ਡਿਟਰੌਇਟ, 24 ਮਾਰਚ (ਪੋਸਟ ਬਿਊਰੋ) : ਕਰੋਨਾਵਾਇਰਸ ਦੇ ਪਸਾਰ ਨੂੰ ਵੇਖਦਿਆਂ ਹੋਇਆਂ ਆਰਜ਼ੀ ਤੌਰ ੳੱੁਤੇ ਹੀ ਸਹੀ ਨੌਰਥ ਅਮਰੀਕਾ ਦੇ ਬਹੁਤੇ ਆਟੋ ਪਲਾਂਟਸ ਨੂੰ ਬੰਦ ਕੀਤਾ ਜਾ ਰਿਹਾ ਹੈ।
ਫੋਰਡ, ਜਨਰਲ ਮੋਟਰਜ਼, ਫਿਏਟ ਕ੍ਰਾਈਸਲਰ, ਹੌਂਡਾ ਤੇ ਟੌਇਟਾ ਦਾ ਕਹਿਣਾ ਹੈ ਕਿ ਉਹ ਇਸ ਰੀਜਨ ਵਿੱਚ ਆਪਣੀਆਂ ਸਾਰੀਆਂ ਫੈਕਟਰੀਆਂ ਨੂੰ ਬੰਦ ਕਰਨ ਜਾ ਰਹੇ ਹਨ। ਇਨ੍ਹਾਂ ਕੰਪਨੀਆਂ ਨੇ ਆਖਿਆ ਕਿ ਆਟੋਮੋਬਾਈਲ ਬਿਲਡਿੰਗਜ਼ ਵਿੱਚ ਇਹ ਕਰਮਚਾਰੀ ਇੱਕ ਦੂਜੇ ਤੋਂ ਕਾਫੀ ਨੇੜੇ ਰਹਿ ਕੇ ਕੰਮ ਕਰਦੇ ਹਨ ਤੇ ਜਿਸ ਨਾਲ ਅਜਿਹੀ ਬਿਮਾਰੀ ਜਲਦੀ ਫੈਲਣ ਦਾ ਡਰ ਬਣਿਆ ਰਹਿੰਦਾ ਹੈ। ਇਸ ਤੋਂ ਇਲਾਵਾ ਹਿਉਂਡਾਇ ਨੇ ਆਪਣਾ ਅਲਾਬਾਮਾ ਵਾਲਾ ਪਲਾਂਟ ਇਸ ਲਈ ਬੰਦ ਕਰ ਦਿੱਤਾ ਕਿਉਂਕਿ ਉਨ੍ਹਾਂ ਦੇ ਇੱਕ ਵਰਕਰ ਨੂੰ ਕਰੋਨਾਵਾਇਰਸ ਨਿਕਲਿਆ।
ਡਿਟਰੌਇਟ ਦੀਆਂ ਤਿੰਨ ਆਟੋਨਿਰਮਾਤਾ ਕੰਪਨੀਆਂ ਨੇ ਆਖਿਆ ਕਿ ਉਨ੍ਹਾਂ ਵੱਲੋਂ ਇਹ ਬੰਦ ਇਸ ਹਫਤੇ ਤੋਂ ਹੀ ਸੁ਼ਰੂ ਹੋਵੇਗਾ ਜਦਕਿ ਹੌਂਡਾ ਤੇ ਟੌਇਟਾ ਅਗਲੇ ਹਫਤੇ ਤੋਂ ਇਹ ਬੰਦ ਸ਼ੁਰੂ ਹੋਵੇਗਾ। ਇਹ ਬੰਦ ਕੁਝ ਦਿਨਾਂ ਤੋਂ ਲੈ ਕੇ ਅਗਲੇ ਦੋ ਹਫਤਿਆਂ ਤੱਕ ਜਾਰੀ ਰਹੇਗਾ ਪਰ ਬਹੁਤੇ ਆਟੋਮੇਕਰਜ਼ ਨੇ ਆਖਿਆ ਕਿ ਉਹ ਇਨ੍ਹਾਂ ਫੈਕਟਰੀਆਂ ਨੂੰ ਦੁਬਾਰਾ ਖੋਲ੍ਹਣ ਤੋਂ ਪਹਿਲਾਂ ਹਾਲਾਤ ਦਾ ਜਾਇਜ਼ਾ ਲੈਣਗੇ।
ਡਿਟਰੌਇਟ ਦੇ ਤਿੰਨ ਆਟੋਮੇਕਰਜ਼ ਵੱਲੋਂ ਹੀ ਇਸ ਦੌਰਾਨ 150,000 ਵਰਕਰਜ਼ ਵਿਹਲੇ ਕਰ ਦਿੱਤੇ ਜਾਣਗੇ। ਉਨ੍ਹਾਂ ਨੂੰ ਸਟੇਟ ਦੇ ਅਨਇੰਪਲਾਇਮੈਂਟ ਬੈਨੇਫਿਟਜ਼ ਦੇ ਨਾਲ ਨਾਲ ਸਪਲੀਮੈਂਟਲ ਪੇਅ ਵੀ ਹਾਸਲ ਹੋਵੇਗੀ। ਇਹ ਦੋ ਚੈੱਕ ਰਲ ਕੇ ਓਨੀ ਰਕਮ ਦੇ ਬਰਾਬਰ ਹੋਣਗੇ ਜਿਨਾ ਕਿ ਇਹ ਵਰਕਰਜ਼ ਆਮ ਤੌਰ ਉੱਤੇ ਕਮਾ ਲੈਂਦੇ ਹਨ। ਜੀਐਮ ਨੇ ਆਖਿਆ ਕਿ ਇਸ ਪੇਅ ਬਾਰੇ ਅਜੇ ਵੀ ਯੂਨਾਈਟਿਡ ਆਟੋ ਵਰਕਰਜ਼ ਯੂਨੀਅਨ ਨਾਲ ਗੱਲਬਾਤ ਚੱਲ ਰਹੀ ਹੈ।
ਜਿ਼ਕਰਯੋਗ ਹੈ ਕਿ ਫੋਰਡ ਓਕਵਿਲੇ, ਓਨਟਾਰੀਓ ਦੇ ਇਕ ਪਲਾਂਟ ਵਿੱਚ ਆਟੋਮੋਬਾਈਲਜ਼ ਬਣਾਉਂਦੀ ਹੈ ਤੇ ਫਿਏਟ ਕ੍ਰਾਈਸਲਰ ਬਰੈਂਪਟਨ ਤੇ ਵਿੰਡਸਰ, ਓਨਟਾਰੀਓ ਵਿੱਚ ਗੱਡੀਆਂ ਤਿਆਰ ਕਰਵਾਉਂਦੀ ਹੈ। ਜੀਐਮ ਨੇ ਓਸ਼ਵਾ, ਓਨਟਾਰੀਓ ਵਿੱਚ ਆਪਣੀਆਂ ਗੱਡੀਆਂ ਦੇ ਉਤਪਾਦਨ ਨੂੰ ਪਿਛਲੇ ਸਾਲ ਹੀ ਬੰਦ ਕਰ ਦਿੱਤਾ ਸੀ ਪਰ ਇੰਗਰਸੋਲ, ਓਨਟਾਰੀਓ ਵਿੱਚ ਅਜੇ ਵੀ ਕੰਪਨੀ ਵੱਲੋਂ ਆਟੋਮੋਬਾਈਲ ਤਿਆਰ ਕਰਵਾਏ ਜਾ ਰਹੇ ਹਨ। ਇਸ ਦੇ ਨਾਲ ਹੀ ਕੰਪਨੀ ਸੇਂਟ ਕੈਥਰੀਨਜ਼, ਓਨਟਾਰੀਓ ਵਿੱਚ ਇੰਜਣ ਤੇ ਫਰੰਟ ਵ੍ਹੀਲ ਡਰਾਈਵ ਟਰਾਂਸਮਿਸ਼ਨਜ਼ ਵੀ ਤਿਆਰ ਕਰਵਾਉਂਦੀ ਹੈ।