ਮੁੰਬਈ, 2 ਅਪ੍ਰੈਲ (ਪੋਸਟ ਬਿਊਰੋ)- ਜਦੋਂ ਦੁਨੀਆ ਵਿੱਚ ਕੋਰੋਨਾ ਵਾਇਰਸ ਨਾਲ ਹਜ਼ਾਰਾਂ ਲੋਕਾਂ ਦੀ ਮੌਤ ਅਤੇ ਲੱਖਾਂ ਲੋਕ ਇਨਫੈਕਟਿਡ ਹੋ ਚੁੱਕੇ ਹਨ, ਓਦੋਂ ਡਾਕਟਰ ਬੁਬੋਨਿਕ ਪਲੇਗ ਨੂੰ ਖਤਮ ਕਰਨ ਵਾਲੇ ਜੀਵਾਣੂ ਮਾਹਿਰ ਹਾਫਨਿਕ ਦੇ ਟੀਕੇ ਅਤੇ ਉਸ ਦੀ ਭਾਰਤ 'ਚ ਕੀਤੀ ਗਈ ਉਨ੍ਹਾਂ ਦੀ ਖੋਜ ਨੂੰ ਯਾਦ ਕਰ ਰਹੇ ਹਨ।
ਰੂਸ ਦੇ ਰਹਿਣ ਵਾਲੇ ਹਾਫਕਿਨ ਨੇ ਭਾਰਤ ਵਿੱਚ 22 ਸਾਲ ਬਿਤਾਏ ਸਨ ਅਤੇ ਉਨ੍ਹਾਂ ਨੇ ਸਰਕਾਰੀ ਗ੍ਰਾਂਟ ਮੈਡੀਕਲ ਕਾਲਜ ਅਤੇ ਸਰ ਜੇ ਜੇ ਹਸਪਤਾਲ ਦੀ ਇਮਾਰਤ ਵਿੱਚ ਬੁਬੋਨਿਕ ਪਲੇਗ ਦੇ ਟੀਕੇ ਉੱਤੇ ਖੋਜ ਕੀਤੀ ਸੀ। ਇਸ ਟੀਕੇ ਨੇ ਲੱਖਾਂ ਲੋਕਾਂ ਦੀਆਂ ਜ਼ਿੰਦਗੀਆਂ ਨੂੰ ਬਚਾਇਆ, ਜਿਸ ਨਾਲ ਪੂਰੀ ਮਨੁੱਖਤਾ ਦੀ ਸੇਵਾ ਹੋਈ। ਉਨ੍ਹਾਂ ਨੂੰ ਕਾਲਰਾ ਦਾ ਟੀਕਾ ਵੀ ਬਣਾਉਣ ਦਾ ਸਿਹਰਾ ਦਿੱਤਾ ਜਾਂਦਾ ਹੈ। ਜੇ ਜੇ ਹਸਪਤਾਲ ਦੇ ਰੈਜ਼ੀਡੈਂਟ ਮੈਡੀਕਲ ਅਧਿਕਾਰੀ ਡਾਕਟਰ ਰੇਵਤ ਕਾਨਿੰਦੇ ਨੇ ਦੱਸਿਆ ਕਿ 125 ਸਾਲ ਪਹਿਲਾਂ ਇੱਕ ਵਿਅਕਤੀ ਰੂਸ ਤੋਂ ਇਥੇ ਆਇਆ ਤੇ ਵਿਗਿਆਨਕ ਸੋਚ ਨਾਲ ਇਤਿਹਾਸਕ ਕੰਮ ਕੀਤਾ। ਜੇ ਜੇ ਹਸਪਤਾਲ ਦੇ ਜਿਸ ਕਮਰੇ 'ਚ ਹਾਫਕਿਨ ਨੇ ਟੀਕਾ ਬਣਾਇਆ, ਉਸ ਕਮਰੇ ਦੀ ਵਰਤੋਂ ਐੱਮ ਬੀ ਬੀ ਐੱਸ ਦੇ ਦੂਜੇ ਸਾਲ ਦੇ ਵਿਦਿਆਰਥੀਆਂ ਨੂੰ ਲੈਕਚਰ ਦੇਣ ਲਈ ਕੀਤੀ ਜਾਂਦੀ ਹੈ। ਸਰਕਾਰ ਨੇ ਗ੍ਰਾਂਟ ਮੈਡੀਕਲ ਕਾਲਜ ਅਤੇ ਜੇ ਜੇ ਹਸਪਤਾਲ ਇਮਾਰਤ ਦੀ ਦੀਵਾਰ ਉੱਤੇ ਹਾਫਕਿਨ ਦੇ ਸਨਮਾਨ 'ਚ ਇੱਕ ਬੋਰਡ ਲਾਇਆ, ਜਿਸ ਦਾ ਉਦਘਾਟਨ 27 ਅਗਸਤ 1971 ਨੂੰ ਓਦੋਂ ਦੇ ਰਾਸ਼ਟਰਪਤੀ ਵੀ ਵੀ ਗਿਰੀ ਨੇ ਕੀਤਾ ਸੀ। ਇਹ ਮੈਡੀਕਲ ਕਾਲਜ ਇਸ ਸਾਲ ਮਈ ਵਿੱਚ ਆਪਣਾ 175ਵਾਂ ਸਥਾਪਨਾ ਦਿਵਸ ਮਨਾ ਰਿਹਾ ਹੈ ਤੇ ਇਸ ਵਿੱਚ ਮਹਿਮਾਨ ਦੇ ਰੂਪ ਵਿੱਚ ਰਾਸ਼ਟਰਪਤੀ ਰਮਨਾਥ ਕੋਵਿੰਦ ਨੂੰ ਵੀ ਸੱਦਣ ਦੀ ਯੋਜਨਾ ਹੈ, ਪਰ ਹਾਲੇ ਇਸ ਦੇ ਕਰਮਾਚਰੀ ਕੋਰੋਨਾ ਵਾਇਰਸ ਨਾਲ ਨਜਿੱਠਣ 'ਚ ਲੱਗੇ ਹਨ।