ਕਰਤਾਰਪੁਰ, 29 ਮਾਰਚ (ਪੋਸਟ ਬਿਊਰੋ)- ਕਰਫਿਊ ਦੌਰਾਨ ਕਰਤਾਰਪੁਰ ਵਿੱਚ ਜ਼ਰੂਰੀ ਸਾਮਾਨ ਲੈਣ ਜਾਂਦੇ ਲੋਕਾਂ ਦੀ ਥਾਣਾ ਮੁਖੀ ਵੱਲੋਂ ਕੁੱਟਮਾਰ ਤੇ ਗਾਲ੍ਹਾਂ ਕੱਢਣ ਦੀ ਵੀਡੀਓ ਵਾਇਰਲ ਹੋਣ ਉੱਤੇ ਸੂਬਾ ਸਰਕਾਰ ਨੇ ਇਸ ਦਾ ਸਖਤ ਨੋਟਿਸ ਲਿਆ ਅਤੇ ਉਸ ਨੂੰ ਲਾਈਨ ਹਾਜ਼ਰ ਕਰ ਦਿੱਤਾ ਹੈ।
ਪਤਾ ਲੱਗਾ ਹੈ ਕਿ ਪੰਜਾਬ ਸਰਕਾਰ ਵੱਲੋਂ ਆਮ ਲੋਕਾਂ ਨੂੰ ਕਰਫਿਊ ਮੌਕੇ ਸਹਿਯੋਗ ਦੇਣ ਦੀ ਹਦਾਇਤ ਦੇ ਉਲਟ ਕਰਤਾਰਪੁਰ ਦੇ ਥਾਣਾ ਮੁਖੀ ਪੁਸ਼ਪ ਬਾਲੀ ਨੇ ਅਣਮਨੁੱਖੀ ਵਤੀਰਾ ਵਰਤਦੇ ਹੋਏ ਬਾਜ਼ਾਰ ਵਿੱਚੋਂ ਕੁਝ ਨੌਜਵਾਨਾਂ ਨੂੰ ਡੰਡੇ ਦੇ ਜ਼ੋਰ ਨਾਲ ਦੌੜਾਇਆ ਤੇ ਕੁਝ ਨੂੰ ਸ਼ਰੇਆਮ ਕੁੱਟਮਾਰ ਕਰ ਕੇ ਜ਼ਲੀਲ ਕੀਤਾ ਸੀ। ਇਸ ਸਾਰੇ ਕੁਝ ਦੀਆਂ ਵੀਡੀਓਜ਼ ਥਾਣਾ ਮੁਖੀ ਨੇ ਖੁਦ ਆਪਣੇ ਸਹਿਯੋਗੀ ਪੁਲਸ ਮੁਲਾਜ਼ਮਾਂ ਕੋਲੋਂ ਬਣਵਾਈਆਂ ਅਤੇ ਆਪਣੇ ਆਪ ਨੂੰ ਦਬੰਗ ਸਾਬਿਤ ਕਰਨ ਲਈ ਖੁਦ ਹੀ ਜਨਤਕ ਕਰਵਾ ਦਿੱਤੀਆਂ। ਥਾਣਾ ਮੁਖੀ ਨੇ ਮੁੱਖ ਬਾਜ਼ਾਰ ਵਿੱਚ ਆਪਣੀ ਐਕਟਿਵਾ 'ਤੇ ਸਾਮਾਨ ਰੱਖ ਕੇ ਵਾਪਸ ਘਰ ਚੱਲੇ ਵਿਅਕਤੀ ਦੀ ਕੁੱਟਮਾਰ ਕਰਨ ਦੀ ਵੀਡੀਓ ਖੁਦ ਬਣਾਈ। ਕੁੱਟਮਾਰ ਦਾ ਸ਼ਿਕਾਰ ਹੋਏ ਵਿਅਕਤੀ ਨੇ ਜ਼ਰੂਰੀ ਸਾਮਾਨ ਲਿਜਾਣ ਬਾਰੇ ਕਹਿ ਕੇ ਮਿੰਨਤਾਂ-ਤਰਲੇ ਕੀਤੇ, ਪਰ ਥਾਣਾ ਮੁਖੀ ਉਪਰ ਇਸ ਦਾ ਕੋਈ ਅਸਰ ਨਹੀਂ ਹੋਇਆ।
ਵਰਨਣ ਯੋਗ ਹੈ ਕਿ ਪੰਜਾਬ ਵਿੱਚ ਕੁੱਟਮਾਰ ਦੀਆਂ ਵੀਡੀਓ ਜਨਤਕ ਹੋਣ ਉਤੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਡੀ ਜੀ ਪੀ ਨੂੰ ਜ਼ਿੰਮੇਵਾਰ ਅਫਸਰਾਂ ਦੇ ਵਿਰੁੱਧ ਕਾਰਵਾਈ ਲਈ ਕਿਹਾ ਸੀ। ਥਾਣਾ ਮੁਖੀ ਪੁਸ਼ਪ ਬਾਲੀ ਨੂੰ ਲਾਈਨ ਹਾਜ਼ਰ ਕਰਨ ਪਿੱਛੋਂ ਇੰਸਪੈਕਟਰ ਹਰਦੀਪ ਸਿੰਘ ਨੂੰ ਥਾਣਾ ਕਰਤਾਰਪੁਰ ਦਾ ਨਵਾਂ ਮੁਖੀ ਲਗਾਇਆ ਗਿਆ ਹੈ। ਐਸ ਐਸ ਪੀ ਜਲੰਧਰ ਦਿਹਾਤੀ ਨਵਜੋਤ ਸਿੰਘ ਮਾਹਲ ਨੇ ਦੱਸਿਆ ਕਿ ਪੁਲਸ ਮੁਲਾਜ਼ਮਾਂ ਤੇ ਅਧਿਕਾਰੀਆਂ ਨੂੰ ਲੋਕਾਂ ਨਾਲ ਸਹੀ ਵਿਹਾਰ ਕਰਨ ਲਈ ਕਿਹਾ ਗਿਆ ਹੈ।