ਬਠਿੰਡਾ, 13 ਨਵੰਬਰ, (ਪੋਸਟ ਬਿਊਰੋ)- ਵਿਜੀਲੈਂਸ ਬਿਊਰੋ ਨੇ ਬਾਦਲ ਪਰਵਾਰ ਦੇ ਨੇੜੇ ਮੰਨੇ ਜਾਂਦੇ ਸਾਬਕਾ ਚੇਅਰਮੈਨ ਦਿਆਲ ਸਿੰਘ ਕੋਲਿਆਂਵਾਲੀ ਉੱਤੇ ਸ਼ਿਕੰਜਾ ਹੋਰ ਕੱਸਣਾ ਸ਼ੁਰੂ ਕੀਤਾ ਅਤੇ ਉਸ ਨੂੰ ਭਗੌੜਾ ਕਾਰਾਰ ਦੇਣ ਦੀ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਹੈ। ਇਸ ਦੇ ਨਾਲ ਉਸ ਦੀ ਜਾਇਦਾਦ ਦੀ ਮਿਣਤੀ ਵੀ ਆਰੰਭ ਦਿੱਤੀ ਗਈ ਹੈ।
ਅਦਾਲਤ ਤੋਂ ਹੁਕਮ ਲੈਣ ਪਿੱਛੋਂ ਅੱਜ ਵਿਜੀਲੈਂਸ ਨੇ ਪਿੰਡ ਕੋਲਿਆਂਵਾਲੀ ਵਿੱਚ ਦਿਆਲ ਸਿੰਘ ਦੀ ਜੱਦੀ ਰਿਹਾਇਸ਼ `ਤੇ ਨੋਟਿਸ ਲਾ ਦਿੱਤਾ ਤੇ ਤੈਅ ਸਮੇਂ ਵਿਚ ਪੇਸ਼ ਹੋਣ ਦੀ ਹਦਾਇਤ ਦਿੱਤੀ ਹੈ। ਜਾਣਕਾਰ ਸੂਤਰਾਂ ਮੁਤਾਬਕ ਕੋਲਿਆਂਵਾਲੀ ਵੱਲੋਂ ਪੇਸ਼ ਨਾ ਹੋਣ ਉੱਤੇ ਅਦਾਲਤ ਉਸ ਨੂੰ ਭਗੌੜਾ ਐਲਾਨ ਕਰੇਗੀ। ਵਿਜੀਲੈਂਸ ਬਠਿੰਡਾ ਦੇ ਐੱਸ ਐੱਸ ਪੀ ਅਸ਼ੋਕ ਬਾਠ ਦੀ ਅਗਵਾਈ ਹੇਠ ਅੱਜ ਇਕ ਟੀਮ, ਜਿਸ ਵਿਚ ਚੰਡੀਗੜ੍ਹੋਂ ਆਏ ਅਫਸਰ ਵੀ ਸਨ, ਪਿੰਡ ਕੋਲਿਆਂਵਾਲੀ ਵਿਚ ਸਾਬਕਾ ਚੇਅਰਮੈਨ ਦੀ ਕੋਠੀ ਦੀ ਮਿਣਤੀ ਕਰਨ ਗਈ। ਇਸ ਜਾਂਚ ਟੀਮ ਵਿਚ ਲੋਕ ਨਿਰਮਾਣ ਵਿਭਾਗ ਦੇ ਨਿਗਰਾਨ ਇੰਜਨੀਅਰ ਅਤੇ ਕਾਰਜਕਾਰੀ ਇੰਜਨੀਅਰ ਵੀ ਸਨ। ਕੋਠੀ ਦਾ ਰਿਹਾਇਸ਼ ਵਾਲਾ ਹਿੱਸਾ ਬੰਦ ਸੀ, ਪਰ ਬਾਕੀ ਦੇ ਕਰੀਬ 60 ਫ਼ੀਸਦੀ ਦੀ ਮਿਣਤੀ ਕਰ ਲਈ ਗਈ। ਕੋਲਿਆਂਵਾਲੀ ਦੇ ਨਿੱਜੀ ਨੌਕਰ ਅਤੇ ਪਿੰਡ ਦੇ ਕੁੱਝ ਮੋਹਤਬਰ ਇਸ ਮੌਕੇ ਹਾਜ਼ਰ ਸਨ।
ਅਸਲ ਵਿੱਚ ਵਿਜੀਲੈਂਸ ਥਾਣਾ ਮੁਹਾਲੀ ਵਿਚ ਸਾਬਕਾ ਚੇਅਰਮੈਨ ਦਿਆਲ ਸਿੰਘ ਕੋਲਿਆਂ ਵਾਲੀ ਖ਼ਿਲਾਫ਼ 30 ਜੂਨ 2018 ਨੂੰ ਵਸੀਲਿਆਂ ਤੋਂ ਵੱਧ ਜਾਇਦਾਦ ਬਣਾਉਣ ਦੇ ਦੋਸ਼ ਹੇਠ ਕੇਸ ਦਰਜ ਹੋਇਆ ਤੇ ਹਾਈ ਕੋਰਟ ਨੇ 20 ਅਗਸਤ 2018 ਨੂੰ ਉਸ ਦੀ ਜ਼ਮਾਨਤ ਅਰਜ਼ੀ ਰੱਦ ਕਰ ਦਿੱਤੀ ਸੀ। ਓਦੋਂ ਤੋਂ ਉਹ ਲੁਕਿਆ ਹੋਇਆ ਹੈ। ਵਿਜੀਲੈਂਸ ਰੇਂਜ ਬਠਿੰਡਾ ਦੇ ਐੱਸ ਐੱਸ ਪੀ ਅਸ਼ੋਕ ਬਾਠ ਦੇ ਮੁਤਾਬਕ ਕੋਲਿਆਂਵਾਲੀ ਦੇ ਘਰ ਦੀ ਅੱਜ ਤਕਨੀਕੀ ਟੀਮ ਨੇ ਮਿਣਤੀ ਕੀਤੀ, ਜੋ 40 ਫ਼ੀਸਦੀ ਰਿਹਾਇਸ਼ੀ ਹਿੱਸਾ ਬੰਦ ਸੀ, ਉਸ ਦੀ ਮਿਣਤੀ ਲਈ ਟੀਮ ਫਿਰ ਜਾਵੇਗੀ। ਉਨ੍ਹਾਂ ਨੇ ਕਿਹਾ ਕਿ ਕੋਈ ਪਰਿਵਾਰਕ ਮੈਂਬਰ ਅੱਜ ਓਥੇ ਨਹੀਂ ਸੀ ਤੇ ਪੰਜ ਏਕੜ ਦੀ ਰਿਹਾਇਸ਼ ਵਿਚ ਤਬੇਲੇ ਵਗੈਰਾ ਦੀ ਵੀ ਮਿਣਤੀ ਕਰ ਕੇ ਭਗੌੜਾ ਐਲਾਨਣ ਦੀ ਪ੍ਰਕਿਰਿਆ ਹੇਠ ਅੱਜ ਇੱਕ ਨੋਟਿਸ ਇਸ ਰਿਹਾਇਸ਼ ਅੱਗੇ ਚਿਪਕਾਇਆ ਗਿਆ ਹੈ।