ਨਵੀਂ ਦਿੱਲੀ, 30 ਮਾਰਚ (ਪੋਸਟ ਬਿਊਰੋ)- ਪਹਿਲਾਂ ਚਿਕਨ ਖਾਣ ਨਾਲ ਕੋਰੋਨਾ ਵਾਇਰਸ ਦੀਆਂ ਅਫ਼ਵਾਹਾਂ ਤੇ ਫਿਰ ਇਸ ਦੀ ਰੋਕਥਾਮ ਲਈ ਕੀਤੇ ਲਾਕਡਾਊਨ ਨਾਲ ਦੇਸ਼ ਦਾ ਪੋਲਟਰੀ ਕਾਰੋਬਾਰ ਤਬਾਹੀ ਕੰਢੇ ਪਹੁੰਚ ਗਿਆ ਹੈ।
ਭਾਰਤ ਵਿੱਚ ਪੋਲਟਰੀ ਕਾਰੋਬਾਰ ਨਾਲ ਜੁੜੇ ਲੋਕਾਂ ਦਾ ਕਹਿਣਾ ਹੈ ਕਿ ਉਹ ਨਾ ਮੁਰਗਿਆਂ ਲਈ ਫੀਡ ਖਰੀਦਣ ਦੇ ਸਮਰੱਥ ਹਨ ਤੇ ਨਾ ਉਨ੍ਹਾਂ ਕੋਲ ਅਜਿਹੇ ਲੋੜੀਂਦੇ ਸਾਧਨ ਹਨ ਕਿ ਮੁਰਗਿਆਂ ਨੂੰ ਬਚਾਇਆ ਜਾ ਸਕੇ। ਹਰਿਆਣਾ ਤੋਂ ਇੱਕ ਪੋਲਟਰੀ ਕਾਰੋਬਾਰੀ ਨੇ ਕਿਹਾ ਕਿ ਲਾਕਡਾਉੂਨ ਕਾਰਨ ਨਾ ਮੁਰਗਿਆਂ ਲਈ ਫੀਡ ਮਿਲਦੀ ਹੇ ਤੇ ਨਾ ਮਾਰਕੀਟ 'ਚ ਚਿਕਨ ਦੀ ਸਪਲਾਈ ਹੋ ਰਹੀ ਹੈ। ਉਨ੍ਹਾਂ ਸ਼ਿਕਾਇਤ ਕੀਤੀ ਕਿ ਪੁਲਸ ਉਨ੍ਹਾਂ ਨੂੰ ਚਿਕਨ ਦੀ ਟਰਾਂਸਪੋਰਟ ਦੀ ਇਜਾਜ਼ਤ ਨਹੀਂ ਦੇ ਰਹੀ। ਖੇਤੀਬਾੜੀ ਆਰਥਿਕਤਾ ਮਾਹਿਰ ਤੇ ਪੋਲਟਰੀ ਫੈਡਰੇਸ਼ਨ ਆਫ ਇੰਡੀਆ ਦੇ ਸਲਾਹਕਾਰ ਵਿਜੈ ਸਰਦਾਨਾ ਨੇ ਕਿਹਾ ਕਿ ਪੁਲਸ ਨੂੰ ਦੱਸਣਾ ਚਾਹੀਦਾ ਹੈ ਕਿ ਜ਼ਰੂਰੀ ਵਸਤਾਂ ਦੀ ਸਪਲਾਈ ਚਲਦੀ ਰਹੇ ਤੇ ਚਿਕਨ ਵੀ ਇਸੇ ਵਰਗ 'ਚ ਆਉਂਦਾ ਹੈ। ਉਨ੍ਹਾਂ ਕਿਹਾ ਕਿ ਪੋਲਟਰੀ ਕਾਰੋਬਾਰੀ ਆਪਣੀ ਲਾਗਤ ਵੀ ਵਸੂਲ ਨਹੀਂ ਕਰ ਪਾ ਰਹੇ ਕਿਉਂਕਿ ਮੰਗ ਘਟਣ ਕਾਰਨ ਚਿਕਨ ਦੀ ਕੀਮਤ ਬਹੁਤ ਹੇਠਾਂ ਚਲੀ ਗਈ ਹੈ। ਪਹਿਲਾਂ ਇਹ ਅਫ਼ਵਾਹ ਕਿ ਮਾਸ ਖਾਣ ਨਾਲ ਕੋਰੋਨਾ ਵਾਇਰਸ ਫੈਲਦਾ ਹੈ, ਕਾਰਨ ਲੋਕਾਂ ਨੇ ਚਿਕਨ ਤੇ ਮੱਛੀ ਤੋਂ ਮੂੰਹ ਮੋੜ ਲਿਆ ਅਤੇ ਫਿਰ ਕੋਰੋਨਾ ਵਾਇਰਸ ਦੀ ਰੋਕਥਾਮ ਲਈ ਲਾਕਡਾਊਨ ਤੇ ਹੋਰਨਾਂ ਪਾਬੰਦੀਆਂ ਕਾਰਨ ਇਸ ਕਾਰੋਬਾਰ ਨੂੰ ਬਹੁਤ ਮਾਰ ਪਈ ਹੈ।