ਹੁਸ਼ਿਆਰਪੁਰ, 13 ਨਵੰਬਰ (ਪੋਸਟ ਬਿਊਰੋ)- ਨਿੱਜੀ ਖੰਡ ਮਿੱਲਾਂ ਵੱਲ ਸਰਕਾਰ ਦੇ ਢਿੱਲੇ ਵਿਹਾਰ ਵਾਲੇ ਬੱਦਲ ਗੰਨਾ ਕਿਸਾਨਾਂ 'ਤੇ ਮੰਡਰਾਉਣ ਲੱਗੇ ਹਨ, ਜਿਸ ਬਾਰੇ ਕਿਸਾਨਾਂ 'ਚ ਹਾਹਾਕਾਰ ਮਚੀ ਹੋਈ ਹੈ ਅਤੇ ਉਹ ਸਰਕਾਰ ਨੂੰ ਹਾਈਵੇਜ਼ ਜਾਮ ਕਰਨ ਦੀਆਂ ਚਿਤਾਵਨੀਆਂ ਦੇ ਰਹੇ ਹਨ। ਵਰਨਣ ਯੋਗ ਹੈ ਕਿ ਪੰਜਾਬ ਅੰਦਰ ਚੱਲ ਰਹੀਆਂ ਨਿੱਜੀ ਖੰਡ ਮਿੱਲਾਂ ਦੀ ਸਮਰੱਥਾ ਕੋਆਪਰੇਟਿਵ ਖੰਡ ਮਿੱਲਾਂ ਨਾਲੋਂ ਬਹੁਤ ਵੱਧ ਹੈ, ਜੋ ਲਗਭਗ ਅੱਸੀ ਫੀਸਦੀ ਗੰਨੇ ਦੀ ਪਿੜਾਈ ਕਰਦੀਆਂ ਹਨ, ਜਦ ਕਿ ਸਹਿਕਾਰੀ ਖੰਡ ਮਿੱਲਾਂ ਕਰੀਬ 20 ਫੀਸਦੀ ਗੰਨਾ ਪੀੜਦੀਆਂ ਹਨ।
ਪੰਜਾਬ ਸਰਕਾਰ ਵੱਲੋਂ ਕੋਆਪਰੇਟਿਵ ਖੰਡ ਮਿੱਲਾਂ ਨੂੰ ਚਲਾਉਣ ਦਾ ਉਪਰਾਲਾ ਕੀਤਾ ਜਾਂਦਾ ਹੈ, ਪਰ ਨਿੱਜੀ ਮਿੱਲਾਂ ਵਾਲੇ ਆਪਣੀਆਂ ਸ਼ਰਤਾਂ 'ਤੇ ਅੜੇ ਹੋਣ ਕਰ ਕੇ ਗੰਨਾ ਬਾਂਡ ਨਹੀਂ ਕਰ ਰਹੇ ਹਨ, ਜਿਨ੍ਹਾਂ ਦਾ ਸਰਕਾਰ ਵੱਲੋਂ ਸ਼ਿਕੰਜਾ ਨਹੀਂ ਕੱਸਿਆ ਜਾ ਰਿਹਾ। ਮਿੱਲਾਂ ਵਾਲੇ ਕਹਿੰਦੇ ਹਨ ਕਿ ਖੰਡ ਦਾ ਰੇਟ ਘੱਟ ਹੋਣ ਕਰ ਕੇ ਗੰਨੇ ਦੀ 310 ਰੁਪਏ ਪ੍ਰਤੀ ਕੁਇੰਟਲ ਅਦਾਇਗੀ ਉਹ ਨਹੀਂ ਕਰ ਸਕਦੇ, ਸਿਰਫ 275 ਰੁਪਏ ਦੇ ਸਕਦੇ ਹਨ, ਬਾਕੀ ਸਰਕਾਰ ਦੇਵੇ, ਜਿਵੇਂ ਕੋਆਪਰੇਟਿਵ ਖੰਡ ਮਿੱਲਾਂ ਨੂੰ ਦਿੱਤੀ ਜਾਂਦੀ ਹੈ। ਗੰਨੇ ਦਾ ਪਿੜਾਈ ਸੀਜ਼ਨ ਸਿਰ 'ਤੇ ਹੈ, ਪਰ ਸਰਕਾਰ ਇਸ ਬਾਰੇ ਅਜੇ ਚੁੱਪ ਹੈ, ਜਿਸ ਨੂੰ ਲੈ ਕੇ ਕਿਸਾਨਾਂ ਦੀਆਂ ਚਿੰਤਾ ਵਧ ਰਹੀਆਂ ਹਨ। ਜੇ ਸਰਕਾਰ ਨੇ ਇਸ ਬਾਰੇ ਖਾਮੋਸ਼ੀ ਨਾ ਤੋੜੀ ਤਾਂ ਉਸ ਨੂੰ ਕਿਸਾਨਾਂ ਦੇ ਗੁੱਸੇ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ ਕਿਉਂਕਿ ਇਸ ਸਾਲ ਗੰਨੇ ਦੀ ਫਸਲ ਪਿਛਲੇ ਸਾਲ ਨਾਲੋਂ ਘੱਟ ਵੱਧ ਹੈ।
ਨਿੱਜੀ ਖੰਡ ਮਿੱਲਾਂ ਵਾਲਿਆਂ ਦੇ ਰੁਖ ਨੂੰ ਦੇਖ ਕੇ ਕਿਸਾਨ ਮਿੰਨੀ ਖੰਡ ਮਿੱਲਾਂ ਵਜੋਂ ਜਾਣੇ ਜਾਂਦੇ ਗੁੜ ਬਣਾਉਣ ਵਾਲੇ ਵੇਲਣਿਆਂ 'ਤੇ ਘੱਟ ਰੇਟ 'ਤੇ ਆਪਣਾ ਗੰਨਾ ਵੇਚਣ ਨੂੰ ਮਜਬੂਰ ਹਨ। ਵੇਲਣਿਆਂ ਵਾਲੇ ਕਿਸਾਨਾਂ ਨੂੰ ਦੋਵਾਂ ਹੱਥਾਂ ਨਾਲ ਲੁੱਟ ਰਹੇੇ ਹਨ, ਜੋ ਕਿ ਪ੍ਰਤੀ ਕੁਇੰਟਲ 200 ਜਾਂ 220 ਰੁਪਏ ਤੋਂ ਵੱਧ ਰੇਟ ਨਹੀਂ ਦੇ ਰਹੇ।