* ਚੀਨ ਵਿੱਚ ਹੰਟਾ ਨਾਲ ਪਹਿਲੀ ਮੌਤ ਪਿੱਛੋਂ ਹਲਚਲ ਮੱਚੀ
ਬੀਜਿੰਗ, 24 ਮਾਰਚ, (ਪੋਸਟ ਬਿਊਰੋ)- ਚੀਨ ਦੇ ਵੁਹਾਨ ਸ਼ਹਿਰ ਤੋਂ ਫੈਲਿਆ ਕੋਰੋਨਾ ਵਾਇਰਸ ਸਮੁੱਚੀ ਦੁਨੀਆ ਵਿਚ ਮਹਾਮਾਰੀ ਬਣ ਕੇ ਫੈਲ ਚੁੱਕਾ ਹੈ ਤੇ ਇਸ ਨਾਲ 18000 ਤੋਂ ਵੱਧ ਮੌਤਾਂ ਹੋਈਆਂ ਹਨ। ਇਸ ਦੇ ਬਾਅਦ ਚੀਨ ਦੇ ਹੁਨਾਨ ਰਾਜ ਵਿਚ ਇਕ ਹੋਰ ਖਤਰਨਾਕ ਵਾਇਰਸ ਉੱਠ ਪਿਆ ਹੈ, ਜਿਸ ਨੂੰ ਹੰਟਾ ਵਾਇਰਸ ਕਿਹਾ ਗਿਆ ਹੈ। ਇਸ ਨਾਲ ਇਕ ਵਿਅਕਤੀ ਦੀ ਮੌਤ ਹੋ ਗਈ ਹੈ, ਜਿਹੜਾ ਗਵਾਂਢੀ ਰਾਜ ਤੋਂ ਮੁੜੀ ਬੱਸ ਵਿੱਚ ਜਾ ਰਿਹਾ ਸੀ। ਉਸ ਦੀ ਮੌਤ ਬੱਸ ਵਿਚ ਹੀ ਹੋ ਗਈ। ਇਸ ਬੱਸ ਵਿਚ ਮੌਜੂਦ ਹੋਰ ਸਵਾਰੀਆਂ ਦਾ ਵੀ ਟੈਸਟ ਕੀਤਾ ਜਾ ਰਿਹਾ ਹੈ।
ਇਸ ਘਟਨਾ ਦੀ ਆਮ ਲੋਕਾਂ ਨੂੰ ਜਾਣਕਾਰੀ ਮਿਲਦੇ ਸਾਰ ਸੋਸ਼ਲ ਮੀਡੀਆ ਉੱਤੇ ਹਲਚਲ ਮੱਚ ਗਈ। ਲੋਕ ਟਵੀਟ ਕਰ ਕੇ ਡਰ ਪ੍ਰਗਟ ਕਰ ਰਹੇ ਸਨ ਕਿ ਕਿਤੇ ਇਹ ਵੀ ਕੋਰੋਨਾ ਵਾਇਰਸ ਵਾਂਗ ਵੱਡੇ ਪੱਧਰ ਉੱਤੇ ਨਾ ਫੈਲ ਜਾਵੇ। ਇਸ ਦੀ ਜਾਣਕਾਰੀ ਚੀਨ ਦੇ ਸਰਕਾਰੀ ਅਖਬਾਰ ਗਲੋਬਲ ਟਾਈਮਜ਼ ਨੇ ਦਿੱਤੀ ਹੈ। ਡਰੇ ਹੋਏ ਲੋਕ ਕਹਿ ਰਹੇ ਹਨ ਕਿ ਚੀਨ ਵਿਚ ਜ਼ਿੰਦਾ ਜਾਨਵਰਾਂ ਨੂੰ ਖਾਣਾ ਬੰਦ ਕਰਨਾ ਚਾਹੀਦਾ ਹੈ। ਇਸ ਬਾਰੇ ਮਾਹਰਾਂ ਦੀ ਰਾਏ ਹੈ ਕਿ ਇਹ ਕੋਰੋਨਾ ਵਾਇਰਸ ਜਿੰਨਾ ਘਾਤਕ ਨਹੀਂ ਹੈ। ਇਹ ਚੂਹੇ ਆਦਿ ਦੇ ਸੰਪਰਕ ਨਾਲ ਫੈਲਦਾ ਹੈ।