ਜਗਰਾਉਂ, 31 ਮਾਰਚ (ਪੋਸਟ ਬਿਊਰੋ)- ਇਸ ਪੁਲਸ ਜਿ਼ਲੇ ਦੇ ਥਾਣਾ ਹਠੂਰ ਵਿਖੇ ਦੋ ਪੱਤਰਕਾਰਾਂ 'ਤੇ ਕੋਰੋਨਾ ਬਿਮਾਰੀ ਨਾਲ ਸੰਬੰਧਤ ਝੂਠੀਆਂ ਖਬਰਾਂ ਛਪਵਾਉਣ ਅਤੇ ਅਫਵਾਹਾਂ ਫੈਲਾਏ ਜਾਣ ਦਾ ਕੇਸ ਦਰਜ ਗਿਆ ਕੀਤਾ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਰਜਿੰਦਰ ਕੁਮਾਰ (45 ਸਾਲ) ਪੁੱਤਰ ਅਮਰ ਚੰਦ ਪਿੰਡ ਲੰਮਾ-ਜੱਟਪੁਰਾ ਦੀ ਕੋਰੋਨਾ ਵਾਇਰਸ ਨਾਲ ਮੌਤ ਦੀ ਖਬਰ ਇੱਕ ਵੈੱਬ ਅਖਬਾਰ ਵਿੱਚ ਤੱਥਾਂ ਤੋਂ ਰਹਿਤ ਛਪੀ ਸੀ। ਇਸ ਨੇ ਇਲਾਕੇ ਵਿੱਚ ਹਫੜਾ-ਦਫੜੀ ਮਚਾ ਦਿੱਤੀ ਅਤੇ ਪ੍ਰਸ਼ਾਸਨ ਨੂੰ ਹੱਥਾਂ ਪੈਰਾਂ ਦੀ ਪੈ ਗਈ ਸੀ। ਥਾਣਾ ਹਠੂਰ ਦੀ ਪੁਲਸ ਅਤੇ ਹੈੱਲਥ ਸੈਂਟਰ ਹਠੂਰ ਦੇ ਡਾਕਟਰਾਂ ਦੀ ਟੀਮ ਇਸ ਦੀ ਜਾਂਚ ਕਰਨ ਲਈ ਪਿੰਡ ਪਹੁੰਚੀ ਤਾਂ ਇਹ ਖਬਰ ਝੂਠੀ ਨਿਕਲੀ।
ਥਾਣਾ ਹਠੂਰ ਵੱਲੋਂ ਦਿੱਤੇ ਪ੍ਰੈੱਸ ਨੋਟ ਵਿੱਚ ਇੰਚਾਰਜ ਐੱਸ ਐੱਚ ਓ ਹਰਜਿੰਦਰ ਸਿੰਘ ਨੇ ਦੱਸਿਆ ਕਿ ਪੱਤਰਕਾਰ ਦਵਿੰਦਰ ਜੈਨ ਵਾਸੀ ਜਗਰਾਉਂ ਅਤੇ ਇੱਕ ਹੋਰ ਪੱਤਰਕਾਰ ਸੰਜੀਵ ਗੋਇਲ ਨੇ ਤੱਥਾਂ ਤੋਂ ਰਹਿਤ ਖਬਰ ਸੋਸ਼ਲ ਮੀਡੀਆ 'ਤੇ ਪਾ ਕੇ ਪਹਿਲਾਂ ਤੋਂ ਡਰੇ ਹੋਏ ਲੋਕਾਂ ਵਿੱਚ ਹੋਰ ਵੀ ਸਹਿਮ ਪਾ ਦਿੱਤਾ ਸੀ। ਸੰਬੰਧਤ ਪਰਵਾਰ ਦੇ ਲੋਕਾਂ ਵਿੱਚੋਂ ਮ੍ਰਿਤਕ ਦੀ ਪਤਨੀ ਸੁਨੀਤਾ ਰਾਣੀ, ਪੁੱਤਰ ਰਮਨਦੀਪ ਗੋਇਲ, ਅਮਨਦੀਪ ਗੋਇਲ, ਭਰਾ ਅਸ਼ੋਕ ਗੋਇਲ ਅਤੇ ਪਿੰਡ ਦੇ ਮੋਹਤਬਰ ਲੋਕਾਂ ਨੇ ਦੱਸਿਆ ਕਿ ਰਜਿੰਦਰ ਕੁਮਾਰ ਦੀ ਮੌਤ ਹਾਰਟ ਅਟੈਕ ਨਾਲ ਹੋਈ ਹੈ, ਕੋਰੋਨਾ ਵਾਇਰਸ ਨਾਲ ਨਹੀਂ। ਇਸ ਪਿੱਛੋਂ ਹੈੱਲਥ ਸੈਂਟਰ ਹਠੂਰ ਦੇ ਡਾਕਟਰਾਂ ਦੀ ਟੀਮ ਨੇ ਸਾਰੇ ਪਰਵਾਰ ਦੀ ਜਾਂਚ ਕੀਤੀ ਤਾਂ ਅਤੇ ਮੁੱਢਲੇ ਤੌਰ 'ਤੇ ਕਿਸੇ ਵਿੱਚ ਵੀ ਕੋਰੋਨਾ ਦੇ ਲੱਛਣ ਨਹੀਂ ਮਿਲੇ। ਇਸ ਤਰ੍ਹਾਂ ਇਹ ਖਬਰ ਝੂਠੀ ਨਿਕਲਣ ਉੱਤੇ ਪੁਲਸ ਨੇ ਉਕਤ ਦੋ ਪੱਤਰਕਾਰਾਂ ਦਵਿੰਦਰ ਜੈਨ ਅਤੇ ਸੰਜੀਵ ਜੈਨ ਉੱਤੇ ਝੂਠੀਆਂ ਖਬਰਾਂ ਰਾਹੀਂ ਅਫਵਾਹਾਂ ਫੈਲਾ ਕੇ ਡਰ ਤੇ ਸਹਿਮ ਦਾ ਮਾਹੌਲ ਬਣਾਉਣ ਦਾ ਕੇਸ ਦਰਜ ਕੀਤਾ ਹੈ। ਵਰਨਣ ਯੋਗ ਹੈ ਕਿ ਪੱਤਰਕਾਰ ਦਵਿੰਦਰ ਜੈਨ ਪਹਿਲਾਂ ਵੀ ਬਲੈਕਮੇਲ ਕਾਰਨ ਸੁਰਖੀਆਂ 'ਚ ਰਹਿ ਚੁੱਕਾ ਹੈ। ਉਹ ਕਦੇ ਆਪਣੇ ਵੈਬ ਚੈਨਲ ਤੇ ਕਦੇ ਸੋਸ਼ਲ ਮੀਡੀਏ 'ਤੇ ਝੂਠੀਆਂ ਖਬਰਾਂ ਪਾ ਕੇ ਲੋਕਾਂ ਨੂੰ ਬਲੈਕਮੇਲ ਕਰਦਾ ਹੈ ਤੇ ਕੁਝ ਸਮਾਂ ਪਹਿਲਾਂ ਇਹ ਪੱਤਰਕਾਰ ਇੱਕ ਸਮਾਜ ਸੇਵੀ ਸੰਸਥਾ ਦੇ ਨੁਮਾਇੰਦਿਆਂ ਨੂੰ ਵੀ ਬਲੈਕਮੇਲ ਕਰਦਾ ਕੈਮਰੇ 'ਚ ਕੈਦ ਹੋ ਗਿਆ ਸੀ। ਉਹ ਮਾਮਲਾ ਵੀ ਪੁਲਸ ਦੇ ਕੋਲ ਜਾਂਚ ਅਧੀਨ ਹੈ।