ਪਲਵਲ, 30 ਮਾਰਚ (ਪੋਸਟ ਬਿਊਰੋ)- ਕੱਲ੍ਹ ਸਵੇਰੇ ਨੂਹ, ਹਰਿਆਣਾ ਵਿੱਚ ਇੱਕ ਅਣਪਛਾਤੇ ਵਾਹਨ ਨੇ ਅੱਠ ਲੋਕਾਂ ਨੂੰ ਦਰੜ ਦਿੱਤਾ। ਇਸ ਹਾਦਸੇ ਵਿੱਚ ਚਾਰ ਲੋਕਾਂ ਦੀ ਮੌਕੇ 'ਤੇ ਮੌਤ ਹੋ ਗਈ ਅਤੇ ਚਾਰ ਗੰਭੀਰ ਜ਼ਖਮੀ ਹੋ ਗਏ।
ਦੱਸਿਆ ਗਿਆ ਹੈ ਕਿ ਇਹ ਸਾਰੇ ਲੋਕ ਨੂਹ ਦੇ ਕੁੰਡਲੀ ਮਨੇਸਰ-ਪਲਵਲ ਐਕਸਪ੍ਰੈਸ ਵੇਅ 'ਤੇ ਚੱਲ ਰਹੇ ਸਨ ਤਾਂ ਇੱਕ ਅਣਪਛਾਤਾ ਵਾਹਨ ਆਇਆ ਅਤੇ ਸਾਰਿਆਂ ਨੂੰ ਦਰੜ ਦਿੱਤਾ। ਇਹ ਸਾਰੇ ਮਜ਼ਦੂਰ ਦਿੱਲੀ ਤੋਂ ਆਪਣੇ ਪਿੰਡ ਲਈ ਰਵਾਨਾ ਹੋਏ ਸਨ। ਇਸੇ ਦੌਰਾਨ ਹਰਿਆਣਾ ਸਰਕਾਰ ਨੇ ਕਿਹਾ ਹੈ ਕਿ ਰੋਡਵੇਜ਼ ਨੇ ਪਰਵਾਸੀਆਂ ਨੂੰ ਲਿਜਾਣ ਲਈ 825 ਬਸਾਂ ਰਵਾਨਾ ਕੀਤੀਆਂ ਹਨ। ਇਹ ਬਸਾਂ ਸੋਨੀਪਤ, ਰੇਵਾੜੀ, ਜੀਂਦ ਅਤੇ 34 ਜ਼ਿਲਿਆਂ ਤੋਂ ਭੇਜੀਆਂ ਗਈਆਂ ਸਨ ਜਿੱਥੇ ਪਰਵਾਸੀ ਮਜ਼ਦੂਰਾਂ ਦੀ ਗਿਣਤੀ ਜ਼ਿਆਦਾ ਹੈ। ਹਰਿਆਣਾ ਦੇ ਟਰਾਂਸਪੋਰਟ ਕਮਿਸ਼ਨਰ ਵਰਿੰਦਰ ਦਹੀਆ ਨੇ ਦੱਸਿਆ ਕਿ ਹਰਿਆਣਾ ਦੇ 12 ਜ਼ਿਲਿਆਂ ਤੋਂ 1009 ਬਸਾਂ ਦੀ ਚੋਣ ਕੀਤੀ ਹੈ। ਇਨ੍ਹਾਂ ਵਿੱਚੋਂ 825 ਬਸਾਂ ਰਵਾਨਾ ਕੀਤੀਆਂ ਹਨ। ਇਹ ਬਸਾਂ ਯੂ ਪੀ ਤੱਕ ਗਈਆਂ। ਇਹ ਬਸਾਂ ਯੂ ਪੀ ਦੇ ਲਖਨਊ, ਕਾਨਪੁਰ ਆਦਿ ਜ਼ਿਲਿਆਂ ਵਿੱਚ ਪਹੁੰਚ ਚੁੱਕੀਆਂ ਹਨ।