ਨਵੀਂ ਦਿੱਲੀ, 26 ਮਾਰਚ (ਪੋਸਟ ਬਿਊਰੋ)- ਨਰਿੰਦਰ ਮੋਦੀ ਸਰਕਾਰ ਨੇ ਲਾਕਡਾਊਨ ਦੇ ਐਲਾਨ ਤੋਂ ਇੱਕ ਦਿਨ ਬਾਅਦ ਲੋਕਾਂ ਨੂੰ ਆਰਜ਼ੀ ਰਾਹਤ ਦਿੰਦਿਆਂ ਇੱਕ ਵੱਡੀ ਰਾਸ਼ਨ ਸਬਸਿਡੀ ਦਾ ਐਲਾਨ ਕੀਤਾ ਹੈ।
ਇਸ ਸੰਬੰਧ ਵਿੱਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ ਹੇਠ ਹੋਈ ਕੈਬਨਿਟ ਬੈਠਕ 'ਚ ਐਲਾਨੀ ਅਨਾਜ ਸੁਰੱਖਿਆ ਸਕੀਮ ਵਿੱਚ ਹਰ ਵਿਅਕਤੀ ਨੂੰ ਸੱਤ ਕਿੱਲੋ ਰਾਸ਼ਨ ਹਰ ਮਹੀਨੇ ਦੇਣ ਦਾ ਫੈਸਲਾ ਕੀਤਾ ਗਿਆ। ਇਸ ਸਕੀਮ ਦੇ ਅਧੀਨ ਕਣਕ ਦੋ ਰੁਪਏ ਕਿੱਲੋ ਅਤੇ ਚੌਲ ਤਿੰਨ ਰੁਪਏ ਕਿੱਲੋ ਮਿਲਣਗੇ। 80 ਕਰੋੜ ਲੋਕਾਂ ਨੂੰ ਲਾਭ ਪਹੁੰਚਾਉਣ ਵਾਲੀ ਇਸ ਸਕੀਮ 'ਚ ਇਹ ਦਰਾਂ ਅਗਲੇ ਤਿੰਨ ਮਹੀਨੇ ਲਾਗੂ ਰਹਿਣਗੀਆਂ। ਵਰਨਣ ਯੋਗ ਹੈ ਇਸ ਤੋਂ ਪਹਿਲਾਂ ਸਬਸਿਡੀ ਦੀ ਸਕੀਮ ਹੇਠ ਕਣਕ 27 ਰੁਪਏ ਕਿੱਲੋ ਤੇ ਚੌਲ 37 ਰੁਪਏ ਕਿੱਲੋ ਦਿੱਤੇ ਜਾਂਦੇ ਸਨ। ਕੇਂਦਰੀ ਮੰਤਰੀ ਪ੍ਰਕਾਸ਼ ਜਾਵੜੇਕਰ ਨੇ ਕੱਲ੍ਹ ਪ੍ਰੈਸ ਕਾਨਫ਼ਰੰਸ ਵਿੱਚ ਇਹ ਜਾਣਕਾਰੀ ਦਿੱਤੀ। ਜਾਵੜੇਕਰ ਨੇ ਭਰੋਸਾ ਦਿਵਾਉਂਦਿਆਂ ਇਹ ਵੀ ਕਿਹਾ ਕਿ ਤਾਲਾਬੰਦੀ ਦੌਰਾਨ ਅਨਾਜ ਉਤਪਾਦਾਂ ਅਤੇ ਹੋਰ ਲੋੜੀਂਦੀਆਂ ਵਸਤਾਂ ਦੀ ਕੋਈ ਘਾਟ ਨਹੀਂ ਹੋਵੇਗੀ।
ਕੱਲ੍ਹ ਲਾਕਡਾਊਨ ਦੇ ਐਲਾਨ ਤੋਂ ਬਾਅਦ ਲੋਕ ਕਤਾਰਾਂ ਬਣੀ ਰਾਸ਼ਨ ਦੀਆਂ ਦੁਕਾਨਾਂ ਉਤੇ ਖੜ੍ਹੇ ਨਜ਼ਰ ਆਏ ਸਨ। ਮੰਤਰੀ ਮੰਡਲ ਦੇ ਫ਼ੈਸਲਿਆਂ 'ਚ ਖੇਤਰੀ ਦਿਹਾਤੀ ਬੈਂਕਾਂ ਦੀ ਕੈਪੀਟਲ ਐਡੀਕੁਐਂਸੀ ਰੇਟ ਸੁਧਾਰਨ ਲਈ 1340 ਕਰੋੜ ਰੁਪਏ ਵੀ ਮਨਜ਼ੂਰ ਕੀਤੇ ਗਏ ਹਨ। ਇਨ੍ਹਾਂ 'ਚੋਂ 670 ਕਰੋੜ ਰੁਪਏ ਕੇਂਦਰ ਸਰਕਾਰ ਦੇਵੇਗੀ, ਬਾਕੀ 670 ਕਰੋੜ ਰੁਪਏ ਕੇਂਦਰ ਸਰਕਾਰ ਵੱਲੋਂ ਹੋਰ ਬੈਂਕਾਂ ਤੋਂ ਇਕੱ'ਠੇ ਕੀਤੇ ਜਾਣਗੇ।