ਨਵੀਂ ਦਿੱਲੀ, 27 ਮਾਰਚ (ਪੋਸਟ ਬਿਊਰੋ)- ਕੋਰੋਨਾ ਵਾਇਰਸ ਕਾਰਨ ਦੇਸ਼ ਲਾਕਡਾਊਨ ਹੈ। ਨੌਕਰੀ ਤੋਂ ਲੈ ਕੇ ਕਾਰੋਬਾਰ ਤੱਕ ਸਭ ਠੱਪ ਹੈ। ਅਜਿਹੇ ਵਿੱਚ ਗਾਹਕਾਂ ਦੀ ਲੋੜ ਦਾ ਧਿਆਨ ਰੱਖਦੇ ਹੋਏ ਕਈ ਬੈਂਕ ਖਾਸ ਐਮਰਜੈਂਸੀ ਲੋਨ ਆਫਰ ਲੈ ਕੇ ਆਏ ਹਨ। ਸਰਕਾਰੀ ਕਰਜ਼ ਦਾਤਾ ਇੰਡੀਅਨ ਬੈਂਕ, ਯੂਨੀਅਨ ਬੈਂਕ ਆਫ ਇੰਡੀਆ ਤੇ ਬੈਂਕ ਆਫ ਬੜੌਦਾ ਨੇ ਇਨ੍ਹਾਂ ਸਪੈਸ਼ਲ ਐਮਰਜੈਂਸੀ ਲੋਨ ਆਫਰਜ਼ ਦਾ ਐਲਾਨ ਕੀਤਾ ਹੈ। ਇਸ ਤੋਂ ਇਲਾਵਾ ਕੇਨਰਾ ਬੈਂਕ, ਯੂਕੋ ਬੈਂਕ ਅਤੇ ਇੰਡੀਅਨ ਓਵਰਸੀਜ਼ ਬੈਂਕ ਨੇ ਵੀ ਗਾਹਕਾਂ ਲਈ ਇਸ ਤਰ੍ਹਾਂ ਦੀ ਸਹੂਲਤ ਦੀ ਪੇਸ਼ਕਸ਼ ਕੀਤੀ ਹੈ।
ਇੰਡੀਅਨ ਬੈਂਕ ਦੀ ਐਮ ਡੀ ਪਦਾਜਾ ਚੁੰਦਰੂ ਨੇ ਕਿਹਾ ਕਿ ਗਾਹਕਾਂ ਲਈ ਰੁਕਾਵਟ ਰਹਿਤ ਬੈਂਕਿੰਗ ਸਰਵਿਸ ਤੇ ਸਟਾਫ ਦੀ ਸੁਰੱਖਿਆ ਯਕੀਨੀ ਕੀਤੀ ਜਾ ਰਹੀ ਹੈ। ਇਸ ਚੁਣੌਤੀ ਦੇ ਸਮੇਂ ਵਿੱਚ ਬੈਂਕ ਆਪਣੇ ਗਾਹਕਾਂ ਦੇ ਨਾਲ ਹੈ। ਅਰਥ ਵਿਵਸਥਾ ਦੇ ਕਈ ਸੈਕਟਰਾਂ ਵਿੱਚ ਮੁਸ਼ਕਲਾਂ ਦੇਖਦੇ ਹੋਏ ਅਸੀਂ ਬਿਜ਼ਨਸ ਅਤੇ ਹੋਰ ਗਾਹਕਾਂ ਦੀ ਨਕਦੀ ਦੀ ਲੋੜ ਨੂੰ ਪੂਰਾ ਕਰਨ ਲਈ ਕਈ ਪ੍ਰੋਡਕਟ ਲਾਂਚ ਕੀਤੇ ਹਨ। ਯੂਨੀਅਨ ਬੈਂਕ ਆਫ ਇੰਡੀਆ ਨੇ ਟਵੀਟ ਕੀਤਾ ਕਿ ਕੋਰੋਨਾ ਵਾਇਰਸ ਦੇ ਫੈਲਾਅ ਨੂੰ ਦੇਖ ਕੇ ਯੂਨੀਅਨ ਬੈਂਕ ਆਫ ਇੰਡੀਆ ਆਪਣੇ ਸਾਰੇ ਗਾਹਕਾਂ ਦੀ ਮਦਦ ਲਈ ਕੋਵਿਡ ਐਮਰਜੈਂਸੀ ਲਾਈਨ ਆਫ ਕ੍ਰੈਡਿਟ ਲੈ ਕੇ ਆਇਆ ਹੈ, ਜਿਹੜਾ ਗਾਹਕਾਂ ਲਈ ਵਾਧੂ ਲੋਨ ਦੀ ਸਹੂਲਤ ਦਿੰਦਾ ਹੈ। ਬੈਂਕ ਆਫ ਇੰਡੀਆ ਨੇ ਵੀ ਗਾਹਕਾਂ ਲਈ ਐਮਰਜੈਂਸੀ ਲੋਨ ਸਹੂਲਤ ਦਾ ਐਲਾਨ ਕੀਤਾ ਹੈ। ਬੈਂਕ ਆਫ ਬੜੌਦਾ ਨੇ ਕਿਹਾ ਕਿ ਕੋਰੋਨਾ ਤੋਂ ਪ੍ਰਭਾਵਤ ਕਾਰਪੋਰੇਟ ਗਾਹਕਾਂ ਅਤੇ ਐੱਮ ਐੱਸ ਐੱਮ ਈ ਲਈ ਉਸ ਨੇ ਐਮਰਜੈਂਸੀ ਕ੍ਰੈਡਿਟ ਲਾਈਨ ਦਾ ਪ੍ਰਬੰਧ ਕੀਤਾ ਹੈ। ਇਹ ਸਟੇਟ ਬੈਂਕ ਆਫ ਇੰਡੀਆ ਵੱਲੋਂ ਪਿਛਲੇ ਹਫਤੇ ਦਿੱਤੀ ਐਲਾਨ ਫੰਡ ਸਹੂਲਤ ਦੀ ਤਰ੍ਹਾਂ ਹੈ। ਕੇਨਰਾ ਬੈਂਕ ਨੇ ਟਵੀਟ ਕੀਤਾ ਕਿ ਇਹ ਬੈਂਕ ਐੱਮ ਐੱਸ ਐੱਮ ਈ, ਕਾਰਪੋਰੇਟ, ਬਿਜ਼ਨਸ, ਖੇਤੀ ਤੇ ਹੋਰਨਾਂ ਗਾਹਕਾਂ ਕੋਲ ਨਕਦੀ ਪ੍ਰਵਾਹ ਬਣਾਈ ਰੱਖਣ ਲਈ ਸਪੈਸ਼ਲ ਲੋਨ ਸਕੀਮ ਲੈ ਕੇ ਆਇਆ ਹੈ। ਇੰਡੀਅਨ ਓਵਰਸੀਜ਼ ਬੈਂਕ ਨੇ ਸਾਰੇ ਐੱਮ ਐੱਸ ਐੱਮ ਦੀ ਗਾਹਕਾਂ ਲਈ ਐੱਮ ਐੱਸ ਐੱਮ ਈ ਪ੍ਰੋਡਕਟ ਕੋਵਿਡ ਲਾਈਨ ਆਫ ਸਪੋਰਟ ਸਕੀਮ ਪੇਸ਼ ਕੀਤੀ ਹੈ।