ਹੋਦੀਦਾ, 12 ਨਵੰਬਰ (ਪੋਸਟ ਬਿਊਰੋ)- ਯਮਨ ਵਿੱਚ ਬਾਗੀਆਂ ਤੇ ਫੌਜ ਵਿਚਾਲੇ ਚੱਲਦਾ ਸੰਘਰਸ਼ ਰੁਕਣ ਦਾ ਨਾਂ ਨਹੀਂ ਲੈ ਰਿਹਾ ਹੈ। ਇਥੇ ਲਾਲ ਸਾਗਰ ਦੇ ਤੱਟ 'ਤੇ ਸ਼ਹਿਰ ਹੋਦੀਦਾ ਵਿੱਚ ਪਿਛਲੇ 10 ਦਿਨਾਂ ਵਿੱਚ 400 ਤੋਂ ਵੱਧ ਲੋਕਾਂ ਦੀ ਜਾਨ ਜਾ ਚੁੱਕੀ ਹੈ। ਹੋਦੀਦਾ ਰਣਨੀਤਕ ਰੂਪ ਤੋਂ ਮਹੱਤਵ ਪੂਰਨ ਸ਼ਹਿਰ ਹੈ। 2014 'ਚ ਰਾਜਧਾਨੀ ਸਨਾ ਅਤੇ ਕਈ ਤੱਟੀ ਸ਼ਹਿਰਾਂ 'ਤੇ ਕਬਜ਼ੇ ਦੌਰਾਨ ਹੌਥੀ ਵਿਦਰੋਹੀਆਂ ਨੇ ਇਥੇ ਵੀ ਕਬਜ਼ਾ ਕਰ ਲਿਆ ਸੀ।
ਹਾਲ ਦੀ ਘੜੀ ਫੌਜ ਇਸ ਇਲਾਕੇ ਨੂੰ ਫਿਰ ਆਪਣੇ ਕਬਜ਼ੇ ਵਿੱਚ ਲੈਣ ਲਈ ਬਾਗੀਆਂ ਨਾਲ ਮੁਕਾਬਲਾ ਕਰ ਰਹੀ ਹੈ। ਫੌਜੀ ਸੂਤਰਾਂ ਮੁਤਾਬਕ ਹੋਦੀਦਾ 'ਚ ਹੋਏ ਵੱਖ-ਵੱਖ ਮੁਕਾਬਲਿਆਂ ਵਿੱਚ 43 ਹੌਦੀ ਬਾਗੀਆਂ ਅਤੇ ਨੌਂ ਸਰਕਾਰ ਸਮਰੱਥਕਾਂ ਦੀ ਮੌਤ ਹੋਈ ਹੈ। ਇਸ ਦੌਰਾਨ ਹੋਦੀਦਾ ਦੇ ਦੱਖਣ 'ਚ ਮੋਖਾ ਇਲਾਕੇ ਵਿੱਚ ਵੀ ਨੌਂ ਸਰਕਾਰ ਸਮਰਥਕ ਲੜਾਕੇ ਮਾਰੇ ਗਏ। ਅਧਿਕਾਰੀਆਂ ਨੇ ਦੱਸਿਆ ਕਿ ਕਰੜੇ ਸੰਘਰਸ਼ ਪਿੱਛੋਂ ਸਰਕਾਰੀ ਫੋਰਸ ਨੇ ਕੱਲ੍ਹ ਹੋਦੀਦਾ ਦਾ ਮੁੱਖ ਹਸਪਤਾਲ ਨੂੰ ਫਿਰ ਆਪਣੇ ਕਬਜ਼ੇ 'ਚ ਲੈ ਲਿਆ। ਵਿਸ਼ਵ ਸਿਹਤ ਸੰਗਠਨ ਦੇ ਮੁਤਾਬਕ 2015 'ਚ ਹੌਥੀ ਵਿਦਰੋਹੀਆਂ ਖਿਲਾਫ ਮੁਹਿੰਮ ਵਿੱਚ ਸਾਊਦੀ ਅਰਬ ਅਤੇ ਉਸ ਦੇ ਸਹਿਯੋਗੀਆਂ ਦੇ ਸ਼ਾਮਲ ਹੋਣ ਪਿੱਛੋਂ ਹੁਣ ਤੱਕ ਕਰੀਬ 10 ਹਜ਼ਾਰ ਲੋਕਾਂ ਦੀ ਜਾਨ ਜਾ ਚੁੱਕੀ ਹੈ।