ਜੈਨੇਵਾ, 23 ਮਾਰਚ (ਪੋਸਟ ਬਿਊਰੋ)- ਵਿਸ਼ਵ ਸਿਹਤ ਸੰਗਠਨ (ਡਬਲਯੂ ਐਚ ਓ) ਨੇ ਚਿਤਾਵਨੀ ਦਿੱਤੀ ਹੈ ਕਿ ਕੋਰੋਨਾ ਵਾਇਰਸ ਦੀ ਚੁਣੌਤੀ ਨਾਲ ਨਜਿੱਠਣ ਲਈ ਸਿਰਫ ਲਾਕ ਡਾਊਨ ਹੀ ਕਾਫੀ ਨਹੀਂ।
ਸੰਗਠਨ ਦੇ ਚੋਟੀ ਦੇ ਹੰਗਾਮੀ ਹਾਲਾਤ ਬਾਰੇ ਮਾਹਿਰ ਮਾਈਕ ਸਿਆਨ ਨੇ ਕਿਹਾ ਕਿ ਵਾਇਰਸ ਮੁੜ ਤੋਂ ਆਪਣਾ ਸਿਰ ਨਾ ਚੁੱਕੇ, ਇਸ ਲਈ ਜਨਤਕ ਸਿਹਤ ਸਹੂਲਤਾਂ ਨੂੰ ਯਕੀਨੀ ਕਰਨਾ ਪਏਗਾ। ਉਨ੍ਹਾਂ ਇੱਕ ਇੰਟਰਵਿਊ ਵਿੱਚ ਕਿਹਾ ਕਿ ਸਾਨੂੰ ਇਸ ਵਾਇਰਸ ਤੋਂ ਪੀੜਤ ਲੋਕਾਂ ਦੀ ਭਾਲ 'ਤੇ ਸਭ ਤੋਂ ਵੱਧ ਧਿਆਨ ਦੇਣਾ ਹੋਵੇਗਾ। ਉਨ੍ਹਾਂ ਨੂੰ ਬਾਕੀ ਲੋਕਾਂ ਤੋਂ ਵੱਖਰਾ ਕਰਨਾ ਹੋਵੇਗਾ। ਕਿਸੇ ਨੂ ਵੀ ਅਜਿਹੇ ਵਿਅਕਤੀ ਦੇ ਸੰਪਰਕ ਵਿੱਚ ਬਿਲਕੁਲ ਨਹੀਂ ਆਉਣਾ ਚਾਹੀਦਾ। ਉਨ੍ਹਾਂ ਕਿਹਾ ਕਿ ਲਾਕ ਡਾਊਨ ਦੇ ਕਈ ਖਤਰੇ ਵੀ ਹਨ। ਜੇ ਅਸੀਂ ਜਨਤਕ ਸਿਹਤ ਸਹੂਲਤਾਂ ਨਾ ਦੇ ਸਕੇ ਤਾਂ ਲਾਕ ਡਾਊਨ ਦੇ ਖਤਮ ਹੋਣ ਪਿੱਛੋਂ ਜਦੋਂ ਪਾਬੰਦੀਆਂ ਹਟ ਜਾਣਗੀਆਂ ਤਾਂ ਬਿਮਾਰੀ ਮੁੜ ਤੋਂ ਸਿਰ ਚੁੱਕ ਸਕਦੀ ਹੈ।