ਟੋਰਾਂਟੋ, 25 ਮਈ (ਪੋਸਟ ਬਿਊਰੋ) : ਕੋਵਿਡ-19 ਕੇਸਾਂ ਵਿੱਚ ਹੋਏ ਵਾਧੇ ਕਾਰਨ ਪ੍ਰੋਵਿੰਸ ਵੱਲੋਂ ਸੋਸ਼ਲ ਗੈਦਰਿੰਗਜ਼ ੳੱੁਤੇ ਲਾਈਆਂ ਗਈਆਂ ਪਾਬੰਦੀਆਂ ਨੂੰ ਹਾਲ ਦੀ ਘੜੀ ਨਾ ਹਟਾਉਣ ਦਾ ਫੈਸਲਾ ਕੀਤਾ ਗਿਆ ਹੈ।
ਲਗਾਤਾਰ ਪੰਜਵੇਂ ਦਿਨ ਓਨਟਾਰੀਓ ਵੱਲੋਂ ਇੱਕ ਦਿਨ ਵਿੱਚ ਕੋਵਿਡ-19 ਦੇ 400 ਨਵੇਂ ਮਾਮਲੇ ਸਾਹਮਣੇ ਆਉਣ ਬਾਰੇ ਰਿਪੋਰਟ ਕੀਤੀ। ਸੋਮਵਾਰ ਨੂੰ ਪ੍ਰੋਵਿੰਸ਼ੀਅਲ ਹੈਲਥ ਅਧਿਕਾਰੀਆਂ ਵੱਲੋਂ ਨੋਵਲ ਕਰੋਨਾਵਾਇਰਸ ਦੇ 404 ਨਵੇਂ ਮਾਮਲੇ ਦਰਜ ਕੀਤੇ ਗਏ ਤੇ 29 ਮੌਤਾਂ ਰਿਕਾਰਡ ਕੀਤੀਆਂ ਗਈਆਂ। ਇਸ ਨਾਲ ਓਨਟਾਰੀਓ ਵਿੱਚ ਕੋਵਿਡ-19 ਦੇ ਮਰੀਜ਼ਾਂ ਦੀ ਕੱੁਲ ਗਿਣਤੀ 25,904 ਤੱਕ ਅੱਪੜ ਗਈ ਹੈ ਤੇ ਹੁਣ ਤੱਕ ਇੱਥੇ 2102 ਲੋਕ ਇਸ ਵਾਇਰਸ ਕਾਰਨ ਮਾਰੇ ਜਾ ਚੱੁਕੇ ਹਨ। ਹੁਣ ਤੱਕ 19,698 ਲੋਕ ਠੀਕ ਵੀ ਹੋ ਚੱੁਕੇ ਹਨ।
ਸੋਮਵਾਰ ਨੂੰ ਸਿਹਤ ਮੰਤਰੀ ਕ੍ਰਿਸਟੀਨ ਐਲੀਅਟ ਨੇ ਆਖਿਆ ਕਿ ਕੋਵਿਡ-19 ਮਾਮਲਿਆਂ ਵਿੱਚ ਵਾਧਾ ਲੋਕਾਂ ਵੱਲੋਂ ਵੀਕੈਂਡ ਉੱਤੇ ਮਦਰਜ਼ ਡੇਅ ਮੌਕੇ ਸੋਸ਼ਲ ਗੈਦਰਿੰਗਜ਼ ਸਬੰਧੀ ਤੋੜੇ ਗਏ ਨਿਯਮਾਂ ਕਾਰਨ ਵੀ ਹੋ ਰਿਹਾ ਹੋ ਸਕਦਾ ਹੈ। ਉਨ੍ਹਾਂ ਆਖਿਆ ਕਿ ਟ੍ਰਿਨਿਟੀ ਬੈਲਵੁਡਜ਼ ਤੇ ਹੋਰਨਾਂ ਪਾਰਕਾਂ ਵਿੱਚ ਲੋਕਾਂ ਦੇ ਇੱਕਠ ਨੂੰ ਵੇਖ ਕੇ ਸੋਸ਼ਲ ਗੈਦਰਿੰਗਜ਼ ਉੱਤੇ ਲਾਈਆਂ ਗਈਆਂ ਪਾਬੰਦੀਆਂ ਨੂੰ ਹਾਲ ਦੀ ਘੜੀ ਨਾ ਹਟਾਉਣ ਦਾ ਫੈਸਲਾ ਜਾਰੀ ਰੱਖਿਆ ਜਾ ਸਕਦਾ ਹੈ।