ਜਲੰਧਰ, 4 ਅਪ੍ਰੈਲ (ਪੋਸਟ ਬਿਊਰੋ)- ਇਸ ਮਹਾਨਗਰ ਦੀ ਪੁਲਸ ਨੇ ਅਗਰਵਾਲ ਸਭਾ ਦੇ ਪ੍ਰਧਾਨ ਅਵਿਨਾਸ਼ ਸਿੰਗਲਾ ਨੂੰ ਜਾਅਲੀ ਕਰਫਿਊ ਪਾਸ ਬਣਾਉਣ 'ਤੇ ਗ਼੍ਰਿਫ਼ਤਾਰ ਕੀਤਾ ਹੈ। ਅਵਿਨਾਸ਼ ਸਿੰਗਲਾ ਨੇ ਦੋ ਲੋਕਾਂ ਲਈ ਨਾਜਾਇਜ਼ ਪਾਸ ਜਾਰੀ ਕੀਤੇ ਸਨ। ਇਸ ਦਾ ਪਤਾ ਉਦੋਂ ਲੱਗਾ, ਜਦੋਂ ਸਿੰਗਲਾ ਵੱਲੋਂ ਇਸ਼ੂ ਕੀਤਾ ਪਾਸ ਕਿਸੇ ਨੇ ਸੋਸ਼ਲ ਸਾਈਟ ਉਤੇ ਪਾ ਦਿੱਤਾ ਅਤੇ ਜਦੋਂ ਪੁਲਸ ਤੱਕ ਗੱਲ ਪਹੁੰਚੀ ਤਾਂ ਪੁਲਸ ਨੇ ਉਸ ਨੂੰ ਗ਼੍ਰਿ੍ਰਫ਼ਤਾਰ ਕਰ ਲਿਆ।
ਥਾਣਾ-8 ਦੇ ਇੰਚਾਰਜ ਸੁਖਜੀਤ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਸੂਚਨਾ ਮਿਲੀ ਸੀ ਕਿ ਕਿਸੇ ਨੇ ਕਰਫਿਊ ਪਾਸ ਸੋਸ਼ਲ ਸਾਈਟ ਉੱਤੇ ਪਾਇਆ ਹੈ, ਜਿਸ ਉੱਤੇ ਨਾ ਪ੍ਰਸ਼ਾਸਨਿਕ ਅਧਿਕਾਰੀ ਦੇ ਸਾਈਨ ਹਨ ਤੇ ਨਾ ਇਸ਼ੂ ਕਰਨ ਵਾਲੇ ਕੋਲ ਅਥਾਰਟੀ ਹੈ। ਪੁਲਸ ਨੇ ਜਾਂਚ ਕੀਤੀ ਤਾਂ ਪਤਾ ਲੱਗਾ ਕਿ ਅਗਰਵਾਲ ਸਭਾ ਦੇ ਪ੍ਰਧਾਨ ਅਵਿਨਾਸ਼ ਸਿੰਗਲਾ ਨੇ ਉਕਤ ਪਾਸ ਬਣਾ ਕੇ ਜਾਰੀ ਕੀਤਾ ਹੈ ਅਤੇ ਕੁਲ ਦੋ ਪਾਸ ਜਾਰੀ ਕੀਤੇ ਹਨ। ਪੁਲਸ ਨੇ ਅਗਰਵਾਲ ਸਭਾ ਦੇ ਦਫਤਰ 'ਚ ਰੇਡ ਕਰ ਕੇ ਅਵਿਨਾਸ਼ ਸਿੰਗਲਾਂ ਨੂੰ ਗ਼੍ਰਿਫ਼ਤਾਰ ਕਰ ਲਿਆ ਤੇ ਦੋਵੇਂ ਕਰਫਿਊ ਪਾਸ ਵੀ ਬਰਾਮਦ ਕਰ ਲਏੇ ਹਨ।ਥਾਣਾ-8 'ਚ ਪ੍ਰਧਾਨ ਸਿੰਗਲਾ ਵਿਰੁੱਧ ਕੇਸ ਦਰਜ ਕਰ ਕੇ ਪੁਲਸ ਨੇ ਉਸ ਨੂੰ ਜ਼ਮਾਨਤ 'ਤੇ ਛੱਡ ਦਿੱਤਾ ਹੈ। ਪੁਲਸ ਦਾ ਕਹਿਣਾ ਹੈ ਕਿ ਨਾਜਾਇਜ਼ ਤਰੀਕੇ ਨਾਲ ਕਰਫਿਊ ਕਾਰਡ ਇਸ਼ੂ ਕਰਨ ਜਾਂ ਵਰਤਣ 'ਤੇ ਸਖ਼ਤ ਕਾਰਵਾਈ ਹੋਵੇਗੀ।