ਸੰਗਰੂਰ, 8 ਨਵੰਬਰ (ਪੋਸਟ ਬਿਊਰੋ)- ਕਮੇਟੀ ਦੇ 10 ਲੱਖ ਰੁਪਏ ਵਾਪਸ ਨਾ ਮਿਲਣ ਤੋਂ ਪ੍ਰੇਸ਼ਾਨ ਇੱਕ ਵਿਅਕਤੀ ਨੇ ਨਹਿਰ ਵਿੱਚ ਛਾਲ ਮਾਰ ਕੇ ਖੁਦਕੁਸ਼ੀ ਕਰ ਲਈ ਹੈ। ਉਸ ਨੇ ਸੁਸਾਈਡ ਨੋਟ ਵਿੱਚ ਇਸ ਮੌਤ ਦਾ ਜ਼ਿੰਮੇਵਾਰ ਪੈਸੇ ਵਾਪਸ ਨਾ ਕਰਨ ਵਾਲੇ ਦੁਕਾਨ ਮਾਲਕ ਨੂੰ ਠਹਿਰਾਇਆ ਹੈ। ਪੁਲਸ ਨੇ ਮ੍ਰਿਤਕ ਦੀ ਪਤਨੀ ਦੇ ਬਿਆਨ 'ਤੇ ਦੋਸ਼ੀ ਦੁਕਾਨ ਮਾਲਕ 'ਤੇ ਇਸ ਖੁਦਕੁਸ਼ੀ ਦੇ ਸੰਬੰਧ ਵਿੱਚ ਕੇਸ ਦਰਜ ਕਰ ਲਿਆ ਹੈ।
ਸੁਨਾਮ ਦੇ ਮੁਹੱਲਾ ਕੋਕੋਮਾਜਰੀ ਦੀ ਸੰਗੀਤਾ ਦੇਵੀ ਨੇ ਪੁਲਸ ਨੂੰ ਦੱਸਿਆ ਕਿ ਉਸ ਦਾ ਪਤੀ ਤੇਜਿੰਦਰ ਸਿੰਘ ਇੱਕ ਨਵੰਬਰ ਨੂੰ ਘਰੋਂ ਬਿਨਾਂ ਦੱਸੇ ਚਲਾ ਗਿਆ ਸੀ। ਤਿੰਨ ਨਵੰਬਰ ਨੂੰ ਉਸ ਦੀ ਲਾਸ਼ ਫਤਿਹਾਬਾਦ (ਹਰਿਆਣਾ) ਅਮਲੋਹਾ ਦੀ ਨਹਿਰ ਵਿੱਚੋਂ ਮਿਲੀ। ਉਸ ਪਤੀ ਦੀ ਦੁਕਾਨ ਤੋਂ ਸੁਸਾਈਡ ਨੋਟ ਵੀ ਮਿਲਿਆ। ਇਸ ਵਿੱਚ ਉਸ ਨੇ ਏਸ਼ੀਆਡ ਪ੍ਰਿੰਟਿੰਗ ਦੇ ਮਾਲਕ ਦਰਬਾਰਾ ਸਿੰਘ ਨੂੰ ਮੌਤ ਦਾ ਜ਼ਿੰਮੇਵਾਰ ਦੱਸਿਆ ਹੈ, ਕਿਉਂਕਿ ਉਸ ਦੇ ਪਤੀ ਨੇ ਦਰਬਾਰਾ ਸਿੰਘ ਕੋਲੋਂ ਬੋਲੀ ਦੀਆਂ ਕਮੇਟੀਆਂ ਦੇ 10 ਲੱਖ ਰੁਪਏ ਲੈਣੇ ਸਨ। ਉਸ ਦੇ ਪਤੀ ਨੇ ਕਈ ਵਾਰ ਦਰਬਾਰਾ ਸਿੰਘ ਤੋਂ ਪੈਸੇ ਮੰਗੇ, ਪਰ ਉਹ ਹਰ ਵਾਰ ਟਾਲ-ਮਟੋਲ ਕਰਦਾ ਰਿਹਾ। ਫਿਰ ਦਰਬਾਰਾ ਸਿੰਘ ਨੇ ਪੈਸੇ ਦੇਣ ਤੋਂ ਮਨ੍ਹਾ ਕਰ ਦਿੱਤਾ। ਇਸ ਤੋਂ ਪ੍ਰੇਸ਼ਾਨ ਹੋ ਕੇ ਉਸ ਦੇ ਪਤੀ ਨੇ ਨਹਿਰ ਵਿੱਚ ਛਾਲ ਮਾਰ ਕੇ ਖੁਦਕੁਸ਼ੀ ਕਰ ਲਈ ਹੈ।