ਵਾਸ਼ਿੰਗਟਨ, 29 ਮਾਰਚ (ਪੋਸਟ ਬਿਊਰੋ)- ਕੋਰੋਨਾ ਦੇ ਖਿਲਾਫ ਜੰਗ ਲਈ ਅਮਰੀਕਾ ਨੇ ਆਪਣਾ ਖਜ਼ਾਨਾ ਖੋਲ੍ਹ ਦਿੱਤਾ ਤੇ ਭਾਰਤ ਸਮੇਤ 64 ਦੇਸ਼ਾਂ ਨੂੰ 17.4 ਕਰੋੜ ਡਾਲਰ ਦਾ ਵਾਧੂ ਆਰਥਿਕ ਪੈਕੇਜ ਦੇਣ ਦਾ ਐਲਾਨ ਦਿੱਤਾ ਹੈ।
ਅਮਰੀਕਾ ਦੇ ਵਿਦੇਸ਼ ਮੰਤਰਾਲਾ ਨੇ ਕਿਹਾ ਹੈ ਕਿ ਇਸ ਪੈਕੇਜ ਵਿੱਚੋਂ ਉਹ ਲੈਬਾਰਟਰੀ ਬਣਾਉਣ, ਕੇਸਾਂ ਦੀ ਖੋਜ ਅਤੇ ਘਟਨਾਵਾਂ 'ਤੇ ਆਧਾਰਤ ਨਿਗਰਾਨੀ ਨੂੰ ਸਰਗਰਮ ਕਰਨ ਅਤੇ ਪ੍ਰਕਿਰਿਆ ਤੇ ਤਿਆਰੀ ਲਈ ਤਕਨੀਕੀ ਮਾਹਰਾਂ ਦੀ ਮਦਦ ਕਰਨ ਦੇ ਮਕਸਦ ਨਾਲ ਭਾਰਤ ਸਰਕਾਰ ਨੂੰ 29 ਲੱਖ ਡਾਲਰ ਦੀ ਮਦਦ ਦੇ ਰਿਹਾ ਹੈ। ਇਹ ਮਦਦ ਫਰਵਰੀ ਵਿੱਚ ਅਮਰੀਕਾ ਵੱਲੋਂ ਐਲਾਨੇ 10 ਕਰੋੜ ਡਾਲਰ ਦੀ ਮਦਦ ਤੋਂ ਵੱਖਰੀ ਹੈ। ਅਮਰੀਕੀ ਅੰਤਰਾਰਸ਼ਟਰੀ ਵਿਕਾਸ ਏਜੰਸੀ (ਯੂ ਐੱਸ ਏ ਆਈ ਡੀ) ਦੇ ਉਪ ਪ੍ਰਸ਼ਾਸਕ ਬੋਨੀ ਗਿਲਕ ਮੁਤਾਬਕ ਇਹ ਨਵੀਂ ਮਦਦ ਅਮਰੀਕਾ ਦੇ ਕੌਮਾਂਤਰੀ ਸਿਹਤ ਸੰਬੰਧੀ ਲੀਡਰਸ਼ਿਪ ਨੂੰ ਹੋਰ ਮਜ਼ਬੂਤ ਕਰੇਗੀ। ਆਰਥਿਕ ਮਦਦ ਦੇ ਐਲਾਨ ਤੋਂ ਬਿਨਾ ਅਮਰੀਕਾ ਆਪਣੇ ਦੋਸਤਾਂ ਤੇ ਸਹਿਯੋਗੀਆਂ ਨੂੰ ਲੋੜੀਂਦੇ ਵੈਂਟੀਲੇਟਰਾਂ ਦੀ ਸਪਲਾਈ ਕਰਨ ਲਈ ਵੀ ਤਿਆਰ ਹੈ। ਅਮਰੀਕੀ ਇਤਿਹਾਸ ਦੇ ਸਭ ਤੋਂ ਵੱਡੇ 2000 ਅਰਬ ਡਾਲਰ ਦੇ ਆਰਥਿਕ ਪੈਕੇਜ ਨੂੰ ਸੈਨੇਟ ਤੋਂ ਪਾਸ ਕਰਾਉਣ ਪਿੱਛੋਂ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਮਨਜ਼ੂਰੀ ਮਿਲ ਗਈ ਹੈ। ਟਰੰਪ ਨੇ ਕੋਰੋਨਾ ਵਾਇਰਸ ਤੋਂ ਪ੍ਰਭਾਵਤ ਅਰਥ ਵਿਵਸਥਾ ਲਈ ਸ਼ੁੱਕਰਵਾਰ ਇਸ ਆਰਥਿਕ ਪੈਕੇਜ ਦਾ ਐਲਾਨ ਕੀਤਾ ਸੀ। ਉਨ੍ਹਾ ਨੇ ਵ੍ਹਾਈਟ ਹਾਊਸ ਵਿੱਚ ਪੱਤਰਕਾਰਾਂ ਨੂੰ ਕਿਹਾ ਕਿ ਆਰਥਿਕ ਪੈਕੇਜ ਨਾਲ ਤੁਰੰਤ ਰਾਹਤ ਦੀ ਲੋੜ ਪੂਰੀ ਕੀਤੀ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਇਸ ਫੰਡ ਨਾਲ ਅਮਰੀਕਾ ਆਪਣੇ ਛੋਟੇ ਅਤੇ ਵੱਡੇ ਬਿਜ਼ਨਸ ਨੂੰ ਮਜ਼ਬੂਤ ਬਣਾਵੇਗਾ।