ਨਵੀਂ ਦਿੱਲੀ, 3 ਅਪਰੈਲ, (ਪੋਸਟ ਬਿਊਰੋ)- ਭਾਰਤ ਵਿੱਚ ਕੋਰੋਨਾ ਦੀ ਬਿਮਾਰੀ ਦੇ ਪੀੜਤਾਂ ਦੀ ਗਿਣਤੀ ਲਗਾਤਾਰ ਵਧ ਰਹੀ ਹੈ। ਸ਼ੁੱਕਰਵਾਰ ਸਵੇਰ ਹੋਣ ਤੱਕ ਦੇਸ਼ ਵਿੱਚ 343 ਨਵੇਂ ਕੇਸਾਂ ਨਾਲ ਕੋਰੋਨਾ ਪਾਜਿ਼ਟਿਵ ਕੇਸਾਂ ਦੀ ਗਿਣਤੀ 2500 ਤੋਂ ਵੱਧ ਹੋ ਗਈ ਹੈ ਤੇ ਇੱਕੋ ਦਿਨ 14 ਹੋਰ ਮੌਤਾਂ ਹੋਣ ਨਾਲ ਮ੍ਰਿਤਕਾਂ ਦੀ ਗਿਣਤੀ 73 ਹੋ ਗਈ ਹੈ।
ਅੱਜ ਵੀਰਵਾਰ ਨੂੰ ਤਾਮਿਲ ਨਾਡੂ ਵਿੱਚ 75 ਕੇਸ ਪਾਜਿ਼ਟਿਵ ਮਿਲੇ ਹਨ, ਜਿਨ੍ਹਾਂ ਵਿੱਚੋਂ 74 ਜਣੇ ਦਿੱਲੀ ਦੇ ਮਰਕਜ਼ ਵਿੱਚ ਹਿੱਸਾ ਲੈ ਕੇ ਮੁੜੇ ਸਨ। ਇਸ ਰਾਜ ਵਿੱਚ ਪੀੜਤਾਂ ਦੀ ਗਿਣਤੀ 309 ਹੋ ਗਈ ਹੈ। ਆਂਧਰਾਂ ਪ੍ਰਦੇਸ਼ ਵਿੱਚ ਵੀਰਵਾਰ ਨੂੰ 32 ਨਵੇਂ ਕੇਸ ਪਤਾ ਲੱਗਣ ਨਾਲ ਕੁੱਲ ਗਿਣਤੀ 143 ਹੋ ਗਈ ਹੈ। ਇੱਥੇ ਪਾਜਿ਼ਟਿਵ ਨਿਕਲੇ ਸਾਰੇ ਨਵੇਂ ਕੇਸ ਤਬਲੀਗੀ ਜਮਾਤ ਦੇ ਮਰਕਜ਼ ਤੋਂ ਆਏ ਲੋਕ ਹਨ। ਕੇਰਲ ਵਿੱਚ ਵੀਰਵਾਰ ਨੂੰ 21 ਨਵੇਂ ਕੇਸ ਪਤਾ ਲੱਗਣ ਨਾਲ ਕੁੱਲ ਗਿਣਤੀ 286 ਹੋ ਗਈ ਹੈ। ਮਹਾਰਾਸ਼ਟਰ ਵਿੱਚ ਅੱਜ 81 ਨਵੇਂ ਕੇਸਾਂ ਨਾਲ ਪੀੜਤਾਂ ਦਾ ਅੰਕੜਾ 416 ਉੱਤੇ ਹੋ ਗਿਆ। ਇਸ ਰਾਜ ਵਿੱਚ ਕੋਰਨਾ ਦੇ ਕਾਰਨ 19 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਸਿਹਤ ਮੰਤਰਾਲੇ ਮੁਤਾਬਕ ਤਬਲੀਗੀ ਜਮਾਤ ਨਾਲ ਸਬੰਧਤ ਤਾਮਿਲ ਨਾਡੂ ਵਿੱਚ 173 ਕੇਸ, ਰਾਜਸਥਾਨ 11, ਅੰਡੇਮਾਨ ਅਤੇ ਨਿਕੋਬਾਰ 9, ਦਿੱਲੀ 47, ਪੁੱਡੂਚੇਰੀ ਦੋ, ਜੰਮੂ-ਕਸ਼ਮੀਰ 22, ਤੇਲੰਗਾਨਾ 33, ਆਂਧਰ ਪ੍ਰਦੇਸ਼ 67 ਅਤੇ ਅਸਾਮ ਵਿੱਚ 16 ਲੋਕ ਕੋਰੋਨਾ ਤੋਂ ਪੀੜਤ ਪਾਏ ਗਏ ਹਨ।