* ਅਨਾਜ ਦੀ ਵੰਡ ਕਰਨ ਵੇਲੇ ਵਿਘਨ ਪਾਉਣ ਦਾ ਦੋਸ਼
ਨਕੋਦਰ, 4 ਅਪ੍ਰੈਲ (ਪੋਸਟ ਬਿਊਰੋ)- ਏਥੋਂ ਦੇ ਸਦਰ ਥਾਣੇ ਦੀ ਪੁਲਸ ਨੇ ਕੱਲ੍ਹ ਸਰਕਾਰੀ ਸਕੀਮ ਹੇਠ ਅਨਾਜ ਦੀ ਵੰਡ ਰੋਕਣ ਦੇ ਦੋਸ਼ 'ਚ ਪਿੰਡ ਸਿਧਵਾਂ ਸਟੇਸ਼ਨ ਦੇ ਸਾਬਕਾ ਪੰਚ, ਪਿੰਡ ਦੇ ਇੱਕ ਦੁਕਾਰਨਦਾਰ ਤੇ 50-60 ਅਣਪਛਾਤੇ ਲੋਕਾਂ 'ਤੇ ਕੇਸ ਦਰਜ ਕੀਤਾ ਅਤੇ ਅੱਗੇ ਦੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
ਇਸ ਬਾਰੇ ਥਾਣਾ ਮੁਖੀ ਸਿਕੰਦਰ ਸਿੰਘ ਵਿਰਕ ਨੇ ਦੱਸਿਆ ਕਿ ਦੋਸ਼ੀਆਂ ਦੀ ਪਛਾਣ ਪਿੰਡ ਸਿਧਵਾਂ ਸਟੇਸ਼ਨ ਪਿੰਡ ਦੇ ਦੁਕਾਨਦਾਰ ਕੋਕੀ ਤੇ ਸਾਬਕਾ ਪੰਚ ਜੀਤ ਰਾਮ ਵਜੋਂ ਹੋਈ ਤੇ ਪਿੰਡ ਦੇ 50-60 ਅਣਪਛਾਤੇ ਲੋਕ ਉਨ੍ਹਾਂ ਦੇ ਨਾਲ ਹਨ। ਨਕੋਦਰ ਦੇ ਖੁਰਾਕ ਤੇ ਸਿਵਲ ਸਪਲਾਈ ਇੰਸਪੈਕਟਰ ਸੁਖਜਿੰਦਰ ਪਾਲ ਸਿੰਘ ਨੇ ਸ਼ਿਕਾਇਤ ਕੀਤੀ ਕਿ ਉਸ ਨੇ ਨਕੋਦਰ ਦੇ ਸਰਬਜੀਤ ਉਰਫ ਸਾਬੀ ਦੇ ਟਰੱਕ ਵਿੱਚ ਪਿੰਡ ਸਿੱਧਵਾਂ ਸਟੇਸ਼ਨ ਵਿਖੇ ਸਰਕਾਰੀ ਆਟਾ, ਦਾਲ, ਸਕੀਮ ਤਹਿਤ ਕਣਕ ਵੰਡਣ ਲਈ ਭੇਜੀ ਸੀ, ਜਿਸ ਦੀ ਵੰਡ ਡਿਪੂ ਹੋਲਡਰ ਮਨਜੀਤ ਸਿੰਘ ਨਵਾਂ ਪਿੰਡ ਅਰਾਈਆਂ ਕਰ ਰਿਹਾ ਸੀ। ਮਨਜੀਤ ਸਿੰਘ ਨੇ ਕੱਲ੍ਹ ਸਵੇਰੇ 6.15 ਵਜੇ ਦੱਸਿਆ ਕਿ ਉਸ ਨੇ ਸਾਰੇ ਕਾਰਡ ਧਾਰਕਾਂ ਨੂੰ ਕਣਕ ਵੰਡ ਦਿੱਤੀ ਹੈ ਅਤੇ ਬਾਕੀ ਕਣਕ ਟਰੱਕ ਵਿੱਚ ਲੱਦ ਕੇ ਸਟੋਰਿੰਗ ਲਈ 100 ਬੈਗ ਪਿੰਡ ਲਿਜਾ ਰਿਹਾ ਸਾਂ ਤਾਂ ਪਿੰਡ ਸਿਧਵਾਂ ਸਟੇਸ਼ਨ ਦੇ ਸਾਬਕਾ ਪੰਚ ਜੀਤ ਰਾਮ ਅਤੇ ਵੈਲਡਿੰਗ ਦੀ ਦੁਕਾਨ ਵਾਲੇ ਕੋਕੀ ਅਤੇ ਉਨ੍ਹਾਂ ਨਾਲ 50-60 ਅਣਪਛਾਤੇ ਨੌਜਵਾਨ ਉਥੇ ਪਹੁੰਚ ਗਏ ਤੇ ਇਹ ਕਹਿ ਕੇ ਟਰੱਕ ਰੋਕ ਲਿਆ ਹੈ ਕਿ ਕਣਕ ਪਿੰਡ ਦੀ ਹੈ ਤੇ ਇਸ ਨੂੰ ਵਾਪਸ ਨਹੀਂ ਲੈ ਕੇ ਜਾਣ ਦੇਣਾ। ਡਿਪੂ ਧਾਰਕ ਨੇ ਉਨ੍ਹਾਂ ਨੂੰ ਦੱਸਿਆ ਕਿ ਕੋਵਿਡ-19 ਦੇ ਕਾਰਨ ਜਲੰਧਰ ਵਿੱਚ ਕਰਫਿਊ ਲੱਗ ਗਿਆ ਹੈ ਤੇ ਚਾਰ ਤੋਂ ਵੱਧ ਵਿਅਕਤੀ ਇੱਕ ਜਗ੍ਹਾ ਇਕੱਠੇ ਨਹੀਂ ਹੋ ਸਕਦੇ ਅਤੇ ਤੁਸੀਂ ਟਰੱਕ ਨੂੰ ਤੁਰਨ ਤੋਂ ਨਹੀਂ ਰੋਕ ਸਕਦੇ। ਫੂਡ ਐਂਡ ਸਿਵਲ ਸਪਲਾਈ ਇੰਸਪੈਕਟਰ ਸੁਖਜਿੰਦਰ ਪਾਲ ਮੌਕੇ 'ਤੇ ਪਹੁੰਚੇ ਅਤੇ ਜੀਤ ਰਾਮ ਅਤੇ ਹੋਰਨਾਂ ਨੂੰ ਸਮਝਾਉਣ ਦੀ ਕੋਸ਼ਿਸ਼ ਕੀਤੀ ਪਰ ਉਨ੍ਹਾਂ ਨੇ ਬਹਿਸ ਸ਼ੁਰੂ ਕਰ ਦਿੱਤੀ। ਇਸ ਮੌਕੇ ਪੁਲਸ ਉਥੇੇ ਆ ਗਈ ਤੇ ਸਾਰੇ ਭੱਜ ਗਏ। ਐਸ ਐਚ ਓ ਅਤੇ ਏ ਐਸ ਪੀ ਵਤਸਲਾ ਗੁਪਤਾ ਵੀ ਸਿੱਧਵਾਂ ਸਟੇਸ਼ਨ ਪਿੰਡ ਪਹੁੰਚੇ ਅਤੇ ਪੁਲਸ ਨੂੰ ਦੰਗਾਕਾਰੀਆਂ ਨਾਲ ਸਖ਼ਤ ਨਾਲ ਨਜਿੱਠਣ ਲਈ ਨਿਰਦੇਸ਼ ਦਿੱਤੇ। ਥਾਣਾ ਮੁਖੀ ਸਿੰਕਦਰ ਸਿੰਘ ਨੇ ਦੱਸਿਆ ਕਿ ਮੁਲਜ਼ਮਾਂ ਖ਼ਿਲਾਫ਼ ਮੁਕੱਮਦਾ ਦਰਜ ਕਰ ਲਿਆ ਹੈ।