ਚੰਡੀਗੜ੍ਹ, 1 ਨਵੰਬਰ (ਪੋਸਟ ਬਿਊਰੋ)- ਪੰਜਾਬ ਪੁਲਸ ਨੇ ਪੂਰੇ ਦੇਸ਼ 'ਚੋਂ ਡਿਜੀਟਲ ਕ੍ਰਿਮੀਨਲ ਇੰਟੈਲੀਜੈਂਸ ਗਜਟ ਅਤੇ ਸਟੇਟ ਕਰਾਈਮ ਰਿਕਾਰਡ ਬਿਊਰੋ (ਐੱਸ ਸੀ ਆਰ ਬੀ) ਦੀਆਂ ਰਿਪੋਰਟਾਂ ਦੀ ਤਿਆਰੀ ਲਈ ਅਪਰਾਧ ਅਤੇ ਕ੍ਰਿਮੀਨਲ ਟਰੈਕਿੰਗ ਨੈੱਟਵਰਕ ਅਤੇ ਸਿਸਟਮ (ਸੀ ਸੀ ਟੀ ਐੱਨ ਐੱਸ) ਦਾ ਇਨਾਮ ਪ੍ਰਾਪਤ ਕੀਤਾ ਹੈ। ਵੀ ਕੇ ਭਾਵੜਾ ਡੀ ਜੀ ਪੀ, ਆਈ ਟੀ ਐਂਡ ਟੀ ਨੇ ਇਹ ਪੁਰਸਕਾਰ ਕੇਂਦਰੀ ਗ੍ਰਹਿ ਸਕੱਤਰ ਰਾਜੀਵ ਗਾਬਾ, ਡਾਇਰੈਕਟਰ ਖੁਫੀਆ ਬਿਊਰੋ ਰਾਜੀਵ ਜੈਨ, ਡਾਇਰੈਕਟਰ ਐਨ ਸੀ ਆਰ ਬਹੀ ਈਸ਼ ਕੁਮਾਰ ਅਤੇ ਕੇਂਦਰੀ ਜਾਇੰਟ ਸਕੱਤਰ ਪੁਨੀਆ ਸ੍ਰੀਵਾਸਤਵ ਤੋਂ ਨਵੀਂ ਦਿੱਲੀ ਵਿਖੇ ਇੱਕ ਸਮਾਗਮ ਦੌਰਾਨ ਪ੍ਰਾਪਤ ਕੀਤਾ ਹੈ।
ਇਸ ਮੌਕੇ ਪੰਜਾਬ ਪੁਲਸ ਦੀਆਂ ਪ੍ਰਾਪਤੀਆਂ ਦੀ ਸ਼ਲਾਘਾ ਕਰਦਿਆਂ ਡੀ ਜੀ ਪੀ ਸੁਰੇਸ਼ ਅਰੋੜਾ ਨੇ ਸਮੁੱਚੀ ਪੁਲਸ ਅਤੇ ਖਾਸ ਤੌਰ ਉੱਤੇ ਆਈ ਟੀ ਐਂਡ ਟੀ ਵਿੰਗ ਦੇ ਅਧਿਕਾਰੀਆਂ ਅਤੇ ਮੁਲਾਜ਼ਮਾਂ ਨੂੰ ਵਧਾਈ ਦਿੰਦਿਆਂ ਕਿਹਾ ਕਿ ਇਹ ਸਨਮਾਨ ਸਾਡੇ ਲਈ ਮਾਣ ਵਾਲੀ ਗੱਲ ਹੈ ਜਿਸ ਨਾਲ ਪੰਜਾਬ ਪੁਲਸ ਦੀਆਂ ਪ੍ਰਾਪਤੀਆਂ ਵਿੱਚ ਹੋਰ ਵਾਧਾ ਹੋਇਆ ਹੈ। ਇਸੇ ਤਰ੍ਹਾਂ ਇੰਚਾਰਜ, ਰੇਂਜ ਸਿਖਲਾਈ ਸਕੂਲ ਬਠਿੰਡਾ, ਇੰਸਪੈਕਟਰ ਮੇਜਰ ਸਿੰਘ, ਸਿਸਟਮ ਪ੍ਰਬੰਧਕ ਸੰਗਰੂਰ, ਸਿਪਾਹੀ ਭੁਪਿੰਦਰ ਸਿੰਘ ਅਤੇ ਸਟੇਟ ਪ੍ਰੋਜੈਕਟ ਮਾਨੀਟਿ੍ਰੰਗ ਯੂਨਿਟ ਆਈ ਟੀ ਐਂਡ ਟੀ, ਸਿਪਾਹੀ ਗੁਰਪ੍ਰੀਤ ਸਿੰਘ ਨੂੰ ਵੀ ਇਸ ਪ੍ਰੋਜੈਕਟ ਲਈ ਯੋਗਦਾਨ ਪਾਉਣ ਬਦਲੇ ਸਨਮਾਨਤ ਕੀਤਾ ਗਿਆ ਹੈ।