ਚੰਡੀਗੜ੍ਹ, 4 ਜੂਨ, (ਪੋਸਟ ਬਿਊਰੋ)- ਭਾਰਤ ਵਿੱਚ ਚੋਣਾਂ ਲੜਨ ਦੇ ਮਾਹਰ ਸਮਝੇ ਜਾਂਦੇ ਪ੍ਰਸ਼ਾਂਤ ਕਿਸ਼ੋਰ ਉਰਫ ‘ਪੀ ਕੇ’ ਦੀ ਭੂਮਿਕਾ ਬਾਰੇ ਕਾਂਗਰਸ ਪਾਰਟੀ ਵਿੱਚ ਖਿੱਚੋਤਾਣ ਚੱਲ ਪਈ ਹੈ। ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਇੱਕ ਵਾਰ ਫਿਰ ਅਗਲੀਆਂ 2022 ਦੀਆਂ ਵਿਧਾਨ ਸਭਾ ਚੋਣਾਂ ਮੌਕੇ ਕਾਂਗਰਸ ਦੀ ਰਣਨੀਤੀ ਘੜਨ ਲਈ ਫਿਰ ਪੀ ਕੇ ਨਾਲ ਗੱਠਜੋੜ ਕਰ ਲੈਣ ਨੂੰ ਠੀਕ ਸਮਝਦੇ ਹਨ। ਇਸ ਸੋਚ ਬਾਰੇ ਉਨ੍ਹਾਂ ਦੀ ਰਾਏ ਤੋਂ ਕਾਂਗਰਸ ਹਾਈ ਕਮਾਨ ਖੁਸ਼ ਨਹੀਂ।
ਮਿਲੀ ਜਾਣਕਾਰੀ ਅਨੁਸਾਰ ਪੀ ਕੇ ਦੀ ਭੂਮਿਕਾ ਬਾਰੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ, ਪਾਰਟੀ ਵੱਲੋਂ ਇਸ ਰਾਜ ਦੀ ਇੰਚਾਰਜ ਆਸ਼ਾ ਕੁਮਾਰੀ ਅਤੇ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਸੁਨੀਲ ਜਾਖੜ ਵਿਚਾਲੇ ਬੈਠਕ ਲਈ ਆਸ਼ਾ ਕੁਮਾਰੀ ਪਿਛਲੇ ਦੋ ਦਿਨ ਚੰਡੀਗੜ੍ਹ ਵਿੱਚ ਸੀ। ਪਤਾ ਲੱਗਾ ਹੈ ਕਿ ਪ੍ਰਦੇਸ਼ ਇੰਚਾਰਜ ਆਸ਼ਾ ਕੁਮਾਰੀ ਬੁੱਧਵਾਰ ਨੂੰ ਚੰਡੀਗੜ੍ਹ ਪੁੱਜੀ ਤੇ ਸੁਨੀਲ ਜਾਖੜ ਵੀ ਦਿੱਲੀ ਤੋਂ ਆ ਗਏ। ਫਿਰ ਆਸ਼ਾ ਕੁਮਾਰੀ ਤੇ ਜਾਖੜ ਵਿਚਾਲੇ ਲੰਬੀ ਬੈਠਕ ਤੋਂ ਬਾਅਦ ਇਹ ਦੋਵੇਂ ਜਣੇ ਅੱਜ ਮੁੱਖ ਮੰਤਰੀ ਦੇ ਸਿਸਵਾਂ ਵਾਲੇ ਫਾਰਮ ਹਾਊਸ ਉੱਤੇ ਲੰਚ ਵੇਲੇ ਇਕੱਠੇ ਹੋਏ। ਓਥੇ ਕੇਂਦਰ ਸਰਕਾਰ ਦੀ ਖੇਤੀ ਨੀਤੀ ਤੇ ਪੰਜਾਬ ਦੇ ਸਿਆਸੀ ਹਾਲਾਤ ਦੇ ਨਾਲ ਪ੍ਰਸ਼ਾਂਤ ਕਿਸ਼ੋਰ ਦਾ ਮੁੱਦਾ ਵਿਚਾਰ ਹੇਠ ਆਇਆ। ਮੁੱਖ ਮੰਤਰੀ ਨੇ 2022 ਵਿੱਚ ਪੀ ਕੇ ਦੀਆਂ ਸੇਵਾਵਾਂ ਫਿਰ ਲੈਣ ਬਾਰੇ ਇੱਛਾ ਪ੍ਰਗਟ ਕੀਤੀ ਸੀ, ਪਰ ਪਾਰਟੀ ਹਾਈ ਕਮਾਨ ਇਸ ਗੱਲ ਤੋਂ ਨਾਰਾਜ਼ ਹੈ ਕਿ ਕੈਪਟਨ ਅਮਰਿੰਦਰ ਸਿੰਘ ਵਿਧਾਨ ਸਭਾ ਚੋਣ ਬਾਰੇ ਆਪਣੇ ਆਪ ਫੈਸਲੇ ਕਿਵੇਂ ਕਰ ਸਕਦੇ ਹਨ। ਹਾਈ ਕਮਾਨ ਨੂੰ ਇਸ ਗੱਲ ਦੀ ਵੀ ਚਿੰਤਾ ਕਿ ਪੀ ਕੇ ਅੱਜਕੱਲ੍ਹ ਨਵਜੋਤ ਸਿੰਘ ਸਿੱਧੂ ਨੂੰ ਆਮ ਆਦਮੀ ਪਾਰਟੀ ਵਿੱਚ ਲਿਜਾਣ ਦੇ ਯਤਨ ਵੀ ਕਰ ਰਿਹਾ ਹੈ, ਜਿਸ ਨਾਲ ਕਾਂਗਰਸ ਦੇ ਮੁਕਾਬਲੇ ਦੀ ਧਿਰ ਖੜੀ ਹੋ ਸਕਦੀ ਹੈ।
ਚੰਡੀਗੜ੍ਹ ਵਿਚਲੇ ਉੱਚ ਪੱਧਰੀ ਸੂਤਰਾਂ ਮੁਤਾਬਕ ਇਹ ਸਾਰਾ ਕੁਝ ਓਦੋਂ ਵਾਪਰਿਆ ਹੈ, ਜਦੋਂ ਸਾਲ 2022 ਬਾਰੇ ਪਾਰਟੀ ਦੇ ਦੂਸਰੀ ਪਾਲ ਦੇ ਆਗੂ ਬੋਲਣ ਲੱਗ ਪਏ ਹਨ। ਇਸ ਨਾਲ ਇਹ ਸ਼ੱਕ ਵੀ ਪੈਦਾ ਕੀਤਾ ਜਾ ਰਿਹਾ ਹੈ ਕਿ ਅਗਲੀ ਵਾਰੀ ਵਿਧਾਨ ਸਭਾ ਚੋਣਾਂ ਵਿੱਚ ਕੈਪਟਨ ਅਮਰਿੰਦਰ ਸਿੰਘ ਪਾਰਟੀ ਦੀ ਕਮਾਨ ਸਾਂਭਣਗੇ ਜਾਂ ਨਹੀਂ। ਇਸ ਹਾਲਤ ਵਿੱਚ ਜੇ ਉਹ ਅਗਲੀਆਂ ਚੋਣਾਂ ਬਾਰੇ ਪੀ ਕੇ ਨੂੰ ਗੰਢ ਲੈਣ ਤਾਂ ਸਾਫ ਹੋਵੇਗਾ ਕਿ ਅਗਲੀ ਵਾਰੀ ਵੀ ਉਹੀ ਅਗਵਾਈ ਕਰਨਗੇ।