ਮਾਲੇ, 31 ਅਕਤੂਬਰ (ਪੋਸਟ ਬਿਊਰੋ)- ਮਾਲਦੀਵ ਦੇ ਸੁਪਰੀਮ ਕੋਰਟ ਨੇ ਸਾਬਕਾ ਰਾਸ਼ਟਰਪਤੀ ਮੁਹੰਮਦ ਨਸ਼ੀਦ ਦੀ 13 ਸਾਲ ਦੀ ਕੈਦ ਦੀ ਸਜ਼ਾ ਸਸਪੈਂਡ ਕਰ ਦਿੱੱਤੀ ਹੈ। ਇਹ ਸਜ਼ਾ ਉਦੋਂ ਤੱਕ ਲਈ ਮੁਲਤਵੀ ਹੈ ਜਦੋਂ ਤੱਕ ਕਿ ਸਰਕਾਰੀ ਵਕੀਲ ਦੀ ਅਪੀਲ 'ਤੇ ਉਨ੍ਹਾਂ ਦੇ ਦੋਸ਼ਾਂ ਦੀ ਸਮੀਖਿਆ ਨਹੀਂ ਹੋ ਜਾਂਦੀ।
ਇਸ ਸੰਬੰਧ ਵਿੱਚ ਮਾਲਦੀਵ ਦੀ ਸੁਪਰੀਮ ਕੋਰਟ ਨੇ ਆਦੇਸ਼ ਦਿੱਤਾ ਹੈ ਕਿ ਸਰਕਾਰ, ਪੁਲਸ ਤੇ ਪ੍ਰਸ਼ਾਸਨ ਮੁਹੰਮਦ ਨਸ਼ੀਦ ਦੀ ਸਜ਼ਾ ਨੂੰ ਸਸਪੈਂਡ ਰੱਖੇ। ਇਹ ਆਦੇਸ਼ ਅਜਿਹੇ ਸਮੇਂ ਵਿੱਚ ਆਇਆ ਹੈ ਜਦੋਂ ਮੁਹੰਮਦ ਨਸ਼ੀਦ ਦੋ ਦਿਨ ਬਾਅਦ ਮਾਲਦੀਵ ਵੱਲ ਪਰਤਣ ਵਾਲੇ ਹਨ। ਉਨ੍ਹਾਂ ਦੀ ਦੋ ਸਾਲ ਤੋਂ ਵੱਧ ਦੀ ਜਲਾਵਤਨੀ ਖਤਮ ਹੋਣ ਵਾਲੀ ਹੈ। ਸਮਝਿਆ ਜਾਂਦਾ ਹੈ ਕਿ ਆਉਣ ਵਾਲੀ ਸਰਕਾਰ ਨੇ ਇਹ ਕਦਮ ਇਸ ਲਈ ਚੁੱਕਿਆ ਹੈ ਕਿ ਉਨ੍ਹਾਂ ਦੇ ਮਾਲਦੀਵ ਪਹੁੰਚਦੇ ਸਾਰ ਉਨ੍ਹਾਂ ਨੂੰ ਗ੍ਰਿਫਤਾਰ ਕਰਨ ਤੋਂ ਬਚਾਇਆ ਜਾ ਸਕੇ। ਵਰਨਣ ਯੋਗ ਹੈ ਕਿ ਸਰਕਾਰੀ ਵਕੀਲ ਦੇ ਦਫਤਰ ਨੇ ਪਿਛਲੇ ਐਤਵਾਰ ਨੂੰ ਸੁਪਰੀਮ ਕੋਰਟ ਤੋਂ ਅੱਤਵਾਦ ਦੇ ਸਖਤ ਕਾਨੂੰਨ ਤਹਿਤ ਨਸ਼ੀਦ ਦੇ ਦੋਸ਼ ਦੀ ਸਮੀਖਿਆ ਕਰਨ ਦੀ ਅਪੀਲ ਕੀਤੀ ਸੀ। ਨਸ਼ੀਦ 'ਤੇ ਦੋਸ਼ ਹੈ ਕਿ ਸਾਲ 2012 'ਚ ਉਨ੍ਹਾਂ ਰਾਸ਼ਟਰਪਤੀ ਰਹਿੰਦੇ ਹੋਏ ਫੌਜ ਨੂੰ ਆਦੇਸ਼ ਦੇ ਕੇ ਇਕ ਸੀਨੀਅਰ ਜੱਜ ਨੂੰ ਬੰਦੀ ਬਣਾਇਆ ਸੀ। ਨਸ਼ੀਦ ਦੇ ਹਾਲਾਤ ਉਦੋਂ ਬਦਲੇ ਹਨ ਜਦੋਂ ਪਿਛਲੀ 28 ਸਤੰਬਰ ਨੂੰ ਉਨ੍ਹਾਂ ਦੇ ਪਾਰਟੀ ਉਮੀਦਵਾਰ ਇਬ੍ਰਾਹਿਮ ਮੁਹੰਮਦ ਸੋਲਿਹ ਨੇ ਯਾਮੀਨ ਨੂੰ ਰਾਸ਼ਟਰਪਤੀ ਚੋਣਾਂ 'ਚ ਹਰਾ ਦਿੱਤਾ। ਉਨ੍ਹਾਂ ਦੀ ਜਿੱਤ ਤੋਂ ਬਾਅਦ ਤੋਂ ਜੇਲ੍ਹ 'ਚ ਬੰਦੀ ਕੁਝ ਅਫਸਰਾਂ ਨੂੰ ਛੱਡਿਆ ਜਾ ਚੁੱਕਾ ਹੈ। ਕੁਝ ਨੂੰ ਜ਼ਮਾਨਤ 'ਤੇ ਛੱਡਿਆ ਗਿਆ ਹੈ ਤੇ ਕੁਝ ਲੋਕ ਵਤਨ ਪਰਤ ਰਹੇ ਹਨ। ਨਸ਼ੀਦ ਨੇ ਕਿਹਾ ਸੀ ਕਿ ਉਹ ਇਕ ਨਵੰਬਰ ਨੂੰ ਮਾਲਦੀਵ ਪਰਤ ਰਹੇ ਹਨ।