ਇੰਦੌਰ, 24 ਮਾਰਚ (ਪੋਸਟ ਬਿਊਰੋ)- ਅਮਰੀਕਾ ਦੇ ਫੂਡ ਐਂਡ ਡਰੱਗ ਐਡਮਿਨੀਸਟ੍ਰੇਸ਼ਨ ਨੇ ਮਲੇਰੀਏ ਦੇ ਇਲਾਜ ਵਿੱਚ ਕੰਮ ਆਉਣ ਵਾਲੀ ਦਵਾਈ ਕਲੋਰੋਕਵੀਨ ਦੀ ਮੱਧ ਪ੍ਰਦੇਸ਼ ਤੋਂ ਇੰਪੋਰਟ ਸ਼ੁਰੂ ਕਰ ਦਿੱਤੀ ਹੈ।
ਮੱਧ ਪ੍ਰਦੇਸ਼ ਵਿੱਚ ਤਿੰਨ ਯੂਨਿਟਾਂ ਨਾਲੇ ਇਸ ਦਵਾਈ ਦਾ ਵੱਡੇ ਪੈਮਾਨੇ 'ਤੇ ਪੈਦਾਵਾਰ ਕਰਨ ਵਾਲੀ ਕੰਪਨੀ ਇਪਕਾ ਲੈਬਾਰਟਰੀ ਨੂੰ ਅਮਰੀਕਾ ਦੇ ਫੂਡ ਐਂਡ ਡਰੱਗ ਐਡਮਿਨੀਸਟ੍ਰੇਸ਼ਨ (ਯੂ ਐਸ ਐਫ ਡੀ ਏ) ਨੇ ਦਵਾਈ ਮੰਗਵਾਉਣ ਦਾ ਆਰਡਰ ਦਿੱਤਾ ਹੈ। ਇਸ ਕੰਪਨੀ ਨੇ ਬਰਾਮਦ 'ਤੇ ਸਹਿਮਤੀ ਦਿੰਦੇ ਹੋਏ ਬੀ ਐਸ ਈ ਅਤੇ ਐਨ ਐਸ ਈ ਨੂੰ ਇਸ ਦੀ ਸੂਚਨਾ ਭੇਜ ਦਿੱਤੀ ਹੈ। ਇਸ ਰਾਜ ਵਿੱਚ ਬਣ ਰਹੀ ਇਹ ਦਵਾਈ ਸਥਾਨਕ ਬਾਜ਼ਾਰਾਂ ਤੋਂ ਗ਼ਾਇਬ ਹੋ ਚੁੱਕੀ ਹੈ। ਦੇਸ਼ ਦੀਆਂ ਜ਼ਰੂਰਤਾਂ ਨੂੰ ਛਿੱਕੇ ਟੰਗ ਕੇ ਦਵਾਈ ਦੀ ਐਕਸਪੋਰਟ ਦਾ ਸਥਾਨਕ ਪੱਧਰ 'ਤੇ ਵਿਰੋਧ ਵੀ ਸ਼ੁਰੂ ਹੋ ਗਿਆ ਹੈ।
ਇਪਕਾ ਲੈਬਾਰਟਰੀ ਨੇ ਬੀ ਐਸ ਈ ਅਤੇ ਨੈਸ਼ਨਲ ਸਟਾਕ ਐਕਸਚੇਂਜ (ਐਨ ਐਸ ਈ) ਨੂੰ 21 ਮਾਰਚ ਨੂੰ ਸੂਚਨਾ ਭੇਜੀ ਹੈ ਕਿ 20 ਮਾਰਚ ਨੂੰ ਯੂ ਐਸ ਐਫ ਡੀ ਏ ਵੱਲੋਂ ਉਨ੍ਹਾਂ ਨੂੰ ਈਮੇਲ ਮਿਲੀ ਹੈ। ਕੰਪਨੀ ਨੇ ਆਪਣੇ ਇਸ ਪੱਤਰ ਵਿੱਚ ਲਿਖਿਆ ਹੈ ਕਿ ‘ਕਲੋਰੋਕਵੀਨ ਫਾਸਫੇਟ' ਅਤੇ ‘ਹਾਈਡਾਕਸੀਕਲੋਰੋਕਵੀਨ ਸਲਫੇਟ' ਨੂੰ ਕੋਰੋਨਾ ਦੇ ਇਲਾਜ ਵਿੱਚ ਠੀਕ ਪਾਇਆ ਗਿਆ ਹੈ। ਅਮਰੀਕਾ ਵਿੱਚ ਇਸ ਦਵਾਈ ਦੇ ਕੱਚੇ ਮਾਲ ਅਤੇ ਤਿਆਰ ਦਵਾਈ ਦੀ ਕਮੀ ਤੋਂ ਬਾਅਦ ਯੂ ਐਸ ਐਫ ਡੀ ਏ ਨੇ ਇਸ ਦੀ ਮੰਗ ਕੀਤੀ ਹੈ। ਕੰਪਨੀ ਨੇ ਇਹ ਜਾਣਕਾਰੀ ਦਿੱਤੀ ਹੈ ਕਿ ਹੋਰ ਕਈ ਦੇਸ਼ਾਂ ਤੋਂ ਏਦਾਂ ਦੀ ਮੰਗ ਆ ਰਹੀ ਹੈ ਅਤੇ ਦਵਾਈ ਸਭ ਦੇਸ਼ਾਂ ਨੂੰ ਭੇਜੀ ਜਾ ਰਹੀ ਹੈ। ਮਲੇਰੀਏ ਦੇ ਇਲਾਜ ਦੀ ਇਸ ਮਸ਼ਹੂਰ ਦਵਾਈ ਦਾ ਨਿਰਮਾਣ ਕਰਨ ਵਾਲੀ ਇਪਕਾ ਲੈਬ ਸਭ ਤੋਂ ਵੱਡੀ ਦਵਾਈ ਕੰਪਨੀ ਹੈ।