ਵਾਸ਼ਿੰਗਟਨ, 3 ਅਪਰੈਲ, (ਪੋਸਟ ਬਿਊਰੋ)- ਕੋਰੋਨਾ ਵਾਇਰਸ ਦੀ ਮਹਾਂਮਾਰੀ ਨਾਲ ਹੋਣ ਵਾਲੀਆਂ ਮੌਤਾਂ ਦੀ ਗਿਣਤੀ ਦਾ ਵਾਧਾ ਵੇਖ ਕੇ ਅਮਰੀਕਾ ਦੇ ਫੌਜੀ ਹੈੱਡ ਕੁਆਰਟਰ ਪੈਂਟਾਗਨ ਨੇ ਇਕ ਲੱਖ ਡੈੱਡ ਬਾਡੀ ਕਫਨ (ਬਾਡੀ ਬੈਗ) ਖਰੀਦਣ ਦਾ ਆਰਡਰ ਦਿੱਤਾ ਹੈ, ਜਿਹੜਾ ਸਥਿਤੀ ਦੀ ਗੰਭੀਰਤਾ ਨੂੰ ਪ੍ਰਗਟ ਕਰਦਾ ਹੈ।
ਮੀਡੀਆ ਰਿਪੋਰਟਾਂ ਅਨੁਸਾਰ ਅਮਰੀਕਾ ਵਿਚ ਕੋਰੋਨਾ ਵਾਇਰਸ ਨਾਲ 2 ਲੱਖ ਮੌਤਾਂ ਹੋਣ ਦੀ ਸੰਭਾਵਨਾ ਵੇਖੀ ਜਾ ਰਹੀ ਹੈ। ਭਾਰਤ ਵਿੱਚ ਸ਼ੁੱਕਰਵਾਰ ਦੀ ਸਵੇਰ ਚੜ੍ਹਨ ਤੱਕ ਅਮਰੀਕਾ ਵਿਚ ਕੋਰੋਨਾ ਨਾਲ 5883 ਮੌਤਾਂ ਹੋ ਚੁੱਕੀਆਂ ਹਨ। ਇਸ ਦੇਸ਼ ਦੇ ਕਰੀਬ 90 ਫੀਸਦੀ ਇਲਾਕੇ ਲਾਕਡਾਊਨ ਹਨ, ਪਰ ਵਾਇਰਸ ਫੈਲਦਾ ਜਾ ਰਿਹਾ ਹੈ। ਦੇਸ਼ ਵਿਚ ਕੋਰੋਨਾ ਦੇ 2,44,190 ਕੇਸ ਪਤਾ ਲੱਗੇ ਹਨ। ਸਰਕਾਰ ਨੇ ਡੈੱਡ ਬਾਡੀ ਲਈ 50 ਹਜ਼ਾਰ ਕਫਨ ਦਾ ਪ੍ਰਬੰਧ ਕੀਤਾ ਹੈ, ਪਰ ਮੌਤਾਂ ਦਾ ਵਾਧਾ ਦੇਖ ਕੇ ਇਸ ਤੋਂ 3 ਗੁਣਾ ਵੱਧ ਡੈੱਡ ਬਾਡੀ ਬੈਗ ਦਾ ਪ੍ਰਬੰਧ ਕੀਤਾ ਜਾਣਾ ਹੈ। ਲਾਸ਼ਾਂ ਰੱਖਣ ਲਈ ਥਾਂ ਘਟਣ ਪਿੱਛੋਂ ਨਿਊਯਾਰਕ ਵਿਚ ਬਰੂਕਲਿਨ ਦੇ ਹਸਪਤਾਲ ਦੇ ਬਾਹਰ ਇਕ ਫਰੀਜ਼ਰ ਟਰੱਕ ਖੜ੍ਹਾ ਕਰ ਕੇ ਲਾਸ਼ਾਂ ਨੂੰ ਇਸ ਵਿਚ ਰੱਖਿਆ ਗਿਆ ਹੈ। ਨਿਊਯਾਰਕ ਰਾਜ ਵਿਚ ਮੌਤਾਂ ਦੀ ਗਿਣਤੀ ਭਾਰਤ ਦੀ ਸ਼ੁੱਕਰਵਾਰ ਦੀ ਸਵੇਰ ਤੱਕ 2373 ਹੋ ਚੁੱਕੀ ਹੈ।
ਫੈਡਰਲ ਐਮਰਜੰਸੀ ਮੈਨੇਜਮੈਂਟ ਏਜੰਸੀ ਡੈੱਡ ਬਾਡੀ ਬੈਗ ਦਾ ਪ੍ਰਬੰਧ ਕਰ ਰਹੀ ਹੈ, ਪਰ ਓਦੋਂ ਤੱਕ ਲਈ ਲਾਸ਼ਾਂ ਨੂੰ ਹਰੇ ਰੰਗ ਦੇ ਨਾਈਲੋਨ ਦੇ ਬਾਡੀ ਬੈਗ ਵਿਚ ਰੱਖਿਆ ਜਾ ਰਿਹਾ ਹੈ। ਇਹ ਬਾਡੀ ਬੈਗ 7.8 ਫੁੱਟ ਲੰਬਾ ਅਤੇ 3.2 ਫੁੱਟ ਚੌੜਾ ਹੁੰਦਾ ਹੈ। ਅਮਰੀਕਾ ਵਿੱਚ ਨਿਊਯਾਰਕ ਤੋਂ ਬਾਅਦ ਸਭ ਤੋਂ ਵੱਧ ਨਿਊ ਜਰਸੀ ਵਿੱਚ 537 ਮੌਤਾਂ ਅਤੇ ਮਿਸ਼ੀਗਨ ਵਿੱਚ 417 ਦੇ ਬਾਅਦ ਲੁਸੀਆਨਾ ਵਿੱਚ 310, ਵਾਸਿ਼ੰਗਟਨ ਵਿੱਚ 272 ਅਤੇ ਕੈਲੀਫੋਰਨੀਆ ਵਿੱਚ 234 ਹੋਈਆਂ ਹਨ।