ਹਨ, ਪਰ ਉਹੀ ਸਭ ਕੁਝ ਨਹੀਂ ਹੈ। ਮੈਂ ਅਜਿਹੇ ਪਰਵਾਰ ਤੋਂ ਹਾਂ, ਜਿੱਥੇ ਖਾਣੇ ਬਾਰੇ ਚਿੰਤਾ ਨਹੀਂ ਰਹੀ। ਮਾਂ ਟੀਚਰ ਅਤੇ ਪਿਤਾ ਮਰਚੈਂਟ ਨੇਵੀ ਵਿੱਚ ਸਨ। ਉਨ੍ਹਾਂ ਨੇ ਹਮੇਸ਼ਾ ਇਹੋ ਕਿਹਾ ਕਿ ਪੈਸਿਆਂ ਨਾਲ ਤੁਸੀਂ ਬਹੁਤ ਕੁਝ ਖਰੀਦ ਸਕਦੇ ਹੋ, ਪਰ ਘਰ ਅਜਿਹੀ ਜਗ੍ਹਾ ਹੁੰਦੀ ਹੈ, ਜਿੱਥੇ ਤੁਸੀਂ ਸਕੂਨ ਨਾਲ ਰਹਿ ਸਕਦੇ ਹੋ। ਆਪਣੀ ਯੋਗਤਾ ਦੇ ਮੁਤਾਬਕ ਅਜਿਹੀਆਂ ਕਹਾਣੀਆਂ ਦਾ ਹਿੱਸਾ ਬਣਨਾ ਚਾਹੁੰਦੀ ਹਾਂ, ਜੋ ਲੋਕਾਂ ਤੱਕ ਪਹੁੰਚਣ।